ବଲାଙ୍ଗୀର ଅଫିସ, ୫ା୧: ବଲାଙ୍ଗୀର କୋଶଳ କଳାମଣ୍ଡଳ ପଡିଆରେ ଅନୁଷ୍ଠିତ ବିଂଶତିତମ ଲୋକଉତ୍ସବର ଦ୍ୱିତୀୟ ସନ୍ଧ୍ୟାରେ କଳାକାରମାନେ ଦର୍ଶକଙ୍କ ମନ ମୋହିଛନ୍ତି। ଅତିରିକ୍ତ ଜିଲାପାଳ ପରୀକ୍ଷିତ ସେଠୀଙ୍କ ସଭାପତିତ୍ୱରେ ଅନୁଷ୍ଠିତ ସାନ୍ଧ୍ୟ ଅଧିବେଶନରେ ମୁଖ୍ୟଅତିଥି ଭାବେ ପଶ୍ଚିମ ଓଡିଶା ବିକାଶ ପରିଷଦ ଅଧ୍ୟକ୍ଷ ସୁବାସ ଚୌହାନ ଯୋଗଦେଇ ବଲାଙ୍ଗୀରର କଳା, ସଂସ୍କୃତି ଅତି ଉଚ୍ଚକୋଟୀର ବୋଲି କହିଥିଲେ। କଳାକାରଙ୍କ କଳାସଂସ୍କୃତି ଭଳି ଅର୍ଥନୈତିକ ଦିଗରୁ ମଧ୍ୟ ବଲାଙ୍ଗୀରକୁ ସମୃଦ୍ଧ କରିବାକୁ ହେବ ବୋଲି ସେ କହିଥିଲେ। ସଭା ପ୍ରାରମ୍ଭରେ ସେ ଓରମାସ୍ ପକ୍ଷରୁ ଅନୁଷ୍ଠିତ ପଲ୍ଲୀଶ୍ରୀ ମେଳା ଓ ହସ୍ତତନ୍ତ ମେଳା ବୁଲି ଦେଖିଥିଲେ। ବିଶିଷ୍ଟ ସାରସ୍ବତ ସାଧକ ପ୍ରଫେସର ମଧୁସୂଦନ ପତି ସମ୍ମାନିତ ଅତିଥି ଭାବେ ଯୋଗଦେଇ କଳାକାରର ସରଳତା ଓ ନିଷ୍ଠାପରତାକୁ ଆମେ ଶିଖିପାରିଲେ ଲୋକଉତ୍ସବର ପରିକଳ୍ପନା ସଫଳ ହେବ ବୋଲି କହିଥିଲେ। ଅନ୍ୟତମ ଅତିଥି ଅବସରପ୍ରାପ୍ତ ଭାରତୀୟ ରାଜସ୍ବସେବା ଅଧିକାରୀ ତଥା ସ୍ତମ୍ଭକାର ଡ. ଶ୍ରୀକାନ୍ତ ଚଟାର୍ଜୀ ତାଙ୍କ ବକ୍ତବ୍ୟରେ କଳା ପ୍ରତି ନିଷ୍ଠା ଓ ତ୍ୟାଗ ହିଁ କଳାକାରକୁ ସଫଳତା ଆଣିଦିଏ ବୋଲି କହିଥିଲେ। ଚଳଚ୍ଚିତ୍ର ନିର୍ମାତା ତଥା ନିର୍ଦ୍ଦେଶକ ଜିତେନ୍ଦ୍ର ମିଶ୍ର ତାଙ୍କ ବକ୍ତବ୍ୟରେ ବଲାଙ୍ଗୀରର କଳା ସଂସ୍କୃତି ବିଶ୍ୱସ୍ତରରେ ପରିଚୟ ସୃଷ୍ଟି କରିପାରିଛି ବୋଲି କହିଥିଲେ ା ସଭାରେ ଦଣ୍ଡନୃତ୍ୟର ପ୍ରଖ୍ୟାତ୍ ଢ଼ୁଲିଆ ମଗ୍ସିର ନନ୍ଦଙ୍କୁ ଅତିଥିମାନେ ସମ୍ବର୍ଦ୍ଧିତ କରିଥିଲେ। ଅତିଥି କଳାକାର ଭାବେ ଦୁଷ୍ମନ୍ତ ପଟେଲ ମଞ୍ଚାସୀନ ଥିଲେ । କାର୍ଯ୍ୟକ୍ରମକୁ ଆନନ୍ଦଚନ୍ଦ୍ର ସାହୁ ପରିଚାଳନା କରିଥିଲେ ଓ ଶେଷରେ ପ୍ରଚାର ପ୍ରସାର କମିଟି ସହଅଧ୍ୟକ୍ଷ ଚିତ୍ତରଞ୍ଜନ ମିଶ୍ର ଧନ୍ୟବାଦ ଦେଇଥିଲେ। ସଭା ପ୍ରାରମ୍ଭରେ ଆକାଶବାଣୀ କଳାକାର ଦୀପ୍ତି ପ୍ରକାଶ ଦାସ, ଅପରୂପା ମହାନ୍ତି, କ୍ରିଷ୍ଣା ସାହୁ, ବର୍ଷା ବହିଦାର, ଗୀତିକାର ରତନ ପୂଜାରୀ ସଙ୍ଗୀତ ଗାନ କରିଥିଲେ। ପରେ ସାଂସ୍କୃତିକ ବିଚିତ୍ରା କାର୍ଯ୍ୟକ୍ରମରେ ପାର୍ବତୀଗିରି ବାଳନିକେତନ, ସୁରମନ୍ଦିର, ଇଜେଡ୍ସିସିରୁ କୋଲକତାର କଳାକାରମାନେ ଭାରତନାଟ୍ୟମ, ଟିଟିଲାଗଡର ଏକତାରା, ଆସାମର ଭୋରତାର ଡ୍ୟାନ୍ସ, ବଲାଙ୍ଗୀର ଦୁଲଦୁଲି କଳା ପରିଷଦ, ରୌଫ ଡ୍ୟାନ୍ସ, ଝୁମର, ଝାରଖଣ୍ଡ ଇଜେଡସିସିର ଶିକାରୀ ନୃତ୍ୟ, ଖୋର୍ଦ୍ଧା ପାଇକା ନୃତ୍ୟ ପ୍ରଦର୍ଶନ କରିଥିଲେ। ସେହିପରି ବ୍ଲକସ୍ତରୀୟ ଲୋକଉତ୍ସବରେ ପ୍ରଥମ ସ୍ଥାନ ଅଧିକାର କରିଥିବା ଲୋକନୃତ୍ୟ କଳାକାରମାନେ ନୃତ୍ୟ ପରିବେଷଣ କରିଥିଲେ ।