ରାୟଗଡ଼ା ଅଫିସ,୪।୪: ରାୟଗଡ଼ା ଜିଲା କାଶୀପୁର ବ୍ଲକର ଜଣେ ଯୁବକ କେରଳରେ କାମ କରୁଥିଲେ। କରୋନା ପାଇଁ ଲକ୍ ଡାଉନ୍ ପରେ ଗାଡ଼ି ଚଳାଚଳ ବନ୍ଦ ହେବାରୁ ସେ ଆସିପାରୁ ନ ଥିଲେ। ପରେ ଏକ ମାଲଗାଡ଼ି ଯୋଗେ ଯୁବକ ଜଣକ ରାୟଗଡ଼ାରେ ପହଂଚି ଥିଲେ। ଶୁକ୍ରବାର ରାୟଗଡ଼ାରୁ ଲିଫ୍ଟ ମାଗି ସେ ଶିକରପାଇ ଆସିଥିଲେ। ସେଠାରେ ସ୍ଥାନୀୟ ପୋଲିସ ଜାଣିପାରି ତାଙ୍କୁ କାବୁ କରି କଲ୍ୟାଣସିଂପୁର ପୋଲିସକୁ ଜଣାଇଥିଲା। ରାୟଗଡ଼ାରୁ ମେଡିକାଲ ଟିମ ଯାଇ ଯୁବକଙ୍କୁ ଉଦ୍ଧାର କରି ରାୟଗଡା ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। କିନ୍ତୁ ଶନିବାର ସକାଳୁ ପରୀକ୍ଷା ପାଇଁ ତାଙ୍କ ରକ୍ତ ନମୁନା ଆଣିବା ପାଇଁ ଯିବାବେଳେ ଯୁବକ ଜଣକ ସେଠାରୁ ଖସିଯାଇଥିବା ଜଣାପଡ଼ିଥିଲା। ରାୟଗଡା ସିଡିଏମ୍ଓ ଖବର ଦେବା ପରେ ପୋଲିସ ମାମଲା ରୁଜୁକରି ତଦନ୍ତ ଚଳାଇଥିଲା। ଏସଡିପିଓ ତପନ ନାରାୟଣ ରଥଙ୍କ ସୂଚନା ଅନୁଯାୟୀ, ଉକ୍ତ ଯୁବକଙ୍କୁ ଶିକରପାଈ ନିକଟସ୍ଥ ବାଲିକଣା ଗ୍ରାମରୁ ଉଦ୍ଧାର କରାଯାଇଛି।
