ସିନାପାଲି,୨୪।୯(ଡି.ଏନ୍.ଏ.)-
କେନ୍ଦ୍ର ସରକାର ଅନେକ୍ ଯୋଜନାରେ ଆଧାର କାର୍ଡ ନିହାତି ଦରକାର ବଲି ନିୟମ କରିଛନ୍। ଯେନ୍ଥିରଲାଗି ସରକାରୀ ଯୋଜନା ହକ୍ଦାର ହିତାଧିକାରୀ ପାସ୍କେ ପୁହୁଁଚି ପାରବା। ହେଲେ ଅନେକ ଜାଗାରେ ଇତାର ଉଲଟିଆ ଫଲ ବି ଦେଖ୍ବାକେ ମିଲୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ନୂଆପଡ଼ା ଜିଲା ସିନାପାଲି ବ୍ଲକ ଗୋର୍ଲା ପଁଚେତ୍ ପତିଏଲପଡ଼ା ଗଁାରେ।
ସୂଚନା ଅନ୍ସାରେ ପତିଏଲପଡ଼ା ଗଁାର ଚନ୍ଦ୍ରଧ୍ୱଜ ମାଳି ଆର ପ୍ରଭାବତୀକଁର ଝି’ ହେଉଛନ୍ ତପସ୍ବିନୀ ମାଳି(୨)। ଜନମ୍ ବେଲୁ ତପସ୍ବିନୀକଁର ଦୁଇ ହାତ୍ ନାଇଁଥିଲାବେଲେ ତାକର ଗ୍ରହଣଖଣ୍ଡିଆ ଅଛେ। ଗରିବ୍ ମା’ବାପ୍ ଝି’କେ ଭଲ କରବାର ଲାଗି ଆସର ପାସର ଭିନେ ଭିନେ ଡାକ୍ତରଖାନାକେ ନେଇ ଦେଖେଇଛନ୍। ହେଲେ ଟଁକା ପଏସା ଅଭାବୁ ଝି’ର ଉଚ ଚିକିଛା କରେଇ ନାଇଁ ପାରବାର। ଚନ୍ଦ୍ରଧ୍ୱଜ ଝନେ ନିହାତି ଗରିବ୍ ହେଇଥିଲାବେଲେ କୁଲିମଜୁରି କରି କୁଟୁମ ପୁଷୁଛନ୍। ଏନ୍ତାଥି ସେ ଯାହା କମଉଛନ୍ ପରିବାରର ପେଟ୍କେ ଅଁଟ୍ଲେ ଦିହିକେ ନାଇଁ ଅବସ୍ତା ହେଉଛେ। ଇଆଡ଼େ ତପସ୍ବିନୀ ସବୁବେଲେ ତରଲ ଖାଏଦ୍ ଖାଉଛନ୍। ହେଲେ ତାହାକୁ ସବୁଦିନେ କ୍ଷୀର ଘିନି ଖୁଆବାର ବି ଚନ୍ଦ୍ରଧ୍ୱଜକଁର ପକ୍ଷେ ସମ୍ଭବ ନୁହେ। ଏନ୍ତାଥି ସେ ଝି’କେ କେନ୍ଥେଇ ପାଲିପୁଷି ବଡ଼ କରବେ ସେ ଚିନ୍ତାରେ ହରମେଶା ଘାରି ହେଉଛନ୍। ଇଆଡ଼େ ତପସ୍ବିନୀର ଜନ୍ମୁ ଗ୍ରହଣଖଣ୍ଡିଆ ଆର ଦୁଇହାତ୍ ନାଇଁଥିବାର ଲାଗି ଆଧାର କାର୍ଡ ବି ହେଇ ନାଇଁପାରବାର। ଯେନ୍ଥିରଲାଗି ସେ ଅନେକ୍ ସରକାରୀ ଯୋଜନାରୁ ବଁଚିତ୍ ହେଇ ରହିଛନ୍। ଏନ୍ତାଥି ଅସାହା ଗରିବ୍ ମା’ବାପ୍ ଝି’ର ଚିକିଛା ସାହାଯ୍ ସଂଗେ ଉନିଆ ସରକାରୀ ସୁବିଧା ସୁଯୋଗ ଯୁଗେଇ ଦେବାକେ ଗଣମାଧ୍ୟମ ଜରିଆରେ ଜିଲା ପରଶାସନକେ ଗୁହାରି କରିଛନ୍। ଇ ବାବ୍ଦେ ସିନାପାଲି ବିଡିଓ ସୁରେନ୍ଦ୍ର ମେହେରକୁଁ ପଚ୍ରାଲାରୁ ତପସ୍ବିନୀକୁଁ ଭତା ଆର ତାକର ବାପାର ନଁାରେ ଗୁଟେ ଘର ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ। ସେନ୍ତା ସିନାପାଲି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିଛା ଅଧ୍କାରୀ ଡା.ସନୋଜ ମେହେରକୁଁ ପଚରାଲାରୁ ସିଡିଏମ୍ଓକଁର ସଂଗେ କଥା ହେଇ ଉଚ ଚିକିଛାର ବେବସ୍ତା କରାଯିବା ବଲି ସେ କହିଥିଲେ।
