ନୂଆଦିଲ୍ଲୀ,୨୩।୭: ଏଣିକି ଖୁବ୍ଶୀଘ୍ର ରାସ୍ତାରେ ଗଡ଼ିବ ବିଦ୍ୟୁତ୍ ଚାଳିତ ଟ୍ରକ୍। ଏନେଇ ସଡ଼କ ପରିବହନ ଓ ଶିଳ୍ପ ମନ୍ତ୍ରଣାଳୟର ମିଳିତ ଉଦ୍ୟମରେ ଏହି ଯୋଜନା ଉପରେ କାର୍ଯ୍ୟ କରାଯାଉଥିବା ଜଣାପଡ଼ିଛି। ଦିଲ୍ଲୀରୁ ମୁମ୍ବାଇ ଭିତରେ ନିର୍ମାଣଧିନ ହୋଇଥିବା ଗ୍ରୀନ ଏକ୍ସପ୍ରେସ ହାଇଓ୍ବେରେ ପରୀକ୍ଷାମୂଳକ ଭାବେ ଏହାକୁ ଆରମ୍ଭ କରାଯିବା ନେଇ ଯୋଜନା ରହିଛି। ଶିଳ୍ପ ମନ୍ତ୍ରଣାଳୟ ସାହାଯ୍ୟରେ ଏହି ସହର ମଧ୍ୟରେ ନିର୍ମାଣଧୀନ ହୋଇଥିବା ଗ୍ରୀନ ଏକ୍ସପ୍ରେସ୍ ହାଇଓ୍ବେରେ ୧୦ କିଲୋମିଟର ପର୍ଯ୍ୟନ୍ତ ଏକ କରିଡର ତିଆରି କରାଯିବ ବୋଲି ସଡ଼କ ପରିବହନ ମନ୍ତ୍ରୀ ନିତିନ ଗଡ଼କରୀ ସୂଚନା ଦେଇଛନ୍ତି। ଯେଉଁଥିରେ ବିଦ୍ୟୁତ୍ ତାର ଲଗାଯିବ। ଏହି ତାର ସାହାଯ୍ୟରେ ୮୦ ଟନ୍ କ୍ଷମତା ଥିବା ଇଲେକ୍ଟ୍ରିକ୍ ଟ୍ରକ୍ର ଫଟୋଗ୍ରାଫି ସହ ଯୋଡାଯିବ। କେବଳ ସେତିକି ନୁହେଁ ବିଦ୍ୟୁତ ସହ ଆଉ ଏକ ବିକଳ୍ପ ହେଉଛି ବ୍ୟାଟେରୀ। ଫଟୋଗ୍ରାଫି ସାହାଯ୍ୟରେ କିଛି କିଲୋକମିଟର ଟ୍ରକ୍ ଚାଲିବା ପରେ ବ୍ୟାଟେରୀ ଚାର୍ଜ ହୋଇଯିବ। ଏହାପରେ ବ୍ୟାଟେରୀ ଦ୍ୱାରା ଟ୍ରକ ଚାଲିବ। ଯଦି ବ୍ୟାଟେରୀ ଡିସ୍ଚାର୍ଜ ହୋଇଯାଏ ତେବେ ଟ୍ରକ ପୁଣି ବିଦ୍ୟୁତ୍ରେ ଚାଲିବ। ଯଦି ସବୁ ଠିକ୍ ଠାକ୍ ରହେ ତେବେ ଖୁବ୍ଶୀଘ୍ର ଏହି ସହର ମଧ୍ୟରେ ବିଦ୍ୟୁତ୍ ଚାଳିତ ଟ୍ରକ୍ ଯାତାୟତ କରିବ। ଗୋଟିଏ ସହରରୁ ଅନ୍ୟ ସହରରୁ ଜିନିଷପତ୍ର ନେବା ଆଣିବାରେ ଯେତିକି ଟଙ୍କା ଖର୍ଚ୍ଚ ହେଉଥିବ ତାହା କମିଯିବ। ଯେପରିକି ୧ ଲିଟର ଡିଜେଲରେ ଟ୍ରକ୍ଟି ଯେତିକି ବାଟ ଯାଉଥିଲା ସେତିକି ବାଟ ପାଇଁ ବିଦ୍ୟୁତ୍ ଚାଳିତ ଟ୍ରକ୍ରେ ଖର୍ଚ୍ଚ ହେବ ମାତ୍ର ୧୨ ଟଙ୍କା।
