ଜମ୍ମୁ,୧୧ା୮(ପି.ଟି.): ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ଉଚ୍ଛେଦ ପରେ ଆଇନଶୃଙ୍ଖଳା ପରିସ୍ଥିତି ଆଶଙ୍କାରେ ବିଭିନ୍ନ ଅଞ୍ଚଳରେ ୧୪୪ ଧାରା ଜାରି ହୋଇଥିବାବେଳେ ବହୁସଂଖ୍ୟାରେ ହିନ୍ଦୀଭାଷୀ ଶ୍ରମିକ ଉପତ୍ୟକା ଛାଡିବାରେ ଲାଗିଛନ୍ତି। ଗତ ୫ ଦିନ ମଧ୍ୟରେ ୫୦ ହଜାର ଶ୍ରମିକ ଜମ୍ମୁ-କଶ୍ମୀର ଛାଡ଼ିଥିବା ଜଣେ ଅଧିକାରୀ ସୂଚନା ଦେଇଛନ୍ତି। ଆହୁରି ଅନେକ ଶ୍ରମିକ ନିଜ ରାଜ୍ୟକୁ ଫେରିବା ପାଇଁ ରେଳଷ୍ଟେଶନ୍ରେ ସେମାନଙ୍କ ଟ୍ରେନ୍କୁ ଅପେକ୍ଷା କରିଥିବା ଦେଖାଯାଇଛି। ନିଯୁକ୍ତିଦାତା ସମ୍ପୂର୍ଣ୍ଣ ପାରିଶ୍ରମିକ ପୈଠ କରୁ ନ ଥିବା ଏବଂ ଘରୋଇ ପରିବହନକାରୀ ସଂସ୍ଥାମାନେ ଅଧିକ ଦେୟ ନେଉଥିବା ସେମାନେ ଅଭିଯୋଗ କରିଛନ୍ତି।
ତାରିଖରୁ ଲାଗୁ ହୋଇଥିବା ୧୪୪ ଧାରା ଜମ୍ମୁରୁ ଉଠାଇଦିଆଯାଇଥିବାବେଳେ ଶୁକ୍ରବାର ଡୋଡା ଓ କିସ୍ତଓ୍ବାର ଜିଲାରେ କର୍ଫ୍ୟୁ କୋହଳ କରାଯାଇଥିଲା। ଫଳରେ ଉକ୍ତ ଅଞ୍ଚଳରେ ଜୀବନଯାତ୍ରା ସ୍ବାଭାବିକ ହେବାରେ ଲାଗିଛି। ଅନୁଚ୍ଛେଦ ୩୭୦ ଉଚ୍ଛେଦ ପୂର୍ବରୁ ଗତ ୩ ତାରିଖରେ ରାଜ୍ୟ ପ୍ରଶାସନ ଅମରନାଥ ଯାତ୍ରୀ ଓ ପର୍ଯ୍ୟଟକମାନଙ୍କୁ ତୁରନ୍ତ ଉପତ୍ୟକା ଛାଡିଚାଲିଯିବାକୁ ପରାମର୍ଶ ଦେଇଥିଲେ।
ବିହାରର ଦର୍ଭଙ୍ଗା ଯିବା ପାଇଁ ସ୍ବତନ୍ତ୍ର ଟ୍ରେନ୍କୁ ଅପେକ୍ଷା କରିଥିବା ରମେଶ କୁମାର କହିଛନ୍ତି, ସେ ଏକ ୪୦ ଜଣିଆ ଗ୍ରୁପ୍ରେ ଶୁକ୍ରବାରଠାରୁ ଆସି ଷ୍ଟେଶନରେ ଅପେକ୍ଷା କରିଛନ୍ତି। ସେମାନେ ଦୁଇଦିନ ହେଲା କିଛି ଖାଇନାହାନ୍ତି। ସେମାନେ କାମ କରୁଥିବା ଆଇସ୍କ୍ରିମ୍ କମ୍ପାନୀ ସାମ୍ପ୍ରତିକ ସ୍ଥିତିକୁ ନେଇ ପାରିଶ୍ରମିକ ଦେଇ ନ ପାରିବାରୁ ସାମାନ୍ୟ କିଛି ପଇସା ଧରି ସେମାନେ ଫେରୁଥିବା କହିଛନ୍ତି। ଟାଟା ସୁମୋ ଜଣ ପିଛା ୨୦୦୦ ଟଙ୍କା ଭଡ଼ା ନେଇ ଲୋକଙ୍କୁ ଶୋଷଣ କରୁଥିବା ରମେଶ ଅଭିଯୋଗ କରିଛନ୍ତି। ସେହିପରି ଶ୍ରୀନଗରରେ ବଣିଆ କାମ କରୁଥିବା ଜଣେ ବ୍ୟକ୍ତି ତାଙ୍କ ୬ ଜଣିଆ ପରିବାର ସହ କୋଲକାତା ଫେରିବା ପାଇଁ ଜଣ ପିଛା ୨୫୦୦ ଟଙ୍କା ଲେଖାଏ ଭଡ଼ା ଗଣିଥିବା କହିଛନ୍ତି। ଉତ୍ତରପ୍ରଦେଶ ମୋରାଦାବାଦର ଶ୍ରମିକ ଜଫରୁଲ୍ଲାଙ୍କୁ ତାଙ୍କ ନିଯୁକ୍ତିଦାତା ମାତ୍ର ସପ୍ତାହକର ପାରିଶ୍ରମିକ ଦେଇଛନ୍ତି। ସେ ଅନ୍ୟମାନଙ୍କଠାରୁ ଟଙ୍କା ଉଦ୍ଧାର କରି ଉପତ୍ୟକା ଛାଡୁଥିବା କହିଛନ୍ତି। ଲୋକମାନେ ନିଜ ରାଜ୍ୟକୁ ଫେରିଯିବା ଲାଗି ରେଲଓ୍ବେ ସ୍ବତନ୍ତ୍ର ଟ୍ରେନ ସହ ଅତିରିକ୍ତ କୋଚ୍ ବ୍ୟବସ୍ଥା କରିଛି। ଏହାବ୍ୟତୀତ ପ୍ରତୀକ୍ଷାରତ ଯାତ୍ରୀଙ୍କ ପାଇଁ ଆଶ୍ରୟ, ଖାଦ୍ୟ, ପାଣିର ବ୍ୟବସ୍ଥା ହୋଇଥିବା ନର୍ଦ୍ଦର୍ନ ରେଲଓ୍ବେର ମୁଖ୍ୟ ପିଆର୍ଓ ଦୀପକ କୁମାର କହିଛନ୍ତି।
