ନୂଆଦିଲ୍ଲୀ,୧୯ା୫(ପି.ଟି.): ପ୍ରାଣଘାତୀ କରୋନା ଭୂତାଣୁର ମୂଳ ଖୋଜି ବାହାର କରିବା ସହ ଏହି ସଙ୍କଟର ମୁକାବିଲା ଲାଗି ବିଶ୍ୱସ୍ତରରେ ନିଆଯାଇଥିବା ପଦକ୍ଷେପଗୁଡ଼ିକର ନିରପେକ୍ଷ ତଥା ବିସ୍ତୃତ ମୂଲ୍ୟାୟନ ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ)ର ଗୁରୁତ୍ୱପୂର୍ଣ୍ଣ ସମ୍ମିଳନୀରେ ଭାରତ ସମେତ ୧୨୦ ରାଷ୍ଟ୍ର ପକ୍ଷରୁ ଦାବି ହୋଇଛି। ଅନ୍ତର୍ଜାତୀୟ ଚାପ ବଢ଼ିବାରୁ ଚାଇନା କୋଭିଡ୍-୧୯ ଭୂତାଣୁର ଉତ୍ସ ଖୋଜି ବାହାର କରିବା ଦିଗରେ ତଦନ୍ତ ପାଇଁ ରାଜି ହୋଇଛି। କୋଭିଡ୍-୧୯ ସଂକ୍ରମଣ ଆରମ୍ଭ ହେବା ଦିନରୁ ଚାଇନା ନିଷ୍କପଟତା ଓ ସ୍ବଚ୍ଛତାର ସହ କାର୍ଯ୍ୟ କରିଆସିଛି ବୋଲି ବିଶ୍ୱ ସ୍ବାସ୍ଥ୍ୟ ସମ୍ମିଳନୀରେ ଚାଇନା ରାଷ୍ଟ୍ରପତି ଜି ଜିନ୍ପିଙ୍ଗ କହିଛନ୍ତି।
ଚାଇନାର ଉହାନ ସହରରେ କରୋନା ଭୂତାଣୁ କିପରି ସୃଷ୍ଟି ହେଲା ଏବଂ ଏହା ଜଣାପଡ଼ିବା ପରେ ବେଜିଂ କ’ଣ ପଦକ୍ଷେପ ନେଇଥିଲା ତାହାର ତଦନ୍ତ କରାଯାଉ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ସମେତ ବିଭିନ୍ନ ରାଷ୍ଟ୍ର ପକ୍ଷରୁ ଦାବି ହୋଇଛି। ଏହାକୁ ଦୃଷ୍ଟିରେ ରଖି ଡବ୍ଲ୍ୟୁଏଚ୍ଓର ଦୁଇଦିନିଆ ବିଶ୍ୱ ସ୍ବାସ୍ଥ୍ୟ ସମ୍ମିଳନୀ ସୋମବାର ଆରମ୍ଭ ହୋଇଛି। ଅନ୍ୟପକ୍ଷରେ ତାଇଓ୍ବାନକୁ ଡବ୍ଲ୍ୟୁଏଚ୍ଓରେ ସାମିଲ କରିବା ପାଇଁ ଟ୍ରମ୍ପ୍ ପ୍ରଶାସନ ଚାପ ପକାଉଥିବାବେଳେ ଚାଇନା ଏହାକୁ ଜୋର୍ଦାର ବିରୋଧ କରିଛି। ତାଇଓ୍ବାନ ଚାଇନାର ଅଂଶବିଶେଷ ବୋଲି ବେଜିଂ ଦାବି କରିଆସୁଛି।
କରୋନା ମହାମାରୀରେ ୩,୧୦,୦୦୦ରୁ ଊର୍ଦ୍ଧ୍ୱ ଲୋକଙ୍କ ଜୀବନ ଗଲାଣି। ସାରା ବିଶ୍ୱରେ ପାଖାପାଖି ୪୭ ଲକ୍ଷ ଏହି ରୋଗରେ ଆକ୍ରାନ୍ତ ହୋଇଛନ୍ତି। ତେଣୁ ଏହି ମହାମାରୀର ମୁକାବିଲା ପାଇଁ ବିଶ୍ୱ ସ୍ବାସ୍ଥ୍ୟ ସମ୍ମିଳନୀରେ ଅତିରିକ୍ତ ସମ୍ବଳ ଯୋଗାଡ଼ ଲାଗି ପଦକ୍ଷେପ ନିଆଯାଇପାରେ ବୋଲି ଆଶା କରାଯାଉଛି। କୋଭିଡ୍-୧୯ ପ୍ରତି ଡବ୍ଲ୍ୟୁଏଚ୍ଓ ସମନ୍ବୟରେ ଅନ୍ତର୍ଜାତୀୟ ପଦକ୍ଷେପର ସ୍ବାଧୀନ, ନିରପେକ୍ଷ ତଥା ବିସ୍ତୃତ ମୂଲ୍ୟାୟନ ଲାଗି ୟୁରୋପୀୟ ସଂଘ ଆଣିଥିବା ଚିଠା ପ୍ରସ୍ତାବକୁ ଶତାଧିକ ରାଷ୍ଟ୍ର ସମର୍ଥନ କରିଛନ୍ତି। ତେବେ ଏହି ପ୍ରସ୍ତାବରେ ଚାଇନା ନାଁ ନାହିଁ। କରୋନା ମହାମାରୀ ଗତବର୍ଷ ଡିସେମ୍ବରରେ ପ୍ରଥମେ ଚାଇନାର ଉହାନ ସହରରୁ ଆରମ୍ଭ ହୋଇ ବିଶ୍ୱର ୨୦୦ରୁ ଅଧିକ ଦେଶକୁ ବ୍ୟାପିଛି।
