ଆଧୁନିକ ସମାଜରେ ଅନ୍ଧବିଶ୍ୱାସର ଏକ ଛବି ସାମ୍ନାକୁ ଆସିଛି ଛତିଶଗଡ଼ର କାଙ୍କେର ଜିଲାରେ। କାଙ୍କେର ଜିଲାର ତୁମସନାର୍ ଗାଁରେ ପ୍ରଚଳିତ ରହିଛି ଏକ ଅଜବ ପରମ୍ପରା। ଏହି ଗାଁରେ ଯଦି କୌଣସି ପ୍ରସୂତିଙ୍କର ମୃତ୍ୟୁ ହୋଇଯାଏ ପୁରୁଷମାନେ ତାଙ୍କ ଶବକୁ ଛୁଅନ୍ତି ନାହିଁ କି ଅନ୍ତିମ ସଂସ୍କାର କରନ୍ତିନାହିଁ। ତୁମସନାର୍ର ସୁକମୋତିନ ନାମକ ମହିଳା ଜିଲା ହସ୍ପିିଟାଲ୍ରେ ଏକ ଶିଶୁକୁ ଜନ୍ମ ଦେବା ପରେ ଶିଶୁଟିର ମୃତ୍ୟୁ ହୋଇଥିଲା। ସୁକମୋତିନ ଏହା ଶୁଣିବା ପରେ ବି ତାଙ୍କର ମୃତ୍ୟୁ ଘଟିଥିଲା। ଏହାପରେ ମା ଓ ଶିଶୁର ଶବ ଗାଁରେ ପହଞ୍ଚିବା ପରେ ଅନ୍ତିମ ସଂସ୍କାର ପାଇଁ କୌଣସି ପୁରୁଷ ଆସିନଥିଲେ। ଭୂତ ଭୟ ଯୋଗୁ ସେମାନେ ଶବର ଅନ୍ତିମ ଯାତ୍ରାରେ ବି ଯିବାକୁ ମନା କରିଦେଇଥିଲେ। କାରଣ ପ୍ରସୂତିଙ୍କ ଶବକୁ ଯଦି ଗାଁରେ ପୋତାଯାଏ ତେବେ ସେ ଭୂତ ପାଲଟିଯାଏ ବୋଲି ସେମାନଙ୍କର ଅନ୍ଧବିଶ୍ୱାସ ରହିଛି। କେବଳ ଏତିକି ନୁହେଁ ସେମାନେ ଶବକୁ ବି କାନ୍ଧରେ ନେବା ପାଇଁ ମନା କରିଦେଇଥିଲେ। ତେବେ ଏଭଳି ଅନ୍ଧବିଶ୍ୱାସରୁ ଊର୍ଦ୍ଧ୍ୱକୁ ଯାଇ ସ୍ଥାନୀୟ ମହିଳାମାନେ ଶବକୁ କାନ୍ଧରେ ନେଇଛନ୍ତି। ସେମାନେ ଶବକୁ ଅନ୍ତିମ ସଂସ୍କାର କରିବା ପାଇଁ କାନ୍ଧରେ ଗାଁ ବାହାରକୁ ନେଇ ପୋତିଛନ୍ତି। ଅନ୍ଧବିଶ୍ୱାସରେ ବୁଡ଼ି ରହିଥିବା ଲୋକମାନଙ୍କ ପାଇଁ ଏହି ଘଟଣା ଏକ ନୂଆ ବାଟ ଦେଖାଇବ ବୋଲି ଆଲୋଚନା ହେଉଛି।
