ନୂଆଦିଲ୍ଲୀ,୫-୮: ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ)କୁ ୧ହଜାର ଟଙ୍କିଆ ନୋଟ୍ ଛାପିବା ପାଇଁ ଅନୁମତି ଦେଉଥିବା ୧୯୯୮ର ଉଚ୍ଚ ମୂଲ୍ୟର ସଂଶୋଧିତ ଆଇନକୁ ପାର୍ଲାମେଣ୍ଟ ରଦ୍ଦ କରିଦେଇଛି। ଅର୍ଥନୀତିରେ ନଗଦ ସଙ୍କଟ ଦୂର କରିବା ଲାଗି ସେତେବେଳେ କେନ୍ଦ୍ର ସରକାର ଏହି ଆଇନ ପ୍ରଣୟନ କରିଥିଲେ। ଏଥିସହ ବେକାର ହୋଇଯାଇଥିବା ୫୮ ପୁରୁଣା ଆଇନକୁ ରଦ୍ଦ କରିବାକୁ ଗତ ସପ୍ତାହରେ ପାର୍ଲାମେଣ୍ଟ ଅନୁମୋଦନ କରିଥିଲେ। ପୂର୍ବତନ ଅର୍ଥମନ୍ତ୍ରୀ ଯଶୋବନ୍ତ ସିହ୍ନା ଏହି ସଂଶୋଧନ ବିଲ୍କୁ ୧୯୯୮ ଡିସେମ୍ବରରେ ପାର୍ଲାମେଣ୍ଟରେ ଉପସ୍ଥାପନ କରିଥିଲେ। ଏହା ଅନୁମୋଦନ ଲାଭ କରିବା ପରେ ଆର୍ବିଆଇ ୧୦୦୦ ଟଙ୍କିଆ ନୋଟ୍ ଛାପିବା ଆରମ୍ଭ କରିଥିଲା। ଉଲ୍ଲେଖଥାଉ କି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏନ୍ଡିଏର ପ୍ରଥମ ଶାସନ କାଳରେ ୨୦୧୬ ନଭେମ୍ବରରେ ୫୦୦ ଓ ୧୦୦୦ ଟଙ୍କିଆ ନୋଟ୍କୁ ଅଚଳ କରିଦେଇଥିଲେ। ଏଥିସହିତ ସେ ନୂଆ ୫୦୦ ଓ ୨୦୦୦ ଟଙ୍କିଆ ନୋଟ୍ ପ୍ରଚଳନ ଘୋଷଣା କରିଥିଲେ। ବଜାରରେ ଅନ୍ୟ ମୂଲ୍ୟର ନୋଟ୍ ଉପରେ ଚାପ କମାଇବା ଲାଗି ସରକାର ସେତେବେଳେ ହଜାରେ ଟଙ୍କିଆ ନୋଟ୍ ପ୍ରଚଳନ କରିଥିଲେ।
