କେନ୍ଦୁଝର, ୭।୩ (ସ୍ବ.ପ୍ର.)- ଖଣିଖାଦାନ ଭରା କେନ୍ଦୁଝର ଜିଲାରେ ରାସ୍ତାଘାଟ ଦୁରବସ୍ଥା, ଟ୍ରାଫିକ ସମସ୍ୟା ଓ ବିଭିନ୍ନ ସମୟରେ ଘଟୁଥିବା ଦୁର୍ଘଟଣା ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ରୋକିବାରେ ପ୍ରଶାସନ ସଫଳ ହୋଇ ପାରୁ ନାହିଁ । ପୋଲିସ ବିଭାଗର ଅପରାଧ ପରିସଂଖ୍ୟାନ ତଥ୍ୟ ଅନୁଯାୟୀ ୨୦୧୯ରେ ଜିଲାରେ ୬୭୪ ସଡକ ଦୁର୍ଘଟଣା ମାମଲା ରୁଜୁ ହୋଇଥିଲା। ସେଥିରେ ୩୩୪ ଜଣଙ୍କ ମୃତ୍ୟୁ ଘଟିଥିବା ବେଳେ ୨୯୧ ଜଣ ଗୁରୁତର ଓ ୪୧୨ ଜଣ ସାମାନ୍ୟ ଆହତ ହୋଇଥଲେ। ୨୦୧୮ ମସିହାରେ ଏହି ଦୁର୍ଘଟଣା ସଂଖ୍ୟା ଥିଲା ୬୩୯ । ସଡ଼କ ସୁରକ୍ଷା ଲାଗି ବିଭିନ୍ନ ସ୍ଥାନରେ ସଚେତନତା ରାଲି, ସଭାସମିତି, ପ୍ରତିଯୋଗିତାମାନ ଆୟୋଜନ କରି ଅର୍ଥ ଖର୍ଚ୍ଚ କରାଯାଉଥିଲେ ମଧ୍ୟ ଦୁର୍ଘଟଣା ରୋକାଯାଇ ପାରୁନାହିଁ। ଦୁର୍ଘଟଣା ରୋକିବାଲାଗି ବ୍ୟାପକ ହେଲମେଟ, ସିଟ ବେଲଟ, ବିନା ଲାଇସେନ୍ସରେ ଗାଡିଚାଳନା, ମଦ ପିଇ ଗାଡିଚାଳନା, କ୍ଷୀପ୍ର ଗତିରେ ବା ବେପରୁଆ ଗାଡି ଚାଳନା, ବିନା କାଗଜପତ୍ରରେ ଗାଡି ଚାଳନା ଆଦି ଉପରେ ଧରପଗଡ କରାଯାଇ ଜରିମାନା ଆଦାୟ କରାଯାଉଛି । ୨୦୧୯ ମସିହାରେ ପୋଲିସ ପକ୍ଷରୁ ଧରପଗଡ କରି ୩୯ ଲକ୍ଷ ଟଙ୍କାରୁ ଅଧିକ ଜରିମାନା ଆଦାୟ କରିଯାଇଛି । ସେହିପରି ୬୩୪ ଟି ଲାଇସେନ୍ସ ଜବତ କରାଯାଇ ଏହାକୁ ବାତିଲ କରାଯାଇଛି । ମଦ୍ୟପାନ କରି ଗାଡି ଚଳାଇବା ଅଭିଯୋଗରେ ୬୩୪ ଜଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାଖାପାଖି ୨ ଲକ୍ଷ ଟଙ୍କା ଜରିମାନା ଆଦାୟ ସହ ୪୩୧ ଜଣଙ୍କ ଲାଇସେନ୍ସ ରଦ୍ଦ କରାଯାଇଛି । କିନ୍ତୁ ଦୁର୍ଘଟଣାର ପ୍ରକୃତ କାରଣ ବିପର୍ଯ୍ୟସ୍ତ ଓ ବିପଦପୂର୍ଣ୍ଣ ରାସ୍ତାଘାଟ ହୋଇଥିବା ବେଳେ ସେସବୁର ମରାମତି କରିବା ନେଇ କୌଣସି ପଦକ୍ଷେପ ନିଆଯାଉ ନାହିଁ । ଏଣୁ ଧରପଗଡ ଓ ଜରିମାନା ଆଦାୟରୁ କୌଣସି ସୁଫଳ ମିଳୁ ନାହିଁ ।
ଏହି ଜିଲା ଦେଇ ବ୍ୟସ୍ତବହୁଳ ୨୦, ୭୨୦ ଓ ୪୯ ନମ୍ବର ଜାତୀୟ ରାଜପଥ ଯାଇଛି । ଏସବୁ ରାଜପଥର ଅସମ୍ପୂର୍ଣ ଅବସ୍ଥା, ଭଙ୍ଗାଦଦରା ରାସ୍ତା ଓ ପୋଲ ବିଭିନ୍ନ ସମୟରେ ଦୁର୍ଘଟଣାର କାରଣ ହେଉଛି ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରୁଛନ୍ତି। ଜିଲାର ଖଣି ସମୃଦ୍ଧ ଅଞ୍ଚଳରେ ଯୋଡା-ବାମେବାରୀ-ପଳାଶପଙ୍ଗା, ଶୁଆକାଠି-ଦୁବୁନା, ଭଦ୍ରାସାହି-ବଡବିଲ-ନାଲଦା ଆଦି ରାସ୍ତାରେ ଲୁହାପଥର ପରିବହନ ଯୋଗୁ ଅବସ୍ଥା ଶୋଚନୀୟ ହୋଇ ପଡୁଛି। ଧୂଳିଧୂଆଁ ପ୍ରଦୂଷଣ ଓ ଟ୍ରାଫିକ ଜାମ ସମସ୍ୟା ନେଇ ଲୋକେ ବାରମ୍ବାର ରାସ୍ତାରୋକୋ ଓ ଘେରାଉ ଆନ୍ଦୋଳନ କରି ଆସୁଛନ୍ତି। ରାସ୍ତା ଉପରେ ବେଆଇନ ଗାଡି ପାର୍କିଂ ଅନେକ ସ୍ଥାନରେ ଦୁର୍ଘଟଣାର କାରଣ ହେଉଛି ବୋଲି ଆଇନଜୀବୀ ସୁରଜ କୁମାର ମହାପାତ୍ର କହିଛନ୍ତି । ଜିଲାରେ ରାସ୍ତା ସମସ୍ୟାର ସ୍ଥାୟୀ ପ୍ରତିକାର ନ ହେଲେ ଆନ୍ଦୋଳନ କରାଯିବ ବୋଲି ସଦର ବିଧାୟକ ମୋହନ ଚରଣ ମାଝୀ କହିଛନ୍ତି । ଏନେଇ ଆରଟିଓ କେନ୍ଦୁଝର ନିର୍ମଳ ମହାନ୍ତିଙ୍କୁ ପଚାରିବାରୁ ଦୁର୍ଘଟଣା ରୋକିବା ପାଇଁ ସଚେତନତା କାର୍ଯ୍ୟକ୍ରମ ସହିତ ବ୍ୟାପକ ଧରପଗଡ କରାଯାଉଛି ବୋଲି କହିଛନ୍ତି।
