ନୂଆଦିଲ୍ଲୀ,୪।୬: ରାଜଧାନୀ ଦିଲ୍ଲୀରେ ମେଟ୍ରୋ ଟ୍ରେନ୍ ଓ ସରକାରୀ ବସ୍ରେ ଯାତ୍ରା କରୁଥିବା ମହିଳା ଏଣିକି ମାଗଣରେ ଯାତ୍ରା କରିବେ ବୋଲି ସୋମବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଘୋଷଣା କରିଥିଲେ। ହେଲେ ମଙ୍ଗଳବାର ମହିଳାମାନେ ଏହାକୁ ନେଇ ପ୍ରଶ୍ନ ଉଠାଇଛନ୍ତି। ସୋସିଆଲ ମିଡିଆରେ ଏହି ପ୍ରସଙ୍ଗ ଏବେ ଟ୍ରୋଲ୍ ହେବାରେ ଲାଗିଛି। ଅନେକ ମହିଳା ଲେଖିଛନ୍ତି, କେଜରିଓ୍ବାଲଙ୍କ ଏହି ରାଜନୈତୀକ ଉଦ୍ଦେଶ୍ୟ ପ୍ରଣୋଦିତ ମାଗଣା ଯାତ୍ରା ଆମକୁ ଦରକାର ନାହିଁ, ବରଂ ମହିଳାଙ୍କ ସୁରକ୍ଷା କଥା ମୁଖ୍ୟମନ୍ତ୍ରୀ ଆଗେ ଚିନ୍ତା କରନ୍ତୁ ବୋଲି ସେମାନେ କହିଛନ୍ତି। ଆଉ କେତେଜଣ ମହିଳା କହିଛନ୍ତି ମୁଖ୍ୟମନ୍ତ୍ରି ବୋଧହୁଏ ମହିଳା ସଶକ୍ତିକରଣ ବିଷୟରେ କିଛି ବୁଝି ନାହାଁନ୍ତି। ନଚେତ୍ ମହିଳାଙ୍କ ସହ ପୁରୁଷ ଯଦି ସମାନ ତେବେ ସେମାନଙ୍କୁ ମଧ୍ୟ ଯାତ୍ରା ସମୟରେ ଭଡା ଦେବା ଉଚିତ୍। ପ୍ରଥମେ ମୁଖ୍ୟମନ୍ତ୍ରୀ ଦିଲ୍ଲୀ ପାଇଁ ନୂଆ ବସ୍ ଆଣନ୍ତୁ ମେଟ୍ରୋ ଟ୍ରେନ୍ ବ୍ୟବସ୍ଥାକୁ ସଜାଡନ୍ତୁ ତା’ପରେ ମାଗଣା ଯାତ୍ରା କଥା ଚିନ୍ତା କରିବେ ବୋଲି ଅନେକ ମତ ଦେଇଛନ୍ତି।
