ରାସୋଳ, ୯।୨(ଡି.ଏନ.ଏ.) – ଢେଙ୍କାନାଳ ଜିଲା ହିନ୍ଦୋଳ ବ୍ଲକ ଗଣ୍ଡାନାଳୀ ପଞ୍ଚାୟତ ଅନ୍ତର୍ଗତ କଦଳୀପାଳ ଗ୍ରାମର ପ୍ରଧାନମନ୍ତ୍ରୀ ଆବାସ ଯୋଜନାରେ କାର୍ଯ୍ୟାଦେଶ ପାଉଥିବା ହିତାଧିକାରୀ ଅନୁଦାନ ଟଙ୍କା ପାଇଥିଲେ ସୁଦ୍ଧା ଘର କାମ ସାରୁନାହାନ୍ତି। ପ୍ରଶାସନର ବାରମ୍ବାର ତାଗିଦ୍ ସତ୍ତ୍ୱେ ସେମାନଙ୍କ ଉପରେ କୌଣସି ପ୍ରଭାବ ପଡୁନାହଁି। ଶୁକ୍ରବାର ବିଡିଓ ଦେବଦତ୍ତ ମାହନ୍ତ ଗ୍ରାମର ଅନେକ ହିତାଧିକାରୀଙ୍କ ଘରକୁ ଯାଇ ବୁଝାଇଛନ୍ତି। ଏଥିସହ ୫୨ଦିନ ମଧ୍ୟରେ ଗୃହ ନିର୍ମାଣ କାର୍ଯ୍ୟ ନ ସାରିଲେ ପଇସା ଫେରାଇ ନିଆଯିବ ବୋଲି ତାଗିଦ୍ କରିଛନ୍ତି।
ହିତାଧିକାରୀମାନେ ଧାର୍ଯ୍ୟ ସମୟ ମଧ୍ୟରେ ଘର ନିର୍ମାଣ କାର୍ଯ୍ୟ ସାରୁ ନ ଥିବାରୁ ପ୍ରଶାସନ ଉପରେ ଚାପ ପଡୁଛି। ଏଣୁ ଝିପିଝିପି ବର୍ଷା ସତ୍ତ୍ୱେ ପିଇଓ ଦୀନେଶ ସାମଲ, ଜିଆର୍ଏସ୍ ଦେବାଶିଷ ପୃଷ୍ଟିଙ୍କୁ ସାଙ୍ଗରେ ଧରି ବିଡିଓ ହିତାଧିକାରୀଙ୍କୁ ଘରକୁ ଯାଇ ସଚେତନ କରାଇଥିଲେ। ଏ ନେଇ ବିଡିଓ କୁହନ୍ତି, ଗ୍ରାମର ୨୯ ହିତାଧିକାରୀ ଆବାସ ଯୋଜନାରେ କାର୍ଯ୍ୟାଦେଶ ପାଇଛନ୍ତି। ସେମାନଙ୍କ ମଧ୍ୟରୁ ମାତ୍ର ୩ଜଣ କାମ ସାରିଛନ୍ତି। ମାମି ସାହୁ, ସବିତା ସାହୁ, ମାନସ ସାହୁ, ପ୍ରହଲ୍ଲାଦ ସାହୁ, ଦୂତୀ ବେହେରା, ନମିତା ବେହେରା, କବିତା ନାଏକ ଘର କାମ ଆରମ୍ଭ କରିନାହାନ୍ତି। ୫୨ଦିନ ଭିତରେ କାମ ନ ସାରିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡିଓ ସୂଚନା ଦେଇଛନ୍ତି। ଏହି ଅବସରରେ ପ୍ରହଲ୍ଲାଦ କହିଥିଲେ, ତାଙ୍କ ନାମରେ ବ୍ୟାଙ୍କରେ ଲୋନ୍ ରହିଛି। ସରକାରୀ ଅନୁଦାନ ଆସିବା ପରେ ସେଥିରୁ ଋଣ ବାବଦ ଟଙ୍କା କଟିଯାଇଛି। ତେଣୁ ସେ ଘର କାମ ଆରମ୍ଭ କରି ପାରୁନାହାନ୍ତି। ଏହାର ସମାଧାନ କରିବାକୁ ବିଡିଓ ପ୍ରତିଶ୍ରୁତି ଦେଇଥିଲେ। ଅନ୍ୟ ହିତାଧିକାରୀମାନେ ବର୍ଷାପାଗ ଛାଡ଼ିବା ପରେ ଘର କାମ ଆରମ୍ଭ କରିବେ ପ୍ରତିଶ୍ରୁତି ଦେଇଛନ୍ତି। ବ୍ଲକର ସବୁ ଗ୍ରାମରେ ଅନେକ ହିତାଧିକାରୀ ଘର କାମ ସମ୍ପୂର୍ଣ୍ଣ କରିନାହାନ୍ତି। ଆଗାମୀ ଦିନରେ ସମସ୍ତଙ୍କୁ ଏପରି ସଚେତନ କରାଯିବ। ସେମାନେ ନ ଶୁଣିଲେ ପ୍ରଶାସନ ପକ୍ଷରୁ ସେମାନଙ୍କ ଘର ଆଗରେ ପ୍ରତୀକ ଧାରଣା ଦିଆଯିବ ବୋଲି ବିଡିଓ କହିଛନ୍ତି।
