ନୂଆଦିଲ୍ଲୀ,୨୧।୫: ଯେଉଁଭଳି ଭାବେ ଜର୍ମାନୀରେ ଜର୍ମାନ ସମୟ ନିର୍ଦ୍ଧାରିତ ହୋଇଛି, ସେହିଭଳି ଭାରତରେ ମଧ୍ୟ ନିର୍ଦ୍ଧାରିତ ସମୟର ବ୍ୟବହାର କରାଯିବ। ଦେଶରେ ଭାରତୀୟ ସମୟକୁ ବ୍ୟବହାର କରିବାକୁ ଏକ ଆଇନ ପ୍ରସ୍ତୃତ କରାଯିବ। ଏହାପରେ ଦେଶର ଏକ ସ୍ବତନ୍ତ୍ର ସମୟ ହେବ ବୋଲି ସୂଚନା ମିଳିଛି। ନ୍ୟାଶନାଲ ଫିଜିକାଲ ଲାବ୍ରୋଟୋରୀ (ଏନ୍ପିଏଲ୍) ଏବେ ରେଲଓ୍ବେଠାରୁ ଆରମ୍ଭ କରି ବ୍ୟାକିଂ ସେକ୍ଟର ପର୍ଯ୍ୟନ୍ତ ସମସ୍ତଙ୍କୁ ଏକ ନିର୍ଦ୍ଧାରିତ ସମୟର ସୂଚନା ଦେବ। ଏନ୍ପିଏଲ୍ର ନିର୍ଦ୍ଦେଶକ ଡାକ୍ତର ଦିନେଶ କୁମାର ଅସବାଲ ସୋମବାର ଏନେଇ ସୂଚନା ଦେଇଛନ୍ତି। ସରକାର ଦେଶରେ ସବୁ ଉଦ୍ଦେଶ୍ୟ ପାଇଁ ବ୍ୟବହୃତ ହେଉଥିବା ସମୟକୁ ଏନ୍ପିଏଲ୍ର ଘଡ଼ିକୁ ଅନୁରୂପ କରିବା ପାଇଁ ଯୋଜନା କରୁଛନ୍ତି। ଏନ୍ପିଏଲ୍ର ସମୟ ଅନ୍ତରାଷ୍ଟ୍ରୀୟ ସମୟ ତୁଳନାରେ ୨.୭ ନେନୋ ସେକେଣ୍ଡ ଥିବା ଜଣାପଡ଼ିଛି। ଏବେ ଦେଶର ନିର୍ଦ୍ଧାରିତ ସମୟକୁ ଆକାଶବାଣୀ ଓ ଦୂରଦର୍ଶନ ଦ୍ୱାରା ଲୋକଙ୍କ ପାଖରେ ପହଞ୍ଚାଯାଉଛି। ସରକାରଙ୍କ ଯୋଜନା ପୁରା ଦେଶରେ କେବଳ ଗୋଟିଏ ସମୟକୁ ବ୍ୟବହାର କରିବା, ଯାହା ଭାରତର ସ୍ବତନ୍ତ୍ର ସମୟ ହେବ। ଏହାକୁ ବାଧ୍ୟତାମୂଳକ ବ୍ୟବହାର କରିବା ପାଇଁ ସରକାର ଶୀଘ୍ର ସଂସଦରେ ଏକ ବିଲ ପାସ୍ କରିବେ। ଏହି ମାମଲାରେ ଉପଭୋକ୍ତାଙ୍କ ମନ୍ତ୍ରଣାଳୟର ଅଧିକାରୀଙ୍କ ସହ ଆଲୋଚନା ଜାରି ରହିଛି। ଇସ୍ରୋ ନିଜର ଉତ୍କ୍ଷେପଣରେ ଏହାର ବ୍ୟବହାର ଆରମ୍ଭ କରିଦେଇଥିବା ଜଣାପଡ଼ିଛି। ଡିଜିଟାଲ ନେଣଦେଣରେ ସାଇବର ସୁରକ୍ଷା ପାଇଁ ନିର୍ଦ୍ଧାରିତ ସମୟର ସୂଚନା ଜରୁରୀ ହୋଇଥାଏ। ବହୁ ବିକଶିତ ଦେଶରେ ସେମାନଙ୍କ ସ୍ଥାନୀୟ ସମୟ ହଁି ଏକମାତ୍ର ନିର୍ଦ୍ଧାରିତ ସମୟ ହୋଇଥାଏ। ଏହି ପରିପ୍ରେକ୍ଷୀରେ ଜର୍ମାନୀରେ ଏକ ନିର୍ଦ୍ଧାରିତ ସମୟ ରହିଛି। ସେଠାକାର ଲୋକମାନେ ଅନ୍ୟ କୌଣସି ସମୟକୁ ବ୍ୟବହାର କରିପାରିବେ ନାହିଁ। ଭାରତରେ ଏବେ ଅଧିକାରିକ ସମୟ ଅଛି, ହେଲେ ଏବେ ଏହାକୁ ନିର୍ଦ୍ଧାରିତର ମାନ୍ୟତା ଦିଆଯାଇନାହିଁ। ଏହି କାରଣ ଯୋଗୁ ଆମେମାନେ କୌଣସି ସମୟକୁ ବ୍ୟବହାର କରିବାର ସ୍ବାଧୀନତା ରହିଛି।
