ନିରାକାରପୁର,୧୮-୧୦(ଡି.ଏନ.ଏ.):ଖୋର୍ଦ୍ଧା ଜିଲା ନିରାକାରପୁର ପଞ୍ଚାୟତସ୍ଥିତ କ୍ଷେତ୍ରବାସୀ ଏକାଡେମୀ ସ୍କୁଲରେ ଗୁରୁବାର ଏକ ଅଭାବନୀୟ ଘଟଣା ଘଟିଛି। ସ୍କୁଲ ପରିସର ମଧ୍ୟରେ ଥିବା ଏକ ଆମ୍ବଗଛର ବିରାଟ ଡାଳ ପଡି ଜଣେ ଦ୍ୱିତୀୟ ଶ୍ରେଣୀ ଛାତ୍ରଙ୍କ ମୃତ୍ୟୁ ହୋଇଛି। ମୃତ ଛାତ୍ର ହେଲେ ଉକ୍ତ ପଞ୍ଚାୟତ ଅନ୍ତର୍ଗତ ରାଉଳ ହଜ ମୌଜା ଷ୍ଟେଶନ ପାଖରେ ରହୁଥିବା ନବଘନ ପରିଡାଙ୍କ ଏକ ମାତ୍ର ପୁଅ ରିତେଶ ପ୍ରଧାନ ଓରଫ ମୁନା (୬)। ଏହି ଘଟଣା ନେଇ ଉତ୍ତ୍ୟକ୍ତ ଲୋକେ କ୍ଷତିପୂରଣ ଦାବିରେ ମୃତଦେହ ଧରି ସ୍କୁଲ ସମ୍ମୁଖରେ ଧାରଣା ଦେଇଥିଲେ। ଅନ୍ୟପକ୍ଷେ ସ୍କୁଲ ପ୍ରଧାନ ଶିକ୍ଷକଙ୍କୁ ନିଲମ୍ବିତ କରାଯାଇଥିବା ଜଣାପଡିଛି।
ପ୍ରକାଶ ଯେ, ଛାତ୍ର ରିତେଶ ପ୍ରାୟ ଅପରାହ୍ନ ୧ଟାରୁ ସାଢେ ଗୋଟାଏ ମଧ୍ୟରେ ମଧ୍ୟାହ୍ନଭୋଜନ ଛୁଟି ସମୟରେ ସ୍କୁଲ ପରିସରରେ ଥିବା ଏକ ଆମ୍ବଗଛ ତଳେ ଖେଳୁଥିଲେ। ସେହି ସମୟରେ ବାତ୍ୟା ଫନୀ ବେଳରୁ ଭାଙ୍ଗି ଗଛରେ ଓହଳି ରହିଥିବା ଆମ୍ବଡାଳ ତାଙ୍କ ଉପରେ ଖସିପଡିଥିଲା। ଫଳରେ ଡାଳ ମାଡରେ ଛାତ୍ର ଜଣକ ରକ୍ତ ଜୁଡୁବୁଡୁ ହୋଇଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ଶିକ୍ଷକମାନେ ଉଦ୍ଧାର କରି ପ୍ରଥମେ ସ୍ଥାନୀୟ ସରକାରୀ ଡାକ୍ତରଖାନାକୁ ନେଇଥିଲେ। ସେଠାରୁ ଖୋର୍ଦ୍ଧା ସରକାରୀ ମେଡିକାଲକୁ ସ୍ଥାନାନ୍ତର କରାଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣାଟି ପ୍ରଚାରିତ ହେବା ପରେ ସ୍କୁଲ ପରିସରରେ ଶୋକାକୁଳ ପରିବେଶ ସୃଷ୍ଟି ହେବା ସହ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକେ ସ୍କୁଲ ଶିକ୍ଷୟିତ୍ରୀଶିକ୍ଷକଙ୍କୁ ତାଲାପକାଇ ରଖିଥିଲେ। ଅନ୍ୟପକ୍ଷେ ସ୍କୁଲର କେତେଜଣ କର୍ମଚାରୀ ରକ୍ତ ପଡିଥିବା ସ୍ଥାନରେ ମାଟି ଘୋଡାଇ ଘଟଣାକୁ ଚପାଇ ଦେବାକୁ ଚେଷ୍ଟା କରୁଥିବା ଅଭିଯୋଗ ହେଉଛି। ଖବର ପାଇ ଏକ ପ୍ଲାଟୁନ ଫୋର୍ସ ସହ ନିରାକାରପୁର ପୋଲିସ ଓ ଟାଙ୍ଗୀ ତହସିଲଦାର ସୁନାସିରୀ କିଶାନ ଘଟଣାସ୍ଥଳରେ ପହଞ୍ଚତ୍ଥିଲେ। ଲୋକଙ୍କୁ ବୁଝାଶୁଝା ପରେ ସନ୍ଧ୍ୟା ପ୍ରାୟ ୫ଟା ୩୫ରେ ଅଟକ ଥିବା ଶିକ୍ଷୟିତ୍ରୀଶିକ୍ଷକଙ୍କୁ ଛାଡି ଦେଇଥିଲେ। ତେବେ ଉତ୍ତ୍ୟକ୍ତ ଲୋକେ ବ୍ୟବଚ୍ଛେଦ ପରେ ମୃତଦେହ ଧରି କ୍ଷତିପୂରଣ ଦାବି ନେଇ ସ୍କୁଲ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ। ଘଟଣାସ୍ଥଳରେ ଏବିଇଓ ଦେବବ୍ରତ ମହାପାତ୍ର ଓ ତହସିଲଦାର କିଶାନ ପହଞ୍ଚତ୍ ଲୋକଙ୍କୁ ବୁଝାସୁଝା କରିଥିଲେ। ପ୍ରଶାସନ ପକ୍ଷରୁ କ୍ଷତିପୂରଣ ରାଶି ଦିଆଯିବାର ପ୍ରତିଶ୍ରୁତି ଦେବା ପରେ ରାତି ୯ଟା ୪୫ରେ ଧାରଣା ପ୍ରତ୍ୟାହୃତ ହୋଇଥିଲା।
ଏନେଇ ଶିକ୍ଷକ ଯୋଗେଶ ନାୟକଙ୍କୁ ପଚାରିବାରେ ସେ କହିଥିଲେ, ଆମେ ଖାଇବା ଛୁଟିରେ ଟିଫିନ କରୁଥିଲୁ। ଖବର ପାଇ ଗଲା ବେଳକୁ ଆମ ପ୍ରଧାନ ଶିକ୍ଷକ ଓ ଅନ୍ୟ ଜଣେ ଶିକ୍ଷକ ଆହତ ଛାତ୍ରଙ୍କୁ ମେଡିକାଲକୁ ନେଇଯାଇଥିଲେ। ଏନେଇ ଭାରପ୍ରାପ୍ତ ପ୍ରଧାନ ଶିକ୍ଷକ ଉଦୟ ନାଥ ତ୍ରିପାଠୀ ଓ ଟାଙ୍ଗୀ ବ୍ଲକ୍ ଶିକ୍ଷା ଅଧିକାରୀଙ୍କୁ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ମଧ୍ୟ ସେମାନେ ଫୋନ ଉଠାଇ ନ ଥିଲେ। ଏ ସର୍ମ୍ପକରେ ଜିଲା ଶିକ୍ଷା ଅଧିକାରୀ ବୃନ୍ଦାବନ ଶତପଥୀଙ୍କୁ ପଚାରିବାରେ ସେ କହିଥିଲେ, ଭାରପ୍ରାପ୍ତ ପ୍ରଧାନ ଶିକ୍ଷକ ଉଦୟ ନାଥ ତ୍ରିପାଠୀଙ୍କୁ ଅନିର୍ଦ୍ଦିଷ୍ଟ କାଳ ପଯର୍ୟନ୍ତ ନିଲମ୍ବିତ କରାଯାଇଛି।
