କରାଚୀ, ୯ା୫ (ପି.ଟି.):ପାକିସ୍ତାନ ଟେଷ୍ଟ ଅଧିନାୟକ ଆଝାର ଅଲ୍ଲୀଙ୍କ ବ୍ୟାଟ୍ ଶେଷର ନିଲାମ ହୋଇଛି। କୋଭିଡ୍-୧୯ ମହାମାରୀ ମୁକାବିଲା ପାଇଁ ପାଣ୍ଠି ସଂଗ୍ରହ ଉଦ୍ଦେଶ୍ୟରେ ସେ ଏହା କରିଛନ୍ତି। ଭାରତର ଏକ ମ୍ୟୁଜିୟମ ତାହାକୁ କ୍ରୟ କରିଛି। ୨୦୧୬ରେ ଓ୍ବେଷ୍ଟଇଣ୍ଡିଜ ବିପକ୍ଷ ଏକ ଟେଷ୍ଟ ମ୍ୟାଚ୍ରେ ସେ ୩୦୨ ରନ ସଂଗ୍ରହ କରିଥିଲେ। ତାଙ୍କର ଏହି ତ୍ରିଶତକୀୟ ଇନିଂସରେ ସେ ଯେଉଁ ଦୁଇଟି ବ୍ୟାଟ୍ ବ୍ୟବହାର କରିଥିଲେ ତାହାକୁ ନିଲାମ କରିଛନ୍ତି। ଏହାଛଡ଼ା ୨୦୧୭ ଚାମ୍ପିୟନ୍ସ ଟ୍ରଫି ଫାଇନାଲ ଭାରତ ବିପକ୍ଷ ବିଜୟ ମ୍ୟାଚରେ ସେ ପିନ୍ଧିଥିବା ଜର୍ସିକୁ ମଧ୍ୟ ଅନ୍ଲାଇନ୍ରେ ନିଲାମ କରିଛନ୍ତି। ଉଭୟ ବ୍ୟାଟ୍ ଏବଂ ଜର୍ସିରେ ପାକିସ୍ତାନ ଦଳର ସମସ୍ତ ସଦସ୍ୟଙ୍କ ଦସ୍ତଖତ ରହିଛି। ଆଝାର ସୋସିଆଲ ମିଡିଆରେ ବ୍ୟାଟ୍ ଓ ପିଛା ୧ନିୟୁତ ବେସ୍ ପ୍ରାଇସ୍ ରଖିଥିଲେ। ପୁଣେସ୍ଥିତ ବ୍ଲେଡ୍ସ ଅଫ୍ ଗ୍ଲୋରି କ୍ରିକେଟ ମ୍ୟୁଜିୟମ ୧ନିୟୁତ ଟଙ୍କା ଦେଇ ବ୍ୟାଟ୍ କ୍ରୟ କରିଥିଲା। ତାଙ୍କର ଏହି ସ୍ମରଣୀୟ ଜର୍ସି ପ୍ରତି କାଲିଫର୍ନିଆରେ ବାସ କରୁଥିବା ଜଣେ ପାକିସ୍ତାନୀ କାଶ୍ ଭିଲାନୀ ବିଶେଷ ଆଗ୍ରହ ଦେଖାଇଥିଲେ। ସେ ୧.୧ ନିୟୁତ ଟଙ୍କା ବିନିମୟରେ କ୍ରିୟ କରିଥିଲେ। ନ୍ୟୁଜର୍ସିରେ ବାସ କରୁଥିବା ଅନ୍ୟ ଜଣେ ପାକିସ୍ତାନୀ ଜଲାଲ ଖାଁ ଏଥିପାଇଁ ୧୦୦,୦୦୦ ଦାନ କରିଥିବା ଆଝାର ପ୍ରକାଶ କରିଛନ୍ତି। ସୂଚନାଯୋଗ୍ୟ, ଦିବା/ରାତ୍ର ଟେଷ୍ଟରେ ତ୍ରିଶତକ ହାସଲ କରିବାରେ ଆଝାର ଅଲ୍ଲୀ ହେଉଛନ୍ତି ପ୍ରଥମ ଅନ୍ତର୍ଜାତୀୟ ଖେଳାଳି। ୨୦୧୬ରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ରେ ସେ ଓ୍ବେଷ୍ଟଇଣ୍ଡିଜ ବିପକ୍ଷରେ ୩୦୨ ରନ କରି ଅପରାଜିତ ରହିଥିଲେ। ପାକିସ୍ତାନ କ୍ରିକେଟର ଜଣକ କହିଛନ୍ତି, ଏହି ଜିନିଷଗୁଡ଼ିକ ତାଙ୍କ ପାଇଁ ସ୍ମରଣୀୟ ଥିଲା। ମାତ୍ର ଏକ ସଂକଟଜନକ ପରିସ୍ଥିତିରେ ଜନ କଲ୍ୟାଣ ଉଦ୍ଦେଶ୍ୟରେ ଏହା କାମରେ ଲାଗିପାରିଥିବାରୁ ମୁଁ ବହୁତ ଖୁସି।
