ନୂଆଦିଲ୍ଲୀ,୨୫-୯: ସ୍ବାସ୍ଥ୍ୟ ବୀମା ନେଉଥିବା ଗ୍ରାହକ ଏଣିକି ମାସିକ ଆଧାରରେ ବୀମା ପ୍ରିମିୟମ ଜମା କରିପାରିବେ। ଇନ୍ସ୍ୟୁରାନ୍ସ ରେଗୁଲେଟୋରି ଆଣ୍ଡ ଡେଭଲପ୍ମେଣ୍ଟ ଅଥରିଟି ଅଫ୍ ଇଣ୍ଡିଆ(ଆଇଆର୍ଡିଏ) ପକ୍ଷରୁ ନିୟମରେ ପରିବର୍ତ୍ତନ କରାଯାଇ ନିର୍ଦ୍ଦେଶ ଜାରି କରାଯାଇଛି। ସ୍ବାସ୍ଥ୍ୟ ବୀମା ପଲିସି ବିକ୍ରି କରୁଥିବା ସାଧାରଣ ବୀମା କମ୍ପାନୀଙ୍କ କ୍ଷେତ୍ରରେ ମଧ୍ୟ ଏହି ନୂଆ ନିୟମ ଲାଗୁ ହେବ। ଆଇଆର୍ଡିଏ ପକ୍ଷରୁ ନୂଆ ସର୍କୁଲାର ଜାରି କରାଯାଇଛି।
ଆଇଆର୍ଡିଏ ନିଜର ନିର୍ଦ୍ଦେଶରେ କହିଛି ଯେ, ଏବେ କୌଣସି ଗ୍ରାହକ ସାଧାରଣ ଅଥବା ସ୍ବାସ୍ଥ୍ୟ ବୀମା କମ୍ପାନୀଙ୍କଠାରୁ ମାସିକ, ତ୍ରୈମାସିକ ଅଥବା ୬ ମାସ ଆଧାରରେ ବୀମା ପ୍ରିମିୟମ ପୈଠ କରିପାରିବେ। ଏହାଛଡ଼ା ବାର୍ଷିକ ପ୍ରିମିୟମ ମଧ୍ୟ ଦେଇ ହେବ। ଏଥିସହିତ ବୀମା କମ୍ପାନୀ ପଲିସି ଡକ୍ୟୁମେଣ୍ଟକୁ ଛୋଟ ପରିବର୍ତ୍ତନ କରିପାରିବେ। ଏହାଦ୍ୱାରା ବୀମାଧାରୀଙ୍କୁ ପଲିସି ସମ୍ପର୍କରେ ଠିକ୍ ତଥ୍ୟ ମିଳିପାରିବ। ତେବେ ଏହାଦ୍ୱାରା ବୀମା ପଲିସି କଭରେଜ ନିୟମ ଓ ସର୍ତ୍ତରେ କୌଣସି ପ୍ରକାର ସଂଶୋଧନ କରାଯାଇପାରିବ ନାହିଁ ବୋଲି ସର୍କୁଲାରରେ କୁହାଯାଛି। ସେହିପରି ୬୫ ବର୍ଷରୁ ଊର୍ଦ୍ଧ୍ୱ ବୟସର ବ୍ୟକ୍ତି ମଧ୍ୟ ବୀମା କିଣିପାରିବେ। ଏଥିପାଇଁ ବୀମା କମ୍ପାନୀଙ୍କୁ ଆଇଆର୍ଡିଏର ପ୍ରାକ୍ ଅନୁମତି ନେବାକୁ ହେବ। କମ୍ପାନୀଗୁଡ଼ିକ ପ୍ରିମିୟମ ରାଶିକୁ ୧୫ ପ୍ରତିଶତ ବଢ଼ାଇ ଅଥବା ହ୍ରାସ କରିପାରିବେ। ଆଇଆର୍ଡିଏ ପଲିସିଧାରୀଙ୍କୁ ବଡ଼ ଫାଇଦା ଦେବାକୁ ଯାଇ କହିଛନ୍ତି ଯେ, କମ୍ପାନୀ ଚାହିଁଲେ ନିଜର ଯେକୌଣସି ପଲିସିରେ ଗମ୍ଭୀର ରୋଗକୁ ଯୋଡି ପାରିବେ। ପୂର୍ବରୁ ଏହି ବ୍ୟବସ୍ଥା ନ ଥିଲା। ତେବେ ଏଥିଲାଗି ସେମାନଙ୍କୁ ସମସ୍ତ ଷ୍ଟେକ୍ ହୋଲ୍ଡର୍ସଙ୍କ ଠାରୁ ଅନୁମତି ନେବାକୁ ହେବ। ଏଥିଯୋଗୁ ପ୍ରିମିୟମ ରାଶି ଅପରିବର୍ତ୍ତିତ ରହିବ। ୮ ପୃଷ୍ଠାର ଏହି ସର୍କୁଲାର ସମ୍ପର୍କରେ ବଜାଜ୍ ଆଲିଆଞ୍ଜର ରିଟେଲ ହେଲ୍ଥ ମୁଖ୍ୟରଶ୍ମୀ ନନ୍ଦଗୀ କହିଛନ୍ତି ଯେ, ଆଇଆର୍ଡିଏ ଦ୍ୱାରା ସଂଶୋଧିତ ନିୟମକୁ ସେ ସ୍ବାଗତ କରୁଛନ୍ତି। ଏହାଦ୍ୱାରା ବୀମା ଉତ୍ପାଦର ବିକ୍ରି ବଢ଼ିବ ଓ ଉତ୍ପାଦ ଅଧିକ ସ୍ବଚ୍ଛ ହେବ। ଫଳରେ ଉଭୟ ବୀମା କମ୍ପାନୀ ଓ ଗ୍ରାହକଙ୍କୁ ଫାଇଦା ମିଳିବ। ଏଥିସହିତ କମ୍ପାନୀଙ୍କୁ ପଲିସିରେ କୌଣସି ପ୍ରକାର ସଂଶୋଧନ କରିବା ଲାଗି ଅଧିକ ସମୟ ଲାଗିବ ନାହିଁ। ତେବେ ଆଇଆର୍ଡିଏ ପକ୍ଷରୁ ଏହା ମଧ୍ୟ ସ୍ପଷ୍ଟ କରାଯାଇଛି ଯେ, କୌଣସି ବୀମା ଉତ୍ପାଦ ଶୁଭାରମ୍ଭ ହେବାର ୩ ବର୍ଷ ପରେ ହିଁ ବୀମା ପ୍ରିମିୟମରେ ସଂଶୋଧନ ହୋଇପାରିବ।
