ବାଲେଶ୍ୱର ଅଫିସ,୨୯।୨- ରାଷ୍ଟ୍ରୀୟ କୃଷି ବିକାଶ ଯୋଜନା, କୃଷି ଓ କୃଷକ ସଶକ୍ତିକରଣ ବିଭାଗ, ଓଡ଼ିଶା ଏବଂ ଅନ୍ତରାଷ୍ଟ୍ରୀୟ ଶୁଷ୍କାଞ୍ଚଳ କୃଷି ଗବେଷଣା ସଂସ୍ଥା(ଆଇକାର୍ଡ଼ା) ନୂଆଦିଲ୍ଲୀ ଦ୍ୱାରା ଓଡ଼ିଶାର ବିଭିନ୍ନ ଅଞ୍ଚଳରେ ପରୀକ୍ଷାମୂଳକ ଭାବେ କରାଯାଉଥିବା କଣ୍ଟାବିହୀନ ନାଗଫେଣୀ ଏବଂ ଡାଲି ଜାତୀୟ ଫସଲର ବିଭିନ୍ନ କ୍ଷେତ୍ର ପରିଦର୍ଶନ କରାଯାଇଛି। ଆଇକାର୍ଡ଼ାର ଦିଲ୍ଲୀସ୍ଥିତ ମୁଖ୍ୟ କାର୍ଯ୍ୟାଳୟର ଆଞ୍ଚଳିକ ସଂଯୋଜକ ଡ. ଆଶୁତୋଷ ସର୍କାର ଏବଂ ଜୋର୍ଡ଼ାନ ଦେଶରୁ ଆସିଥିବା ଆନ୍ତର୍ଜାତିକ ନାଗଫେଣୀ ବିଶେଷଜ୍ଞ ଡ. ସସାନ ହୁସେନଙ୍କ ସମେତ ଆଇକାର୍ଡ଼ାର ରାଜ୍ୟ ପ୍ରତିନିଧି ଶନିବାର ବାଲେଶ୍ୱର ଜିଲାର ନୀଳଗିରି, ଔପଦା, ଜଳେଶ୍ୱର ଏବଂ ବାଲିଆପାଳ ବ୍ଲକର ବିଭିନ୍ନ କ୍ଷେତ୍ରମାନ ପରିଦର୍ଶନ କରିଥିଲେ। ବିଭିନ୍ନ ଅଞ୍ଚଳରେ ଏହି ଟିମ୍କୁ ସଂସ୍ଥା ଦ୍ୱାରା ପରିଚାଳିତ ଗ୍ରାମ୍ୟ କୃଷକ କମିଟି, ଗ୍ରାମ୍ୟ ବିହନ ଭଣ୍ଡାରର ସଦସ୍ୟାସଦସ୍ୟମାନଙ୍କ ଦ୍ୱାରା ପାରମ୍ପରିକ ରୀତିରେ ସ୍ବାଗତ କରାଯାଇଥିଲା। ଆଇକାର୍ଡ଼ାର କ୍ଷେତ୍ର ପରାମର୍ଶଦାତା ପ୍ରଶାନ୍ତ କୁମାର ପଟେଲଙ୍କ ତତ୍ତ୍ୱାବଧାନରେ ଜିଲା ସଂଯୋଜକ ଏବଂ କ୍ଷେତ୍ର ସହାୟକମାନଙ୍କ ସହାୟତାରେ ଦିବସବ୍ୟାପୀ ବିଭିନ୍ନ କ୍ଷେତ୍ରରେ ଆୟୋଜନ କରାଯାଇ ପରୀକ୍ଷାମୂଳକ ଚାଷ ଭାବରେ ଆରମ୍ଭ ହୋଇଥିବା କଣ୍ଟାବିହୀନ ନାଗଫେଣୀ ଏବଂ ଖେସାରୀ ଫସଲ ବାବଦରେ ଆଲୋଚନା କରିଥିଲେ। ଅନୁର୍ବର ପାହାଡ଼ିଆ ପତିତ ଜମିରେ ଏହାକୁ ଚାଷ କରାଯାଉଥିବା ବେଳେ ଏଥିରେ ଜଳସେଚନର ଆବଶ୍ୟକତା ପଡ଼ି ନ ଥାଏ। ଏହା ମୃତ୍ତିକା କ୍ଷୟ ରୋକିବାରେ ବିଶେଷ ଭୂମିକା ଗ୍ରହଣ କରୁଥିବା ବେଳେ କଣ୍ଟାବିହୀନ ନାଗଫେଣୀ ମୁଖ୍ୟତଃ ଗାଈ, ଗୋରୁ, ଛେଳି, ମେଣ୍ଢାଙ୍କ ପାଇଁ ଏକ ଉତ୍ତମ ଖାଦ୍ୟ ହୋଇଥାଏ। ଏହାର ଫଳ ସୁସ୍ବାଦୁ ଏବଂ ମନୁଷ୍ୟ ଖାଦ୍ୟପଯୋଗୀ ହୋଇଥାଏ। ଏହାର ଫୁଲ, ଫଳ, ପତ୍ର ବା କାଣ୍ଡରୁ ବିଭିନ୍ନ ପ୍ରସାଧନ ସାମଗ୍ରୀ, ଓଷଧ, ଖାଦ୍ୟପଦାର୍ଥ ତିଆରି ହୋଇଥାଏ। ଏହି କଣ୍ଟାବିହୀନ ନାଗଫେଣୀ ଗଛ ପାଖାପାଖି ୧୫ରୁ ୨୦ବର୍ଷ ପର୍ଯ୍ୟନ୍ତ ଅମଳ ଦେଇଥାଏ। ଏହି ଟିମ୍ ବିଭିନ୍ନ ଅଞ୍ଚଳରେ ଥିବା ଫାଉଣ୍ଡେଶନ ନର୍ସରୀ, ଜିପି ଟ୍ରାଏଲ ଫିଲ୍ଡ, ଫାର୍ମର ଫିଲ୍ଡମାନ ବୁଲି ଦେଖିବା ସହ ପରାମର୍ଶ ପ୍ରଦାନ କରିଥିଲେ।
