ଓ୍ବାଶିଂଟନ,୧୪।୫: ପୃଥିବୀରେ କରୋନା ସଂକ୍ରମଣ ଯୋଗୁ ସଙ୍କଟ ଦେଖାଦେଇଛି। ସଂକ୍ରମଣରୁ ଦୂରେଇ ରହିବା ଲାଗି ସମସ୍ତ ଦେଶ ଏକଜୁଟ ହୋଇ ଲଢ଼େଇ ଜାରି ରଖିଛନ୍ତି। ତେବେ କରୋନା ପରେପରେ ଆମାଜନର ଜଙ୍ଗଲରେ ଏକ ନୂଆ ମାରାତ୍ମକ ରୋଗ ଦେଖାଯିବାର ଆଶଙ୍କା ରହିଛି। ଏନେଇ ବ୍ରାଜିଲ୍ର ପରିବେଶବିଜ୍ଞାନୀ ଡେଭିଡ୍ ଲାପୋଲା ସତର୍କ ସୂଚନା ଦେଇଛନ୍ତି। ଆମାଜନ ଜଙ୍ଗଲରେ ବ୍ୟାପକ ଜଙ୍ଗଲ କଟା ହେଉଥିବାରୁ ଏଭଳି ସ୍ଥିତି ଦେଖାଯିବ। ଏଠାରେ ଜଙ୍ଗଲ କଟାଯାଇ ସହରୀକରଣ ଜାରି ରହିଛି। ଫଳରେ ଆଗାମୀ ଦିନରେ ଜୁନୋଟିକ୍ ରୋଗ ଦେଖାଯିବାର ଯଥେଷ୍ଟ ଆଶଙ୍କା ରହିଥିବା ଲାପୋଲା କହିଛନ୍ତି। ଏହି ରୋଗର ସଂକ୍ରମଣ ପ୍ରାଣୀଙ୍କଠାରୁ ମଣିଷଙ୍କୁ ହେବ। ଆନ୍ଥାକ୍ସ୍, ଆସକାରିଆସିସ୍ ଭଳି ରୋଗ ଏହି ଶ୍ରେଣୀଭୁକ୍ତ। ଆମାଜନ ଜଙ୍ଗଲରେ ଏଭଳି ରୋଗ ଆଣୁଜୀବ ଭରି ରହିଛି। ଇତିମଧ୍ୟରେ ଏଠାରେ ୮୫ ପ୍ରତିଶତ ଜଙ୍ଗଲ କଟାଯାଇଥିବା ଲାପୋଲା କହିଛନ୍ତି। କରୋନା ସଂକ୍ରମଣ ଯୋଗୁ ପୃଥିବୀରେ ଲକ୍ଡାଉନ୍ ଜାରି ରହିଥିବାବେଳେ ଗତ ୪ ମାସ ମଧ୍ୟରେ ସର୍ବାଧିକ ୧୨୦୨ ବର୍ଗ କିଲୋମିଟର ଜଙ୍ଗଲ କଟାଯାଇଛି। ଜଙ୍ଗଲରେ ମଣିଷଙ୍କ ଅବାଧ ପ୍ରବେଶ ଯୋଗୁ ଜୁନୋଟିକ୍ ସଂକ୍ରମଣ ଆଶଙ୍କା ବୃଦ୍ଧି ପାଇଛି। ମଣିଷର ଏଭଳି କାର୍ଯ୍ୟ ଯୋଗୁ ଏଚ୍ଆଇଭି, ଇବୋଲା ଏବଂ ଡେଙ୍ଗୁ ଆଦି ରୋଗ ବ୍ୟାପିଥିବା ସେ କହିଛନ୍ତି। ଦ୍ରୁତ ସହରୀକରଣ ଏବଂ ବ୍ୟାପକ ଜଙ୍ଗଲକଟା ଯୋଗୁ ଦକ୍ଷିଣ ଏସିଆ ଏବଂ ଆଫ୍ରିକାରେ ପୂର୍ବରୁ ଏଭଳି ରୋଗ ସୃଷ୍ଟି ହୋଇଥିଲା। ଆମାଜନରେ ଲାଗି ରହିଥିବା ଜଙ୍ଗଲକଟା ଯୋଗୁ ଆଗାମୀ ଦିନରେ ବର୍ଷାର ପରିମାଣ ମଧ୍ୟ କମିଯିବାର ଆଶଙ୍କା ଥିବା ସେ କହିଛନ୍ତି।
