ଭୁବନେଶ୍ୱର, ୪ା୯(ବ୍ୟୁରୋ): ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମବାର୍ଷିକୀ ପରିପ୍ରେକ୍ଷୀରେ କେନ୍ଦ୍ର ସରକାର ଏକକ ବ୍ୟବହୃତ ପ୍ଲାଷ୍ଟିକକୁ ନିଷିଦ୍ଧକୁ ଜୋର ଦେଉଛନ୍ତି। ବିଭିନ୍ନ ସରକାରୀ କାର୍ଯ୍ୟାଳୟ, ରେଲଓ୍ବେ ଷ୍ଟେଶନ, ଏୟାରପୋର୍ଟ ଆଦି ପ୍ରମୁଖ ସ୍ଥାନରେ ଏହାକୁ ନିଷିଦ୍ଧ କରିବାକୁ କାର୍ଯ୍ୟ ଆରମ୍ଭ ହୋଇସାରିଛି। ଅନେକ ରେଳ ଷ୍ଟେଶନରେ ଏବେ ଏକକ ବ୍ୟବହୃତ ପ୍ଲାଷ୍ଟିକ ଉପରେ ପ୍ରତିବନ୍ଧକ ଲାଗି ସାରିଲାଣି। ଏହି ପ୍ରକ୍ରିୟାରେ ବିମାନ ବନ୍ଦରଗୁଡିକ ଖୁବ ସକ୍ରିୟ ରହିଛନ୍ତି। ପୂର୍ବରୁ ଦେଶର ୩୫ଟି ବିମାନ ବନ୍ଦରରେ ଏକକ ବ୍ୟବହୃତ ପ୍ଲାଷ୍ଟିକ ଉପରେ ପ୍ରତିବନ୍ଧକ ଲାଗିସାରିଛି। ମଙ୍ଗଳବାର ଆହୁରି ୨୦ଟି ବିମାନ ବନ୍ଦର ଏହି ସ୍ବୀକୃତି ହାସଲ କରିଛନ୍ତି। ଏ ସଂପର୍କରେ ଭାରତୀୟ ବିମାନ ବନ୍ଦର ପ୍ରାଧିକରଣ ଟୁଇଟ୍ କରି ସୂଚନା ଦେଇଛନ୍ତି। ଏହି ବିମାନ ବନ୍ଦରଗୁଡିକ ହେଉଛି ପ୍ରୟାଗରାଜ (ଆଲ୍ଲହାବାଦ), ଔରଙ୍ଗାବାଦ, ବେଲଗାଓଁ, ଭୂଜ, ଦିବ୍ରୁଗଡ, ଦୀମାପୁର, ଗୟା, ଗୋରଖପୁର, ଜବଲପୁର, ଜାମନଗର, ଯୋଧପୁର, ଜୋରହାଟ, କାଙ୍ଗ୍ରା, ଖଜୁରାହୋ, ଲେହ, ରାଜାମନ୍ଦ୍ରୀ, ରାଜକୋଟ, ସିଲଚାର, ସୁରତ ଓ ଟୁଟିକୋରିନ। ସୂଚନାଯୋଗ୍ୟ ଭୁବନେଶ୍ୱର ଏୟାରପୋର୍ଟ ପ୍ରଥମ ପର୍ଯ୍ୟାୟରେ ଏକକ ବ୍ୟବହୃତ ପ୍ଲାଷ୍ଟିକ ନିଷିଦ୍ଧ ବୋଲି ସ୍ବୀକୃତି ପାଇସାରିଛି।
