ରାଞ୍ଚତ୍,୧୩-୯(ପି.ଟି.):କୃଷକ, କ୍ଷୁଦ୍ର ବ୍ୟବସାୟୀ ଓ ଆତ୍ମନିଯୁକ୍ତ ବ୍ୟକ୍ତିମାନଙ୍କ ଲାଗି ବହୁପ୍ରତୀକ୍ଷିତ ପେନ୍ସନ ଯୋଜନାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ଝାଡ଼ଖଣ୍ଡ ରାଜଧାନୀ ରାଞ୍ଚତ୍ଠାରେ ଶୁଭାରମ୍ଭ କରିଛନ୍ତି। ‘ପ୍ରଧାନମନ୍ତ୍ରୀ କିଷାନ ମାନ ଧନ ଯୋଜନା’ରେ କ୍ଷୁଦ୍ର ଓ ନାମମାତ୍ର ଚାଷୀମାନଙ୍କୁ ୬୦ ବର୍ଷ ହେବା ପରେ ମାସିକ ୩୦୦୦ ଟଙ୍କା ପେନ୍ସନ ମିଳିବ। ଯେଉଁ କୃଷକମାନଙ୍କ ବୟସ ୧୮ରୁ ୪୦ ବର୍ଷ ମଧ୍ୟରେ ସେମାନେ ଏହି ଯୋଜନା ପାଇଁ ଆବେଦନ କରିପାରିବେ। ସେହିପରି କ୍ଷୁଦ୍ର ବ୍ୟବସାୟୀ ଓ ଦୋକାନୀମାନଙ୍କୁ ପେନସନ ପ୍ରଦାନ ପାଇଁ ‘ପ୍ରଧାନମନ୍ତ୍ରୀ ଲଘୁ ବ୍ୟାପାରୀ ମାନ ଧନ ଯୋଜନା’ ଏବଂ ଆତ୍ମନିଯୁକ୍ତ ବ୍ୟକ୍ତିଙ୍କ ଲାଗି ‘ସ୍ବରୋଜଗାର’ ପେନ୍ସନ ଯୋଜନା ଶୁଭାରମ୍ଭ କରାଯାଇଛି। ଏହି ସମସ୍ତ ଯୋଜନାରେ ଆବେଦନର ବୟସସୀମା ୧୮ରୁ ୪୦ ବର୍ଷ ରଖାଯାଇଛି ଓ ସେମାନେ ୬୦ ବର୍ଷ ବୟସରେ ପହଞ୍ଚତ୍ବା ପରେ ମାସିକ ୩୦୦୦ ଟଙ୍କା ପେନ୍ସନ ପାଇବାକୁ ଯୋଗ୍ୟ ବିବେଚିତ ହେବେ।
ଏଥିସହିତ ଝାଡ଼ଖଣ୍ଡ ବିଧାନସଭାର ନୂଆ ବିଲ୍ଡିଂ ଓ ଏକ ମଲ୍ଟି-ମୋଡାଲ କାର୍ଗୋ ଟର୍ମିନାଲକୁ ପ୍ରଧାନମନ୍ତ୍ରୀ ଉଦ୍ଘାଟନ କରିଛନ୍ତି। କୁଟେ ଗ୍ରାମରେ ନିର୍ମିତ ତିନି ମହଲା ବିଶିଷ୍ଟ ନୂଆ ବିଧାନସଭା ବିଲ୍ଡିଂ ନିର୍ମାଣରେ ୪୬୫ କୋଟି ଟଙ୍କା ବ୍ୟୟ ହୋଇଛି। ଏହାବ୍ୟତୀତ ପ୍ରଧାନମନ୍ତ୍ରୀ ଝାଡ଼ଖଣ୍ଡ ସଚିବାଳୟର ନୂଆ ବିଲ୍ଡିଂର ଭିତ୍ତିପ୍ରସ୍ତର ସ୍ଥାପନ କରିବା ସହ ଅନ୍ଲାଇନରେ ଦେଶରେ ୪୬୨ ଏକଲବ୍ୟ ମଡେଲ ବିଦ୍ୟାଳୟର ଶିଳାନ୍ୟାସ କରିଛନ୍ତି।
