ମୁମ୍ବାଇର ଏକ ଧନୀ ପରିବାରରେ ୧୨ ଅକ୍ଟୋବର ୧୯୧୧ରେ ଜନ୍ମଗ୍ରହଣ କରିଥିଲେ ଭାରତୀୟ କ୍ରିକେଟର ବିଜୟ ମର୍ଚ୍ଚାଣ୍ଟ। ପିଲାଦିନେ ତାଙ୍କ ଘରେ ନାଁ ଦେଇଥିଲେ ବିଜୟ ଠାକ୍ରେ। କିନ୍ତୁ ସ୍କୁଲରେ ପଢ଼ିବାବେଳେ ତାଙ୍କ ନାଁ ଠାକ୍ରେରୁ ମର୍ଚ୍ଚାଣ୍ଟ କରାଯାଇଥିଲା। ତାଙ୍କୁ ଭାରତ ବ୍ରାଡ୍ମ୍ୟାନ୍ କୁହାଯାଉଥିଲା। ବୋଲର୍ମାନେ ତାଙ୍କୁ ବୋଲିଂ କରିବାକୁ ଭୟ କରୁଥିଲେ। ଇଂଲଣ୍ଡ ବିପକ୍ଷରେ ସେ ନିଜ ଅନ୍ତର୍ଜାତୀୟ କ୍ରିକେଟ୍ କ୍ୟାରିୟର ଆରମ୍ଭ କରିଥିଲେ। ମର୍ଚ୍ଚାଣ୍ଟ ଭାରତ ପାଇଁ ମାତ୍ର ୧୦ଟି ଟେଷ୍ଟ ଖେଳି ୪୭.୭୨ ହାରରେ ମୋଟ ୮୫୯ ରନ୍ କରିଥିଲେ। ସେଥିରେ ୩ଟି ଶତକ ଏବଂ ୩ଟି ଅର୍ଦ୍ଧଶତକ ସାମିଲ ଥିଲା। ଇଂଲଣ୍ଡ ଦଳ ପ୍ରଥମଥର ପାଇଁ ଭାରତ ଗସ୍ତରେ ଆସିଥିବାବେଳେ ମର୍ଚ୍ଚାଣ୍ଟଙ୍କୁ ଭାରତୀୟ ଦଳରେ ସାମିଲ କରାଯାଇଥିଲା। ସେତେବେଳେ ସ୍ବାଧୀନତା ପାଇଁ ଲଢୁଥିବା ମହାତ୍ମା ଗାନ୍ଧୀଙ୍କ ସମେତ ଅନେକ ସଂଗ୍ରାମୀଙ୍କୁ ଇଂରେଜମାନେ ଜେଲରେ ଭର୍ତ୍ତି କରିଦେଇଥିଲେ। ଏହାକୁ ବିରୋଧ କରି ବିଜୟ ମର୍ଚ୍ଚାଣ୍ଟ ଇଂଲଣ୍ଡ ଦଳ ବିପକ୍ଷରେ ଖେଳିବାକୁ ମନା କରିଦେଇଥିଲେ। ଏହାର ୪ ବର୍ଷ ପରେ ଅର୍ଥାତ୍ ୧୯୩୩-୩୪ରେ ଭାରତୀୟ ଦଳ ଇଂଲଣ୍ଡ ଗସ୍ତରେ ଯାଇଥିବାବେଳେ ମର୍ଚ୍ଚାଣ୍ଟ ଟିମ୍ ସହ ଯାଇଥିଲେ। ମାତ୍ର ୨୨ ବର୍ଷ ବୟସରେ ସେ ଦଳ ପାଇଁ ପ୍ରଥମ ମ୍ୟାଚ୍ ଖେଳିଥିଲେ। ଜୀବନର ଦ୍ୱିତୀୟ ମ୍ୟାଚ୍ରେ ସେ ଇଂଲଣ୍ଡ ବିପକ୍ଷରେ ମାଞ୍ଚେଷ୍ଟରରେ ଶତକ ଅର୍ଜନ କରିଥିଲେ। ବିଜୟଙ୍କ ଏହି ବିଜୟ ଦେଖି ଇଂଲଣ୍ଡ କ୍ରିକେଟର ସିବି ଫ୍ରାଇ କହିଥିଲେ, ଚାଲ ବିଜୟଙ୍କ ରଙ୍ଗ ବଦଳାଇ ତାଙ୍କୁ ଇଂଲଣ୍ଡ ଦଳକୁ ନେଇଆସିବା।
