ବେଲପଡ଼ା,୧୫।୧(ଡି.ଏନ୍.ଏ.)- ବଲାଙ୍ଗୀର ଜିଲା ବେଲପଡ଼ା ବ୍ଲକ ଘାଗୁର୍ଲୀ ପଁଚେତ୍ ଅଧୀନ ଘଘରା ଗଁାର ବିଧବା ମହିଲା ଉଜଲି ମାଝି। ଗଲା ବଛର ବରଷାରେ ତାକର ପୁରନା ମାଏଟ୍ କୁରିଆଟା ଭାଂଗି ଗଲା। ଇ ବାବ୍ଦେ ସେ ବାରବାର ଥାନୀଅ ପରଶାସନକେ ଜନେଇ ନିରାଶ ହେଇଛନ୍। ଏନ୍ତାଥି ସେ ଗଁା ପାସର ପତରା ଜଂଗଲ ଜମିରେ ଗୁଟେ କୁରିଆ କରି ରହୁଛନ୍।
ସୂଚନା ଅନ୍ସାରେ ଘଘରା ଗଁାର ବିଧବା ମହିଲା ଉଜଲି ମାଝିକଁର ପରିବାର କହେଲେ ଗୁଟେବଲି ପୁଓ ଦେବାନନ୍ଦ ଆର ବହ, ନାତିନାତେନକୁଁ ନେଇ ସଁସାର। ଆପ୍ନେ ନରେନ୍ଦ୍ର ମାଝି ୫ ବଛର ତଲୁ ଆରପାରକେ ଚାଲିଯାଇଛନ୍। ପରିବାରଟା ନିହାତି ଗରିବ୍, ନଁା’କେ ଜମିବାଡ଼ି ଟିକେ ରହିଛେ। ହେଲେ ସେଥ୍ରେ ପରିବାରର ପେଟ୍ ପାଲବାର ସମ୍ଭବ ନୁହେ। ଏନ୍ତାଥି ପୁଓ ଦେବାନନ୍ଦ ପେଟ୍ପାଟନାର ଲାଗି ବଛ୍ରର ଅନେକ ସମିଆ କୁଟୁମବସିଆ ଦାଦନ ଖଟିଯାଉଛନ୍। ଏନ୍ତା ଅଭାବିଆ ପରିସ୍ଥିତିରେ ଗଲା ବଛର ବରଷାରେ ଉଜଲିକଁର ମାଏଟ୍ କୁରିଆଟା ଭାଂଗି ଗଲା। ସରକାରୀ ସାହାଯ୍ ଲାଗି ସେ ଥାନୀଅ ରାଜନେତା, ତହସିଲଦାର, ବିଡିଓକୁଁ ଗୁହାରି ନିରାଶ ହେଇଛନ୍। ଶେଷେ ତହସିଲଦାର ଘରଭଂଗା ସାହାଯ୍ ହିସାବେ ପଲିଥିନ୍ ଖଁଡ଼େ ଦେଇ ତାକର ଦାଇତିଅ ସାରିଦେଇଛନ୍ ବଲି ଉଜଲି କହିଛନ୍। ଏନ୍ତାଥି ଉପେ ଶୂଇନ୍ ଉଜଲି ଗଁା ପାସର ପତରା ଜଂଗଲ ଜମିରେ ଗୁଟେ ଝାଟିମାଟିର କୁରିଆ କରି ଉପରେ ପଲିଥିନ୍ ଢ଼ାପି ବଡ଼ା ଗୁଲ୍ଗୁଲା ହେଇ ରହୁଛନ୍। ଇଆଡ଼େ ଆପ୍ନେ ଆରପାରକେ ଚାଲିଯିବାର ୫ ବଛର ବିତିଯାଇଥିଲେ ବି ଉଜଲି ବିଧବା ଭତା ପାଏବାରୁ ବଁଚିତ୍ ହେଇ ରହିଛନ୍। ଇ ବାବ୍ଦେ ବେଲପଡ଼ା ବିଡିଓ ଭିକ୍ଟର ସେରେଙ୍ଗକୁଁ ପଚ୍ରାଲାରୁ ଇ ଘଟନା ବାବ୍ଦେ ମୋର ପାସେ ସୂଚନା ନାଇଁଥାଇ କି କେହି ଅଭିଯୋଗ ନାଇଁକରି। ସେ ଯାହା ହେଉ ସରକାରକଁର ନିୟମ ହିସାବେ ସେ ‘କ’ଫର୍ମରେ ଆବେଦନ କରୁନ୍। ତାହାକୁ ଗୁରୁତ୍ ଦେଇ ଆଏବାର ୩ ମାସ୍ ଭିତ୍ରେ ଆବାସ ଘର ଯୁଗେଇ ଦେବାର ସଂଗେ ଭତା ଯୋଜନାରେ ବି ସାମିଲ କରାଯିବା ବଲି ସେ କହିଥିଲେ।
