ଅକ୍ଷୟ କୋଠାଓ୍ବାଲେ ପେସାରେ ଅଟୋ ଚାଳକ। ହେଲେ ଲକ୍ଡାଉନରେ ଦୈନିକ ୩୫୦ରୁ ଊର୍ଦ୍ଧ୍ୱ ଲୋକଙ୍କୁ ଖାଇବାକୁ ଦେଉଛନ୍ତି। ୩୦ ବର୍ଷୀୟ ଅକ୍ଷୟ ତାଙ୍କ ବାହାଘର ଲାଗି ସଞ୍ଚିତ ଅର୍ଥକୁ ଏଥିରେ ବ୍ୟୟ କରୁଛନ୍ତି। ସେ ଅଟୋରେ ବରିଷ୍ଠ ନାଗରିକ ଓ ଗର୍ଭବତୀମାନଙ୍କୁ ଡାକ୍ତରଙ୍କ ପାଖକୁ ମାଗଣାରେ ନେଉଛନ୍ତି। ଅକ୍ଷୟ ରୁହନ୍ତି ପୁଣେରେ। ମେ’ ୨୫ରେ ଅକ୍ଷୟଙ୍କ ସହ ରୂପାଲିଙ୍କ ବାହାଘର ସ୍ଥିର ହୋଇଥିଲା। ପୁଣେରେ କରୋନା ସଂକ୍ରମଣ ବୃଦ୍ଧି ପାଇବାରୁ ଉଭୟେ ବାହାଘର ବନ୍ଦ ରଖିବାକୁ ନିଷ୍ପତ୍ତିି ନେଇଥିଲେ। ପରେ ଅକ୍ଷୟ ବାହାଘର ବାବଦକୁ ସଞ୍ଚୟ କରିଥିବା ପାଖାପାଖି ୨ ଲକ୍ଷ ଟଙ୍କା ଖର୍ଚ୍ଚ କରି ସହରର ବେସାହାରା ତଥା ପ୍ରବାସୀ ଶ୍ରମିକଙ୍କୁ ଦୈନିକ ଖାଇବାକୁ ଦେଉଛନ୍ତି। ଏଥିରେ ରୂପାଲି ଅକ୍ଷୟଙ୍କୁ ଉତ୍ସାହିତ କରିବା ସହ ତାଙ୍କୁ ଆର୍ଥିକ ସହାୟତା ଯୋଗାଇ ଦେଉଛନ୍ତି। ଅନ୍ୟମାନେ ବି ଅକ୍ଷୟଙ୍କୁ ଆର୍ଥିକ ସହଯୋଗ କରୁଛନ୍ତି। ଅକ୍ଷୟଙ୍କର ତିନି ଜଣ ସାଙ୍ଗ ତାଙ୍କୁ ଏହି କାର୍ଯ୍ୟରେ ସାହାଯ୍ୟ କରୁଛନ୍ତି। ସେମାନେ ସକାଳୁ ଉଠି ଖେଚୁଡ଼ି, ପଲାଉ ଓ ସମ୍ବର ରାଇସ୍ ପ୍ରସ୍ତୁତ କରି ତାହାକୁ ଅଟୋରେ ନେଇ ଲୋକମାନଙ୍କୁ ଦେଉଛନ୍ତି। ୪ରୁ ୫ଟି ସ୍ଥାନରେ ସେମାନେ ଖାଦ୍ୟ ପହଞ୍ଚାଉଛନ୍ତି। ମେ’ ୩୧ ଯାଏ ଏହାକୁ ଚାଲୁ ରଖିବାକୁ ନିଷ୍ପତ୍ତି ନେଇଛନ୍ତି ଅକ୍ଷୟ। ଅଟୋରେ ବି ସେ ମାଇକ ଲଗାଇଛନ୍ତି। ଅଟୋରେ ଗଲାବେଳେ ସେ ଏଥିରେ ଲୋକମାନଙ୍କୁ କରୋନା ସମ୍ପର୍କରେ ସଚେତନ କରୁଛନ୍ତି। ରାସ୍ତାକଡ଼ରେ ରହୁଥିବା ଲୋକମାନଙ୍କୁ ବି ମାସ୍କ ଓ ସାନିଟାଇଜର ବାଣ୍ଟୁଛନ୍ତି।
