କଟକ ଅଫିସ,୧ା୬: ଏସ୍ସିବି ଟ୍ରମା ଆଇସିୟୁ ଏବେ ଡାକ୍ତର ଶୂନ୍ୟ। ଟ୍ରମା ଆଇସିୟୁ ପାଇଁ ନିଯୁକ୍ତ ୪ ଜଣ ଠିକା ଡାକ୍ତର ଚାକିିରିରୁ ଇସ୍ତଫା ଦେଇ ପଳାଇଛନ୍ତି। ଫଳରେ ଟ୍ରମା ଆଇସିୟୁକୁ ନେଇ ଅଡୁଆ ପରିସ୍ଥିତି ଉପୁଜିଛି। ମେଡିକାଲର ଅନ୍ୟ ଡାକ୍ତରଙ୍କ ଦ୍ୱାରା ଏହାକୁ ପରିଚାଳନା କରାଯାଉଛି। ଖୁବ୍ଶୀଘ୍ର ଟ୍ରମା ଆଇସିୟୁ ପାଇଁ ଡାକ୍ତର ନିଯୁକ୍ତି ହେବେ ବୋଲି ଏସ୍ସିବି ଅଧୀକ୍ଷକ ପ୍ରଫେସର ଡା. ସିବିକେ ମହାନ୍ତି କହିଛନ୍ତି। ସୂଚନାଥାଉ କି, ୨୦୧୧ରେ କେନ୍ଦ୍ରୀୟ ଅନୁଦାନରେ ଏସ୍ସିବିରେ ଟ୍ରମା କେୟାର ସେଣ୍ଟର ଖୋଲିଥିଲା। ଦୁର୍ଘଟଣାର ଶିକାର ହୋଇଆସୁଥିବା ରୋଗୀମାନଙ୍କୁ ଚିକିତ୍ସା ଯୋଗାଇବା ନିମନ୍ତେ କେନ୍ଦ୍ର ସରକାର ଏହି ୟୁନିଟ୍ ଖୋଲିଥିଲେ। ପ୍ରଥମ ୫ ବର୍ଷ କେନ୍ଦ୍ର ସରକାରଙ୍କ ଅନୁଦାନରେ ଏହି ୟୁନିଟ୍ ଚାଲିଥିବା ବେଳେ ପରବର୍ତ୍ତୀ ଅବସ୍ଥାରେ ଏହା ରାଜ୍ୟ ସରକାରଙ୍କ ଅନୁଦାନରେ ଚାଲିବ ବୋଲି ବ୍ୟବସ୍ଥା ହୋଇଥିଲା। ସମ୍ପ୍ରତି ୪୪ଟି ସାଧାରଣ ବେଡ୍ ଓ ୧୪ଟି ଆଇସିୟୁ ବେଡ୍କୁ ନେଇ ଟ୍ରମା କେୟାର ୟୁନିଟ୍ କାର୍ଯ୍ୟ କରୁଛି। ଗତବର୍ଷ ଟ୍ରମା କେୟାର ୟୁନିଟ୍ ପାଇଁ ୮ ଜଣ ଡାକ୍ତରଙ୍କୁ ଠିକା ଭିତ୍ତିରେ ନିଯୁକ୍ତି ଦିଆଯାଇଥିବା ବେଳେ ସେଥିରୁ ୪ ଜଣ କାର୍ଯ୍ୟରେ ଯୋଗଦେଇଥିଲେ। ମାତ୍ର ସମ୍ପ୍ରତି ପବ୍ଲିକ ସର୍ଭିସ କମିଶନ ବିଜ୍ଞପ୍ତି ପ୍ରକାଶ ପାଇବା ପରେ ୪ ଜଣ ଯାକ ଡାକ୍ତର ଚାକିରି ଛାଡ଼ି ଚାଲି ଯାଇଥିବା ଜଣାପଡ଼ିଛି।
