ତେହେରାନ,୭ା୧: ଇରାନ ସେନା କମାଣ୍ଡର ଜେନେରାଲ କାସିମ ସୋଲେମାନୀଙ୍କୁ ହତ୍ୟା ପରେ ତେହେରାନ ୨୦୧୫ର ଆଣବିକ ଚୁକ୍ତିନାମାକୁ ମାନିବ ନାହିଁ ବୋଲି ଘୋଷଣା କରିଛି। ଫଳରେ ଇରାନ ଆଣବିକ ବୋମା ପ୍ରସ୍ତୁତ କରିବା ସମ୍ଭାବନା ସୃଷ୍ଟି ହୋଇଛି। ସେପଟେ ଇରାକ ମାଟିରୁ ଆମେରିକା ସୈନ୍ୟଙ୍କୁ ହଟାଇବା ପାଇଁ ଏହାର ପାର୍ଲାମେଣ୍ଟରେ ପ୍ରସ୍ତାବ ଗୃହୀତ ହୋଇଛି। ଇରାକରୁ ଆମେରିକା ସୈନ୍ୟ ହଟିଲେ ଇସ୍ଲାମିକ ଷ୍ଟେଟ୍ (ଆଇଏସ୍) ଆତଙ୍କବାଦୀ ପୁଣିଥରେ ସକ୍ରିୟ ହୋଇଉଠିବେ ଏବଂ ମଧ୍ୟପ୍ରାଚ୍ୟ ବିପଜ୍ଜନକ ଓ ଅସ୍ଥିର ହୋଇଉଠିବ ବୋଲି ଆଶଙ୍କା କରାଯାଉଛି। ଆଣବିକ କଟକଣାକୁ ମାନିବ ନାହିଁ ବୋଲି ରାଷ୍ଟ୍ରପତି ହସନ ରୁହାନିଙ୍କ ପ୍ରଶାସନ ଘୋଷଣା କରିଥିବା ଏକ ଟିଭି ରିପୋର୍ଟରେ କୁହାଯାଇଛି।
ଅନ୍ୟପକ୍ଷରେ, ଆମେରିକା ତା’ର ସୈନ୍ୟଙ୍କୁ ପ୍ରତ୍ୟାହାର କରିନେବା ପାଇଁ ଇରାକ ପାର୍ଲାମେଣ୍ଟ ଆହ୍ବାନ ଦେଇଥିବାବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏହାକୁ ଅଗ୍ରାହ୍ୟ କରିଦେଇଛନ୍ତି। ଅନ୍ୟପକ୍ଷରେ ଇରାକ ଉପରେ ବଡ଼ କଟକଣା ଜାରି କରିବାକୁ ସେ ଧମକ ଦେଇଛନ୍ତି। ଆଇଏସ୍ ଆତଙ୍କବାଦୀ ସଂଗଠନ ବିରୋଧରେ ଅନ୍ତର୍ଜାତୀୟ ମେଣ୍ଟର ଅଂଶସ୍ବରୂପ ଇରାକରେ ଆମେରିକାର ୫୦୦୦ରୁ ଅଧିକ ସୈନ୍ୟ ରହିଛନ୍ତି। ଗତ ଶୁକ୍ରବାର ବାଗଦାଦ ଅନ୍ତର୍ଜାତୀୟ ବିମାନବନ୍ଦରରେ ଆମେରିକାର ଡ୍ରୋନ୍ ଆକ୍ରମଣରେ ଇରାନ ଅଲ୍-କୁଦ୍ସ ବାହିନୀର ମୁଖ୍ୟ ସୋଲେମାନୀ ନିହତ ହୋଇଥିଲେ। ଏହି ଆକ୍ରମଣରେ ଇରାକ ର ହାଶେଦ ଅଲ-ଶାବି ଅର୍ଦ୍ଧସାମରିକ ବଳର ଉପମୁଖ୍ୟ ଅବୁ ମହଦି ଅଲ୍-ମୁହାନ୍ଦିସ୍ଙ୍କ ସମେତ ୮ ଜଣଙ୍କ ମୃତ୍ୟୁ ଘଟିଥିଲା। ଇରାକ ପାର୍ଲାମେଣ୍ଟରେ ଗୃହୀତ ପ୍ରସ୍ତାବ ସମ୍ପର୍କରେ ପ୍ରଶ୍ନ ହେବାରୁ ଟ୍ରମ୍ପ୍ କହିଥିଲେ, ଇରାକରେ ଆମେରିକା ଏୟାରବେସ୍ ନିର୍ମାଣରେ ଯେଉଁ ଅର୍ଥ ବିନିଯୋଗ କରିଛି, ତାହା ଫେରି ନ ପାଇବା ପର୍ଯ୍ୟନ୍ତ ବାଗଦାଦ ଛାଡିବାର ପ୍ରଶ୍ନ ଉଠୁନାହିଁ। ଉପସାଗରୀୟ ଦେଶରୁ କୌଣସି ବିରୋଧର ସମ୍ମୁଖୀନ ହେଲେ ଇରାକ ଉପରେ ବଡ଼ କଟକଣା ଲାଗୁ ହେବ ବୋଲି ଟ୍ରମ୍ପ୍ ଚେତାବନୀ ଦେଇଛନ୍ତି।