ଏହି ଅବସରରେ ଅନୁଷ୍ଠିତ କାର୍ଯ୍ୟକ୍ରମରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ, ଏନ୍ଡିଏ ଦ୍ୱିତୀୟ ପାଳି ସରକାର ଦେଶରୁ ଦୁର୍ନୀତି ହ୍ରାସ କରିବା ସହ ଆତଙ୍କବାଦକୁ କାବୁ କରିବା ଏବଂ ଜମ୍ମୁ-କଶ୍ମୀର ଓ ଲଦାଖ କେନ୍ଦ୍ରଶାସିତ ଅଞ୍ଚଳକୁ ବିକାଶର ଉଚ୍ଚ ସୋପାନକୁ ନେଇଯିବା ଲାଗି ପ୍ରତିଶ୍ରୁତିବଦ୍ଧ। ଏଥିପାଇଁ ସରକାର ପ୍ରଥମ ୧୦୦ ଦିନରେ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛନ୍ତି। ଏହି ୧୦୦ ଦିନରେ ଦେଶ ତାଙ୍କ ମନ୍ତ୍ରଣାଳୟର ଦ୍ରୁତ କାର୍ଯ୍ୟକ୍ରମର କେବଳ ଟ୍ରେଲର ଦେଖିଛି, ପୂରା ଚଳଚ୍ଚିତ୍ର ଦେଖିବାକୁ ବାକି ରହିଛି ବୋଲି ପ୍ରଧାନମନ୍ତ୍ରୀ କହିଥିଲେ। ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ପି. ଚିଦାମ୍ବରମଙ୍କୁ ଆକ୍ଷେପ କରି ମୋଦି କହିଥିଲେ, ଦୁର୍ନୀତି ଦୂର କରିବା ପାଇଁ ତାଙ୍କ ସରକାର ସଂକଳ୍ପବଦ୍ଧ। ନିଜକୁ ଆଇନ ଅଦାଲତରୁ ଊର୍ଦ୍ଧ୍ୱରେ ବୋଲି ଭାବୁଥିବା ବ୍ୟକ୍ତି ଏବେ ଜାମିନ ପାଇଁ କୋର୍ଟଙ୍କ ଶରଣାପନ୍ନ ଓ ଅନ୍ୟ କେତେଜଣ ଜେଲ୍ ଯାଇଛନ୍ତି। ଆଇଏନ୍ଏକ୍ସ ମିଡିଆ ଦୁର୍ନୀତି ମାମଲାରେ ଚିଦାମ୍ବରମ ଏବେ ତିହାର ଜେଲ୍ରେ ଅଛନ୍ତି।
ମୁସଲମାନଙ୍କ ମର୍ଯ୍ୟାଦାର ସୁରକ୍ଷା ପାଇଁ ତାଙ୍କ ସରକାର ପ୍ରତିବଦ୍ଧ ବୋଲି ପ୍ରଧାନମନ୍ତ୍ରୀ ଦୋହରାଇବା ସହ ଏଥିପାଇଁ ପାର୍ଲାମେଣ୍ଟର ପ୍ରଥମ ଅଧିବେଶନରେ ତିନି ତଲାକ ବିଲ୍ ଗୃହୀତ ହୋଇଥିବା କହିଥିଲେ। ଝାଡ଼ଖଣ୍ଡରେ ରଘୁବର ଦାସ ସରକାର ଗତ ୫ ବର୍ଷ ମଧ୍ୟରେ ସ୍ବଚ୍ଛତା ଆଣିବା ଦିଗରେ ସମସ୍ତ ପ୍ରୟାସ କରିଥିବାରୁ ମୋଦି ଉଚ୍ଚ ପ୍ରଶଂସା କରିଥିଲେ। ଆୟୁଷ୍ମାନଥ ଭାରତ ସ୍ବାସ୍ଥ୍ୟବୀମା ଯୋଜନାରେ ଦେଶର ୪୪ ଲକ୍ଷ ଲୋକ ଉପକୃତ ହେଉଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନାରେ ୨ କୋଟିରୁ ଊର୍ଦ୍ଧ୍ୱ ଘର ନିର୍ମାଣ ହୋଇଥିବାବେଳେ ଆଉ ୨ କୋଟି ନିର୍ମାଣାଧୀନ ରହିଛି। ଏହା ବ୍ୟତୀତ ଦେଶରେ ୧୦ କୋଟି ଶୌଚାଳୟ ନିର୍ମାଣ ହେବା ସହ ୮ କୋଟି ପରିବାରକୁ ମାଗଣାରେ ଏଲ୍ପିଜି ସଂଯୋଗ ପ୍ରଦାନ କରାଯାଇଥିବା ପ୍ରଧାନମନ୍ତ୍ରୀ ସୂଚନା ଦେଇଥିଲେ।
