ଲଣ୍ଡନ,୧୪।୭(ଏଏଫପି)- ବର୍ଷର ତୃତୀୟ ଗ୍ରାଣ୍ଡସ୍ଳାମ ଟୁର୍ନାମେଣ୍ଟ ଓ୍ବିମ୍ବେଲଡନ ଟେନିସ ଟୁର୍ନାମେଣ୍ଟର ପୁରୁଷ ସିଙ୍ଗଲ୍ସ ଫାଇନାଲ ମୁକାବିଲା ରବିବାର ଖେଳାଯିବ। ଟାଇଟଲ ପାଇଁ ଏହି ଫାଇନାଲ ମ୍ୟାଚ୍ରେ ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ସୁଇଜରଲାଣ୍ଡର ରୋଜର ଫେଡରର ଓ ସର୍ବିୟାର ନୋଭାକ ଜୋକୋଭିଚ୍ ପରସ୍ପରକୁ ଭେଟିବେ। ପୂର୍ବରୁ ୮ଥର ଓ୍ବିମ୍ବେଲଡନ ଟାଇଟଲ ଜିତିଥିବା ଫେଡରର ଏଥର ସଫଳ ହେଲେ ବୟୋଜ୍ୟେଷ୍ଠ ଖେଳାଳି ଭାବେ ଚାମ୍ପିୟନ ହେବାର ଗୌରବ ଅର୍ଜନ କରିବେ। ୩୭ ବର୍ଷୀୟ ଫେଡରର ଏଥିସହିତ ମୋଟ ଉପରେ ୨୧ତମ ଗ୍ରାଣ୍ଡସ୍ଲାମ ଟାଇଟଲ ହାସଲ କରିବେ। ଅନ୍ୟପଟେ ୪ଥର ଓ୍ବିମ୍ବେଲଡନ ଚାମ୍ପିୟନ ଜୋକୋଭିଚ୍ ଏଥର ମଧ୍ୟ ବାଜି ମାରି ଟାଇଟଲ ବଜାୟ ରଖିବା ଲକ୍ଷ୍ୟରେ ରହିଛନ୍ତି। କ୍ୟାରିୟରରେ ଗତ ୧୩ ବର୍ଷ ମଧ୍ୟରେ ଉଭୟ ଖେଳାଳି ୪୭ଥର ପରସ୍ପରକୁ ଭେଟିଛନ୍ତି। ଏଥିରେ ଜୋକୋଭିଚ୍ ୨୫ଥର ଓ ଫେଡରର ୨୨ଥର ବିଜୟୀ ହୋଇଛନ୍ତି। ଗତ ୨୦ଟି ମ୍ୟାଚ୍ରେ ଜୋକୋଭିଚ୍ ୧୪ଥର, ସେହିପରି ଗତ ୧୦ଟି ମୁକାବିଲାରେ ୮ଥର ବିଜୟୀ ହୋଇଛନ୍ତି। ଫଳରେ ରେକର୍ଡ ଦୃଷ୍ଟିକୋଣରୁ ଜୋକୋଭିଚ୍ ଆଗରେ ରହିଛନ୍ତି। ଗ୍ରାଣ୍ଡସ୍ଲାମ୍ରେ ଗତ ୪ଟି ମୁକାବିଲାରେ ଫେଡରର ସବୁଥିରେ ପରାସ୍ତ ହୋଇଛନ୍ତି। ତେବେ ୨୦୧୨ ଓ୍ବିମ୍ବେଲଡ଼ନ ଫାଇନାଲରେ ଫେଡରର ୪ ସେଟ୍ରେ ଜୋକୋଭିଚ୍ଙ୍କୁ ହରାଇଥିଲେ। ଆସନ୍ତା ମାସରେ ୩୮ବର୍ଷରେ ପଦାର୍ପଣ କରିବାକୁ ଯାଉଥିବା ଫେଡରର ଫାଇନାଲରେ ବିଜୟୀ ହେବେ ବୋଲି ଆଶାପ୍ରକାଶ କରିଛନ୍ତି। ଦ୍ୱାଦଶଥର ପାଇଁ ଓ୍ବିମ୍ବେଲଡନ ଫାଇନାଲ ଖେଳିବାକୁ ଯାଉଥିବା ଫେଡରର ଜୋକୋଭିଚଙ୍କୁ ଜଣେ ଚମତ୍କାର ଟେନିସ ଖେଳାଳି ବୋଲି କହିଛନ୍ତି। ଜୋକୋଭିଚ୍ ମଧ୍ୟ ୧୫ଥର ଗ୍ରାଣ୍ଡସ୍ଲାମ ଟାଇଟଲ ଜିତିଛନ୍ତି। ଫାଇନାଲରେ ବିଜୟୀ ହୋଇ ଯିଏବି ଚାମ୍ପିୟନ ହୁଅନ୍ତୁ ନା କାହିଁକି ବିଶ୍ୱ ଟେନିସ୍ରେ ଏବେ ‘ବିଗ୍ ଥ୍ରୀ’ ଅର୍ଥାତ ଫେଡରର, ଜୋଭୋଭିଚ୍ ଓ ନାଡାଲଙ୍କ ପ୍ରଭାବ ଜାରି ରହିଛି ବୋଲି ଧରି ନେବାକୁ ହେବ। ଏହି ୩ ଖେଳାଳି ଗତ ୧୧ଟି, ଗତ ୧୭ଟିରୁ ୧୫ଟି ଓ ୬୫ଟିରୁ ୫୪ଟି ମେଜର ଟାଇଟଲ ଜିତିଛନ୍ତି। ଉଲ୍ଲେଖଥାଉକି, ଶୁକ୍ରବାର ସେମିଫାଇନାଲରେ ଟପ୍ ସିଡ୍ ଜୋକୋଭିଚ୍ ୨୩ତମ ସିଡ ସ୍ପେନର ରୋବେର୍ଟୋ ବାତିସ୍ତା ଅଗୁଟଙ୍କୁ ୬-୨, ୪-୬, ୬-୩, ୬-୨ ସେଟରେ, ଫେଡରର ୭-୬, ୧-୬, ୬-୩, ୬-୪ ସେଟରେ ସ୍ପେନର ତୃତୀୟ ସିଡ ଖେଳାଳି ରାଫାଲ ନାଡ଼ାଲଙ୍କୁ ହରାଇ ଫାଇନାଲକୁ ଉଠିଥିଲେ।
