ନୂଆଦିଲ୍ଲୀ,୯।୪: ସମୟ ପ୍ରତି ମୁହୂର୍ତ୍ତରେ ବଦଳି ଚାଲିଛି। ବିଶ୍ୱର ଶକ୍ତିଶାଳୀ ଦେଶ ଆମେରିକା ଆଜି କରୋନା କବଳରେ ପଡି ଯେମିତି ବହୁ ପଛକୁ ଚାଲି ଯାଇଛି। କରୋନା ସଂକ୍ରମଣରେ ଆମେରିକାରେ ପ୍ରତିଦିନ ହଜାର ହଜାର ଲୋକଙ୍କ ମୃତ୍ୟୁ ଏବେ ଚିନ୍ତାର କାରଣ ପାଲଟିଛି। ଏବେ ଏଥିରୁ ରକ୍ଷା ପାଇବାକୁ ଭାରତର ସାହାଯ୍ୟ ଲୋଡିଛି ଆମେରିକା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତକୁ ଆଣ୍ଟି ମ୍ୟାଲେରିଆ ଡ୍ରଗ ହାଇଡ୍ରୋକ୍ସିକ୍ଲୋରୋକୁଇନ୍ ମାଗିଛନ୍ତି। ଆଉ ଭାରତ ମଧ୍ୟ ଏହା ଯେଗାଇ ଦେବାକୁ ପ୍ରତିଶ୍ରୁତି ଦେଇଛି। ୧୯୫୧ରୁ ୨୦୨୦ ମଧ୍ୟରେ ଭାରତର ଅର୍ଥ ବ୍ୟବସ୍ଥାରେ ଉନ୍ନତି ଆସିଥିବାରୁ ଏହା ଆଜି ବିଶ୍ୱର ଶକ୍ତିଶାଳୀ ଦେଶକୁ ସାହାଯ୍ୟ କରିବାକୁ ଆଗେଇ ଆସିଛି। କୁହାଯାଏ ୧୯୫୧ରେ ଭାରତରେ ଖାଦ୍ୟଶସ୍ୟର ଅଭାବ ପଡିବାରୁ ସେ ଆମେରିକାର ସାହାଯ୍ୟ ଲୋଡିଥିଲା। ସେତେବେଳେ ଭାରତର ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଆମେରିକା ରାଷ୍ଟ୍ରପତି ହ୍ୟାରି ଏସ୍ ଟ୍ରୁମେନଙ୍କୁ ସାହାଯ୍ୟ ମାଗିଥିବା ବେଳେ ଆମେରିକା ପାଖାପାଖି ୨୦ ଲକ୍ଷ ଟନ୍ ଗହମ ଭାରତକୁ ଯୋଗାଇ ଦେଇଥିଲା। ଏବେ ୧୯୫୧ରୁ ୨୦୨୦ ଭିତରେ ବହୁତ କିଛି ପରିବର୍ତ୍ତନ ହୋଇଛି। ଭାରତ ଖାଦ୍ୟଶସ୍ୟ ଉତ୍ପାଦନରେ ଆତ୍ମନିର୍ଭରଶୀଳ ହୋଇଥିବା ବେଳେ ଏବେ କରୋନା ସହ ଲଢିବାକୁ ସେ ଆମେରିକାକୁ ବନ୍ଧୁତ୍ୱର ହାତ ବଢାଇଥିବା ବେଳେ ଗହମ ବଦଳରେ ଏବେ ଆଣ୍ଟି ମ୍ୟାଲେରିଆ ଡ୍ରଗ ହାଇଡ୍ରୋକ୍ସିକ୍ଲୋରୋକୁଇନ୍ ଯୋଗାଇ ଦେବାକୁ କଥା ଦେଇଛି।
