ଜୟପୁର,୧୨ା୫ (ନି.ପ୍ର.)-କରୋନା ପାଇଁ ଏବେ ସାରା ଦେଶ ଲକ୍ଡାଉନରେ ରହିଛି। ତେବେ ଏନେଇ ରହିଥିବା ସଚେତନତା ବାର୍ତ୍ତା ଉପାନ୍ତ ଅଞ୍ଚଳରେ ପହଞ୍ଚତ୍ ପାରୁନାହିଁ। ଏଭଳି ସ୍ଥିତିରେ କାଖରେ ନିଜର ୩ବର୍ଷର ଛୁଆକୁ ଧରି କରୋନା ସଚେତନତା କରୁଛନ୍ତି କୋରାପୁଟ ଜିଲା ଜୟପୁର ବ୍ଲକ ବାରିଣିପୁଟ ଗାଦଲାବାଡ଼ି ଗ୍ରାମର ମାମି ଖିଲ। କୋରାପୁଟ ଜିଲା ଜୟପୁର ଘାଟି ପାହାଡ଼ ଘେରା ଉପାନ୍ତ ଆଦିବାସୀ ଅଞ୍ଚଳରେ ସଚେତନ କରାଇବା ଭୁଲିଯାଇଛି ପ୍ରଶାସନ। ଏପରିକି ଜୟପୁର ସହରଠାରୁ ମାତ୍ର ୧୦ କି.ମି. ଦୂର ପାହାଡ଼ ଉପରେ ରହୁଥିବା ଆଦିବାସୀ ଲୋକଙ୍କୁ ସରପଞ୍ଚ କିମ୍ବା ବିଡିଓ ସଚେତନତା କରିନାହାନ୍ତି। ଏଭଳି ପରିସ୍ଥିତିରେ ନିଜ ଗାଁକୁ ଯେପରି କରୋନା ଛୁଇଁ ନ ପାରିବ ଏହି ଚିନ୍ତାଧାରା ନେଇ ମାମି ସଚେତନତା ଜାରି ରଖିଛନ୍ତି। ସେ ଗ୍ରାମର ପ୍ରତି ଘରକୁ ଯାଇ ଲୋକଙ୍କୁ ସଚେତନ କରୁଛନ୍ତି। ସାବୁନରେ ବାରମ୍ବାର ହାତ ଧୋଇବା, ମାସ୍କ ବ୍ୟବହାର କରିବା ଓ ସାମାଜିକ ଦୂରତା ରକ୍ଷା କରିବା ଲାଗି ଗ୍ରାମବାସୀଙ୍କୁ ଶପଥପାଠ କରାଉଛନ୍ତି। ମାମିଙ୍କ ଏପରି ପ୍ରୟାସ ଯୋଗୁ ଗ୍ରାମରେ କରୋନା ପଶିପାରିବ ନାହିଁ ବୋଲି ବିଶ୍ୱାସ ରହିଛି ସମସ୍ତଙ୍କର।
