କାନ୍ସ,୨୭ା୫(ପି.ଟି): ଦକ୍ଷିଣ କୋରୀୟ ନିର୍ଦ୍ଦେଶକ ବଙ୍ଗ୍ ଜୁନ୍ ହୋଙ୍କ ‘ପାରାସାଇଟ୍’ କାନ୍ସ ଫିଲ୍ମ ଫେଷ୍ଟିଭାଲ୍ରେ ସ୍ବର୍ଣ୍ଣ ପଦକ ଲାଭ କରିଛି। ଶନିବାର ସନ୍ଧ୍ୟାରେ ୭୨ତମ କାନ୍ସ ଫିଲ୍ମ ଫେଷ୍ଟିଭାଲ୍ର ଉଦ୍ଯାପନୀ ଉତ୍ସବରେ ପାଲ୍ମେ ଡି’ଓର୍ ପୁରସ୍କାର ପ୍ରଦାନ କରାଯାଇଥିଲା। ଚଳିତ ବର୍ଷ ମହିଳା ନିର୍ଦ୍ଦେଶକଙ୍କ ଦ୍ୱାରା ୪ଟି ଫିଲ୍ମ ମଧ୍ୟରୁ ୩ଟି ଫିଲ୍ମ ପ୍ରତିଯୋଗିତାକୁ ଚୟନ ହୋଇଥିଲା।
ବଙ୍ଗ୍ ଜୁନ୍ ହୋ ହେଉଛନ୍ତି ଦ୍ୱିତୀୟ ଏସୀୟ ନିର୍ଦ୍ଦେଶକ ଯିଏ ଏହି ପୁରସ୍କାର ପାଇବା ପାଇଁ ଯୋଗ୍ୟ ବିବେଚିତ ହୋଇଥିଲେ। ୨୦୧୮ରେ ଜାପାନୀ ଫିଲ୍ମ ନିର୍ଦ୍ଦେଶକ ହିରୋକାଜୁ କୋ-ରେ-ଇଡା ‘ଶପ୍ଲିଫ୍ଟର୍ସ’ ଫିଲ୍ମ ପାଇଁ ପାଲ୍ମେ ଡି’ଓର୍ ପୁରସ୍କାର ଲାଭ କରିଥିଲେ। ଫରାସୀ ସିନେମା ଆଇକନ୍ କାଥେରାଇନ୍ ଡେନିଉଭ୍ଙ୍କଠାରୁ ବଙ୍ଗ୍ ଜୁନ୍ ହୋ ଉଦ୍ଯାପନୀ ଉତ୍ସବର ସର୍ବୋଚ୍ଚ ପୁରସ୍କାର ଲାଭ କରିଥିଲେ। ଏହାପରେ ବେଲ୍ଜିୟାନ୍ ବ୍ରଦର୍ସ ଜିନ୍-ପିଏରେ ଏବଂ ଲ୍ୟୁସ ଡାର୍ଡେନେ ‘ଲି ଜିଉନ୍ ଅହମଦ୍’ (ୟଙ୍ଗ୍ ଅହମଦ୍) ପାଇଁ ସର୍ବଶ୍ରେଷ୍ଠ ନିର୍ଦ୍ଦେଶକ ପୁରସ୍କାର ଲାଭ କରିଥିଲେ। ମେକ୍ସିକାନ୍ ନିର୍ଦ୍ଦେଶକ ଆଲେଜାଣ୍ଡ୍ରୋ ଗୋଞ୍ଜାଲେଜ୍ ଇନାରିଟୁଙ୍କ ନେତୃତ୍ୱରେ ଗଠିତ ବିଚାରକମଣ୍ଡଳୀ ଉତ୍ସବର ରନର୍ସ-ଅପ୍ ପ୍ରାଇଜ୍ (ଗ୍ରାଣ୍ଡ ପ୍ରିକ୍ସ) ଫାର୍ଷ୍ଟ ଟାଇମ୍ ଡାଇରେକ୍ଟର ମଟି ଡିଓପଙ୍କ ‘ଆଟଲାଣ୍ଟିକ୍’କୁ ମିଳିଥିଲା। ହଲିଉଡ୍ ଷ୍ଟାର ସିଲଭେଷ୍ଟର ଷ୍ଟାଲୋନ୍ଙ୍କ ଦ୍ୱାରା ଏହା ପ୍ରଦାନ କରାଯାଇଥିଲା। ଜୁରି ପ୍ରାଇଜ୍ ମିଳିତ ଭାବେ ଦୁଇଟି ଫିଲ୍ମ ଫ୍ରେଞ୍ଚ୍-ମାଲିଆନ୍ ଲାଡ୍ଜ ଲି’ଙ୍କ ‘ଲେସ୍ ମିଜେରେବୁଲ୍’ ଏବଂ ବ୍ରାଜିଲିଆନ୍ ଫିଲ୍ମ ‘ବାକାରାଉ’କୁ ପ୍ରଦାନ କରାଯାଇଥିଲା।
