ଅମରପାଲି, ୭।୩ (ଡି.ଏନ.ଏ)- ପ୍ରଧାନମନ୍ତ୍ରୀ ଜୀ, ନମସ୍କାର। ଆମର ଗଁ। ଆର ଅଂଲଚରେ ଅନେକ ଲୋକ୍ କିଡ଼୍ନୀ ରୋଗରେ ପଡ଼ିଛନ୍। ଅନେକ ଲୋକ୍ ଇ ରୋଗ୍ରେ ପଡ଼ି ମରିଗଲେନ। ଏହେଦେ ଯେନ୍ମାନେ ଚିକିଛିତ ହେଉଛନ୍ ସେମାନକୁ ଡାକ୍ତର କହୁଛନ୍ ଫ୍ଲୋରାଇଡ ମିଶା ପାଏନ୍ ପିଇବାର ଲାଗି ଇ ରୋଗ୍ ବହପୁଛେ। ଆମର ଗଁାଟା ପାହାଡ଼ିଆ ଅଂଚଲରେ ଥିଲାବେଲେ ନିରମଲ ପିଇଲା ପାଏନ୍ ନାଇଁ ମିଲବାର। ଗଁାବାସୀକୁ ନିରମଲ ପିଇଲା ପାଏନ୍ ଯୁଗେଇ ଦେବାର ବେବସ୍ତା କରବାର ସଂଗେ ରୋଗ୍ରେ ପୀଡ଼ିତ ଲୁକ୍କୁ ଚିକିଛା ସାହାଯ୍ ଯୁଗେଇ ଦେବାକେ ଆମେ ଆପନ୍କୁ ଅନୁରୋଧ କରୁଛୁଁ। ଠିକ୍ ଏନ୍ତା କିଛି ଲେଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିକୁଁ ଚିଠି ଲେଖି ଅନୁରୋଧ କରିଛନ୍ ସ୍କୁଲ ପଢ଼ୁଆ ଦୁଇ ବହେନ।
ସୂଚନା ଅନ୍ସାରେ ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅଧୀନ ବହଲପଦର ପଁଚେତ୍ର ଅମରପାଲି ଗଁାର ପ୍ରାଣବନ୍ଧୁ ସାହୁକଁର ଦୁଇ ଝି’ ଇପସିତା ଅନନ୍ୟା ସାହୁ ଆର ଆରାଧ୍ୟା ଅନୁଭା ସାହୁ। ଇପସିତା ଅମରପାଲି ୟୁପି ସ୍କୁଲରେ ୬ଷ୍ଠ ଶ୍ରେଣୀରେ ପଢ଼ୁଥିଲାବେଲେ ବହେନ୍ ଆରାଧ୍ୟା ୨ୟ ଶ୍ରେଣୀରେ ପଢ଼ୁଛନ୍। ଦୁଇ ବହେନ୍ ଗଁାର ଆର ଅଂଚଲବାସୀକର ସମସିଆର ସମାଧାନ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିକୁଁ ଚିଠି ଲେଖି ଅନୁରୋଧ କରିଛନ୍। ସେମାନକର ଇ କାଯ୍କେ ଗଁାବାସୀ, ଅଂଚଲବାସୀ ବଡ଼ଭାରି ପରଶଁସା କରିଛନ୍। ସେନ୍ତା ଦୁଇ ବହେନ୍ ପ୍ରଧାନମନ୍ତ୍ରୀ ଆମର ଚିଠି ପାଏଲା ଉତାରୁ ଅଂଚଲବାସୀକର ଦୁଖ୍ ଆର ସମସିଆର ସମାଧାନ ନିହାତି କରବେ ବଲି କହିଛନ୍। ବୀରମହାରାଜପୁର ବ୍ଲକର ବହଳପଦର ଆର ଦୁର୍ଜନତୈଲା ପଁଚେତ୍ ଜିଲାର ସୀମାନାରେ ରହିଛେ। ଅନେକ ସମିଆରେ ଇ ଦୁଇ ପଁଚେତ୍ରେ ଲୋକ୍ ଠିକ୍ ଭାବେ ସୁଆସ୍ତିଅ ସେବା ବି ନାଇଁ ପାଇପାରବାର। ସେନ୍ତା ଅଂଚଲର ଅମରପାଲି, ବହଳପଦର, ଗୁଦଗୁଦା, ଗୌଡ଼ଗାଡ଼, ଦାଦରପାଲି, ଦୁର୍ଜନତୈଳା, ସୁରଧାପାଲି, କେନ୍ଦୁପାଲି ଗଁାରେ ଅନେକ ଲୋକ୍ କିଡ଼୍ନୀ ରୋଗ୍ରେ ପୀଡ଼ିତ ଅଛନ୍। ବଛର କେତେଟା ଭିତରେ ଅଂଚଲର ଶତାଧିକ ଲୋକ୍ କିଡ଼୍ନୀ ରୋଗ୍ରେ ମଲେନ। ଅଂଚଲରେ ପାଖାପାଖି ୧୫୦ରୁ ଅଧ୍କା ଲୋକ୍ ରୋଗ୍ରେ ପୀଡ଼ିତ ଥିବାର ଅଭିଯୋଗ ହେଉଛେ। ସେନ୍ତା ଫିମାସ ରୋଗ୍ରେ ଅଂଚଲର ଦୁଇଝନ୍ ଲେଖେଁ ମରୁଥିବାର ଜନାଯାଇଛେ। ଇ ବାବ୍ଦେ ଭିନେ ଭିନେ ସମିଆରେ ବିଭାଗୀୟ ଅଧ୍କାରୀମାନକୁ ଅଭିଯୋଗ କଲେ ବି ଆଏଁଖ୍ ଦୁରଶିଆ ପଦକ୍ଷେପ ନାଇଁ ନିଆଯିବାର। ଅଭିଯୋଗ ହେଲେ ବିଭାଗ ତରଫୁ ଗୁଟେ ଡାକ୍ତରିଦଲ ଆସି କିଛି ଲୁକ୍କର ରକତ୍ ନମୁନା ପରୀକ୍ଷା ଲାଗି ନେଉଛନ୍। ହେଲେ ପରୀକ୍ଷାର ଫଲାଫଲ କାଣା ହେଲା କେହି ଜାନି ନାଇଁପାରବାର। ଏନ୍ତା କି ଅଂଚଲର ଭିନେ ଭିନେ ନଲ୍ଚୁଅଁାର ପାଏନ୍ ନମୁନା ପରୀକ୍ଷା ଲାଗି ନେଇଥିଲେ ବି ତାର ରିପୋର୍ଟ ନାଇଁ ଦେଉଥିବାର ଲୋକ ଅଭିଯୋଗ କରୁଛନ୍। ଇ ଘଡ଼ିସଁଧି ସମିଆରେ ଦୁଇ ବହେନ୍ ପ୍ରଧାନମନ୍ତ୍ରୀକୁଁ ଚିଠି ଲେଖି ଅଂଚଲବାସୀକର ଦୁଖ୍, ସମସିଆର ସମାଧାନ କରବାକେ ଅନୁରୋଧ୍ କରବାର ଘଟନାକେ ନେଇ ଲୋକ୍ ସେମାନକୁ ଗୁରଦୁଟେ ପରଶଁସା କରିଛନ୍। ସେନ୍ତା ପ୍ରଧାନମନ୍ତ୍ରୀ ଇ ଦୁଇ ଛୁଆକର ଅନୁରୋଧ ରକ୍ଷା କରବେ ବଲି ଅଂଚଲବାସୀ ବି ଆଶ୍ କରିଛନ୍।
