ଦରଖାସ୍ତ ଭଲ ଭାବେ ନ ପଢ଼ି ତାକୁ ମଞ୍ଜୁର କରିଦେଲେ କେତେ ଯେ ହଟହଟା ହେବାକୁ ହୁଏ ତା’ର ଏକ ଦୃଷ୍ଟାନ୍ତ ଦେଖିବାକୁ ମିଳିଛି ଉତ୍ତରପ୍ରଦେଶରେ। ଜଣେ ଅଷ୍ଟମ ଶ୍ରେଣୀ ଛାତ୍ର ନିଜର ଦେହାନ୍ତ ହୋଇଥିବା ବିଷୟ ଦରଖାସ୍ତରେ ଲେଖି ପ୍ରିନି୍ସପାଲଙ୍କୁ ଆବେଦନ କରିଥିଲେ। ପ୍ରିନ୍ସିପାଲ ମଧ୍ୟ ଉକ୍ତ ଦରଖାସ୍ତକୁ ଭଲଭାବେ ନ ପଢ଼ି ତାକୁ ମଞ୍ଜୁର କରିଦେଇଥିଲେ। ଏଥିପାଇଁ ପ୍ରିନି୍ସପାଲଙ୍କୁ ହଟହଟା ହେବାକୁ ପଡିଛି। ଏଭଳି ଏକ ଦରଖାସ୍ତ ମଞ୍ଜୁର କରିବା ଘଟଣା ଯେତିକି ବିସ୍ମୟ ସୃଷ୍ଟିକରିଛି ସେତିକି ହାସ୍ୟରୋଳର ଖୋରାକ ଯୋଗାଇଛି। ଉତ୍ତରପ୍ରଦେଶରେ ଏହି ଛାତ୍ରଙ୍କର କାରନାମା ଏବେ ସୋସିଆଲ୍ ମିଡିଆରେ ଚର୍ଚ୍ଚା ହେଉଛି। କାନପୁରର ଏକ ସ୍କୁଲରେ ଜଣେ ଅଷ୍ଟମ ଶ୍ରେଣୀ ଛାତ୍ର ନିଜର ମୃତ୍ୟୁ ହୋଇଥିବା ଦର୍ଶାଇ ପ୍ରିନି୍ସପାଲଙ୍କୁ ଅଧାଦିନ ଛୁଟି ନେବାକୁ ଅନୁମତି ଲୋଡ଼ିଥିଲେ। ଅଗଷ୍ଟ ୨୦ ପୂର୍ବାହ୍ଣ ୧୦ଟାରେ ଛାତ୍ରଙ୍କର ଦେହାନ୍ତ ହୋଇଥିବା ଦରଖାସ୍ତରେ ଦର୍ଶାଯାଇଛି। ବ୍ୟସ୍ତରେ ଥିବା ପ୍ରିନ୍ସିପାଲ ଦରଖାସ୍ତ ଭଲଭାବେ ନ ପଢ଼ି ଏଥିରେ ଲାଲ୍ ପେନ୍ରେ ଦସ୍ତଖତ କରି ମଞ୍ଜୁର ମଧ୍ୟ କରିଛନ୍ତି। ତେବେ ଏ ସମ୍ପର୍କରେ ଛାତ୍ର ଜଣକ କୌତୂହଳର ସହ ନିଜ ସାଙ୍ଗମାନଙ୍କୁ ଜଣାଇଥିଲେ। ଧୀରେ ଧୀରେ ଏହି ବିଷୟ ଶିକ୍ଷକମାନେ ମଧ୍ୟ ଜାଣିବାକୁ ପାଇଲେ। ଏବେ ସେଇ ଛାତ୍ରକୁ ଡକାଯାଇ ଏ ସମ୍ପର୍କରେ ପଚରାଉଚରା କରାଯାଉଛି।
