ନୂଆଦିଲ୍ଲୀ, ୨୮ା୨ (ପି.ଟି.)-କରୋନା ଭାଇରସ ସଂକ୍ରମଣର ଆଶଙ୍କା ଦର୍ଶାଇ ଆସନ୍ତା ମାସରେ ସାଇପ୍ରସରେ ହେବାକୁଥିବା ଶୁଟିଂ ବିଶ୍ୱକପ୍ରୁ ଭାରତ ଓହରିଯାଇଛି। ଇଣ୍ଟରନ୍ୟାଶନାଲ ଶୁଟିଂ ସ୍ପୋଟର୍ସ ଫେଡେରେଶନ (ଆଇଏସ୍ଏସ୍ଏଫ୍) ଦ୍ୱାରା ସ୍ବୀକୃତି ପ୍ରାପ୍ତ ଏହି ଶଟ୍ଗନ୍ ବିଶ୍ୱକପ୍ ନିକୋସିଆରେ ମାର୍ଚ୍ଚ ୪ରୁ ୧୩ ପର୍ଯ୍ୟନ୍ତ ହେବ। ସରକାରଙ୍କ ପରାମର୍ଶକ୍ରମେ ଭାରତୀୟ ଦଳ ଟୁର୍ନାମେଣ୍ଟର ଓହରିଯାଇଥିବା ନ୍ୟାଶନାଲ ରାଇଫଲ ଆସୋସିଏଶନ ଅଫ୍ ଇଣ୍ଡିଆ (ଏନ୍ଆର୍ଏଆଇ) ସୂତ୍ରରୁ ପ୍ରକାଶ। ଚାଇନାର ଉହାନ ସହର ହେଉଛି ଘାତକ କରୋନା ଭାଇରସର ଉତ୍ପତି ସ୍ଥଳ। ଏହି ଭାଇରସ ଦ୍ୱାରା ପ୍ରାୟ ୩୦୦୦ ଲୋକ ପ୍ରାଣ ହରାଇଥିବାବେଳେ ସମଗ୍ର ବିଶ୍ୱରେ ୮୦,୦୦୦ ପାଖାପାଖି ଲୋକ ଆକ୍ରାନ୍ତ ହୋଇଛନ୍ତି। ସାଇପ୍ରସରେ କୌଣସି ଲୋକ ଏପର୍ଯ୍ୟନ୍ତ ମୃତ୍ୟୁ ବରଣ କରିଥିବା ସଷ୍ଟ ହୋଇ ନାହିଁ। ତେବେ ପ୍ରତିଷେଧମୂଳକ ପଦକ୍ଷେପ ସ୍ବରୂପ କେତେଜଣଙ୍କର ଚିକିତ୍ସା ଚାଲିଛି। କରୋନା ଭାଇରସ ଆତଙ୍କ ଯୋଗୁ ସମଗ୍ର ବିଶ୍ୱରେ ବହୁ ପ୍ରମୁଖ କ୍ରୀଡ଼ା ଇଭେଣ୍ଟକୁ ସ୍ଥଗିତ ରଖାଯାଇଛି ଅବା ବାତିଲ କରାଯାଇଛି। ଜାପାନ ଓ ଇଟାଲୀ ବ୍ୟତୀତ ଅନ୍ୟ କେତେକ ଦେଶରେ ବହୁ ଫୁଟ୍ବଲ ମ୍ୟାଚ ଏଥିରେ ପ୍ରଭାବିତ ହୋଇଛି। ବକ୍ସିଂ ଅଲିମ୍ପିକ କ୍ୱାଲିଫାୟର୍ସ ସମେତେ କେତେକ ବ୍ୟାଡମିଣ୍ଟନ ଟୁର୍ନାମେଣ୍ଟ ଓ ଆର୍ଚେରୀ ଇଭେଣ୍ଟକୁ ମଧ୍ୟ ସ୍ଥଗିତ ରଖାଯାଇଛି। ୟୁରୋପା ଲିଗ୍ ସମେତ ଅନ୍ୟ କେତେକ ମ୍ୟାଚ ବିନା ଦର୍ଶକରେ ରୁଦ୍ଧଦ୍ୱାରରେ ଖେଳାଯାଉଛି। ଅଲିମ୍ପିକ କ୍ୱାଲିଫାୟର୍ସ ଉହାନରୁ ଜୋର୍ଡାନକୁ ସ୍ଥାନାନ୍ତର କରାଯାଇଛି। ମାରାତ୍ମକ କରୋନା ଭାଇରସ ପାଇଁ ନୂଆଦିଲ୍ଲୀରେ ହେବାକୁ ଥିବା ଶୁଟିଂ ବିଶ୍ୱକପ୍ ମଧ୍ୟ ପ୍ରଭାବିତ ହୋଇଛି। ଚାଇନା, ତାଇଓ୍ବାନ, ହଂକଂ, ମାକାଉ, ଉତ୍ତର କୋରିଆ, ତୁର୍କମେନିସ୍ତାନ ଏବଂ ବାହାରିନ୍ରେ ଏହି ଭାଇରସର ପ୍ରକୋପ ଦେଖା ଦେଇଥିବାରୁ ସେମାନେ ଶୁଟିଂ ବିଶ୍ୱକପ୍ରୁ ଓହରିଯାଇଛନ୍ତି।
