ଅନୁଗୋଳ ଅଫିସ, ୨୭।୯-ବହୁ ଚର୍ଚ୍ଚିତ କୁଶକିଳା ଡବଲ ମର୍ଡର ଓ ମାଉସୀ ପୁତୁରା ହତ୍ୟା ମାମଲାର ଏକମାତ୍ର ଅଭିଯୁକ୍ତ ଝସକେତନ ରାଉତଙ୍କୁ ଅନୁଗୋଳ ଜିଲା ଓ ଦୌରାଜଜ୍ ଗୁରୁବାର ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଜରପଡା ଥାନା କୁଶକିଳା ଗାଁର ଦୁଇ ଭାଇ ଯୋଗଶ୍ୱେର ସାହୁ(୩୬) ଏବଂ ହିରଣାକ୍ଷ ସାହୁ(୩୨)ହତ୍ୟା ମାମଲାରେ ଅଦାଲତ ଏହି ଦଣ୍ଡାଦେଶ ପ୍ରଦାନ କରିଥିବା ବେଳେ ଅନ୍ୟ ୨ ହତ୍ୟା ମାମଲା ଏବେ ବି ବିଚାରାଧୀନ ରହିଛି। ଏଥିସହ ମୃତକଙ୍କ ପରିବାରକୁ ୫ ଲକ୍ଷ ଟଙ୍କାର ଜରିମାନା ଦେବାକୁ ବିଚାରପତି ଅଶାନ୍ତ କୁମାର ଦାସ ନିର୍ଦ୍ଦେଶ ଦେଇଛନ୍ତି। ଏହା ଅନାଦାୟ ହେଲେ ଅଧିକ ୩ ବର୍ଷ କାରାଦଣ୍ଡ ଭୋଗିବାକୁ ଅଦାଲତ ତାଙ୍କ ରାୟରେ ସ୍ପଷ୍ଟ କରିଛନ୍ତି।
ମାମଲାର ବିବରଣୀରୁ ପ୍ରକାଶ ଯେ, ଅଭିଯୁକ୍ତ ଝସକେତନ ବିଭିନ୍ନ ବ୍ୟବସାୟରେ ସମ୍ପୃକ୍ତ ରହିବା ସହ ଜମି କିଣାବିକା, ସୁଧ କାରବାର କରୁଥିଲେ। ବ୍ୟବସାୟୀ ହୋଇଥିବାରୁ ବହୁ ଲୋକଙ୍କ ସହ ତାଙ୍କର ଆର୍ଥିକ ନେଣଦେଣ ବିବାଦ ଥିଲା। କୁଶକିଳାର ପୂର୍ବତନ ସରପଞ୍ଚ ରାଜ କିଶୋର ସାହୁଙ୍କ ସହ ତାଙ୍କର ଆର୍ଥିକ ଓ ଜମିଜମା ବିବାଦ ରହିଥିଲା। ଏହି କାରଣରୁ ସେ ରାଜକିଶୋରଙ୍କ ପୁଅ ଯୋଗେଶ୍ୱର ଓ ପୁତୁରା ହିରଣାକ୍ଷଙ୍କୁ ହତ୍ୟା କରିବାକୁ ଯୋଜନା କରିଥିଲେ। ୨୦୧୬ ଫେବୃୟାରୀ ୫ରେ ଝସକେତନ ପ୍ରଥମେ ହିରଣାକ୍ଷ ସାହୁଙ୍କୁ କୁଶକିଳାସ୍ଥିତ ନିଜ ଶିଶୁମନ୍ଦିର ପରିସରକୁ ଡାକି ହତ୍ୟା କରି ସେଠାରେ ଥିବା କୂଅରେ ପକାଇ ଦେଇଥିଲେ। ପରେ ଯୋଗଶ୍ୱେର ସାହୁଙ୍କୁ କୌଶଳକ୍ରମେ ସେଠାକୁ ଡାକିଆଣି ହତ୍ୟା କରିଥିଲେ। ସିମେଣ୍ଟ ଖୁଣ୍ଟ ଓ ପଥର ପକାଇ ଦୁଇ ଭାଇଙ୍କ ମୁଣ୍ଡକୁ ଛେଚି ଦେଇଥିଲେ। ପରେ ଉକ୍ତ କୂଅରେ ଲୁଣ, ପାଳ, ଖତ ଓ ବାଲି ଦେଇ ପୋତି ଦେଇଥିଲେ। ରାଜକିଶୋରଙ୍କ ପରିବାର ପକ୍ଷରୁ ଥାନାରେ ଏତଲା ପରେ ପୋଲିସ ଝସକେତନଙ୍କୁ ଗିରଫ କରିଥିଲା। ତାଙ୍କ ବୟାନକୁ ଆଧାର କରି ପୋଲିସ ସେହି ମାସ ୧୧ ତାରିଖରେ ଉକ୍ତ ଶିଶୁମନ୍ଦିର ପରିସରରେ ଥିବା କୂଅ ଖୋଳି ଦୁଇ ଭାଇଙ୍କ ଗଳିତ ମୃତଦେହ ଉଦ୍ଧାର କରିଥିଲା। କେବଳ ଉକ୍ତ ଦୁଇ ଭାଇ ନୁହନ୍ତି, ୨୦୧୫ ମେ ୨୨ରୁ ନିଖୋଜ ଥିବା ଛେଣ୍ଡିପଦା ବ୍ଲକ କୁକୁରପେଟା ପଞ୍ଚାୟତ ନୂଆମୌଜା ଗ୍ରାମର ମାଉସୀ ଅବଳା ଗଡ଼ନାୟକ ଓ ତାଙ୍କ ପୁତୁରା କୁମୁଦ ଚନ୍ଦ୍ର ସାହୁଙ୍କୁ ମଧ୍ୟ ଝସକେତନ ହତ୍ୟା କରି ଉକ୍ତ ଶିଶୁମନ୍ଦିର ପରିସରରେ ପୋତି ଦେଇଥିବା ପୋଲିସ ନିକଟରେ ସେତେବେଳେ ସ୍ବୀକାର କରିଥିଲେ। ପରେ ପୋଲିସ ଶିଶୁମନ୍ଦିର ପରିସର ଖୋଲି ଦୁଇଜଣଙ୍କ କଙ୍କାଳ ଉଦ୍ଧାର କରିବା ପରେ ଏହି ଘଟଣା ସେତେବେଳେ ରାଜ୍ୟରେ ଚହଳ ପକାଇ ଦେଇଥିଲା। ଉପରୋକ୍ତ ୪ ହତ୍ୟା ମାମଲାର ବିଚାର ଅନୁଗୋଳ ଜିଲା ଓ ଦୌରାଜଜ୍ଙ୍କ କୋର୍ଟରେ ଚାଲିଥିବା ବେଳେ ପ୍ରଥମେ କୁଶକିଳା ଦୁଇ ଭାଇ ହତ୍ୟା ମାମଲାର ରାୟ ପ୍ରକାଶ ପାଇଛି। ସରକାରଙ୍କ ପକ୍ଷରୁ କ୍ୟାଡର ପିପି ପ୍ରଦୀପ କୁମାର ଦାସ ଓ ପୂର୍ବତନ ପିପି ମହେନ୍ଦ୍ର କୁମାର ବସ୍ତିଆ ମାମଲା ପରିଚାଳନା କରିଥିଲେ। ୩୬ଜଣଙ୍କ ସାକ୍ଷ୍ୟ ପ୍ରମାଣକୁ ଭିତ୍ତି କରି କୋର୍ଟ ଏହି ଦଣ୍ଡାଦେଶ ଦେଇଛନ୍ତି।
