ନୂଆଦିଲ୍ଲୀ,୨୬।୩(ପି.ଟି.)- ୨୦୨୦ ଟୋକିଓ ଅଲିମ୍ପିକ୍ସ ପରେ ଯେଉଁ କୋଚ୍ମାନଙ୍କ କାର୍ଯ୍ୟକାଳ ଶେଷ ହେବାର ଥିଲା ସେମାନଙ୍କ ଚୁକ୍ତି ମିଆଦ ବୃଦ୍ଧି କରାଯିବ। ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇବାକୁ ଅନ୍ତଜାତୀୟ ଅଲିମ୍ପିକ୍ କମିଟି (ଆଇଓସି) ନିଷ୍ପତ୍ତି ନେବା ପରେ କୋଚ୍ମାନେ ଦାୟିତ୍ୱରେ ରହିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା। ତେବେ ଅଲିମ୍ପିକ ପ୍ରସ୍ତୁତି ପାଇଁ କୋଚ୍ମାନେ ଆହୁରି ଗୋଟିଏ ବର୍ଷ ଦାୟିତ୍ୱରେ ରହି ଖେଳାଳିମାନଙ୍କୁ ପ୍ରଶିକ୍ଷଣ ଦେବେ।
ଏହି କୋଚ୍ମାନଙ୍କ ମଧ୍ୟରେ ସାମିଲ ରହିଛନ୍ତି ମହିଳା ରେସଲିଂ କୋଚ୍ ଆଣ୍ଡ୍ୟୁ କୁକ୍, ଶୁଟିଂ କୋଚ୍ ପାଭେଲ ମୀରନୋଭ, ଦୁଇ ବକ୍ସିଂ କୋଚ୍ ସାଣ୍ଟିଆଗୋ ନିଏଭା ଓ ରାଫାଏଲେ ବେର୍ଗାମାସ୍କୋ, ଆଥଲେଟିକ୍ସ ହାଇ ପରଫର୍ମାନ୍ସ ଡିରେକ୍ଟର ଭୋଲକେର ହରମ୍ୟାନ। ଏମାନଙ୍କର ଚୁକ୍ତି ଅଲିମ୍ପିକ୍ସ ପରେ ଶେଷ ହେବାର ଥିଲା। ସ୍ପୋଟର୍ସ ଅଥରିଟୀ ଅଫ୍ ଇଣ୍ଡିଆ (ସାଇ) କୋଚ୍ମାନଙ୍କ ପାଉଣା ପ୍ରଦାନ କରିଥାଏ। କ୍ରୀଡ଼ା ଓ ଖେଳାଳିମାନଙ୍କ ସ୍ବାର୍ଥକୁ ଲକ୍ଷ୍ୟ କରି କୋଚ୍ଙ୍କ ଚୁକ୍ତି ମିଆଦ ବୃଦ୍ଧି କରାଯିବାରେ କୌଣସି ସମସ୍ୟା ନାହିଁ ରେସଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ସମ୍ପାଦକ ଭି.ଏନ. ପ୍ରସୁଦ କହିଛନ୍ତି।
କେନ୍ଦ୍ର ସରକାରଙ୍କ ଦ୍ୱାରା ଜାରି କରାଯାଇଥିବା ୨୧ ଦିନିଆ ଲକ୍ ଡାଉନ ସମାପ୍ତ ହେଲେ ସ୍ଥିତି ସ୍ପଷ୍ଟ ହେବ ବୋଲି ପ୍ରସୁଦ କହିଛନ୍ତି। ସେହିପରି ନ୍ୟାଶନାଲ ରାଇଫଲ ଆସୋସିଏଶନ ଅଫ୍ ଇଣ୍ଡିଆ (ଏନ୍ଆରଏଆଇ), ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ) ମଧ୍ୟ ସମାନ ମତ ପୋଷଣ କରିଛନ୍ତି। ଯେଉଁ ବିଦେଶୀ କୋଚ୍ମାନେ ଆମ ସହିତ ଜଡିତ ରହିଆସୁଛନ୍ତି ସେମାନଙ୍କ କାର୍ଯ୍ୟକାଳ ବୃଦ୍ଧି କରାଯିବ ବୋଲି ବିଏଫ୍ଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ଆଗାମୀ କେତେ ସପ୍ତାହ ମଧ୍ୟରେ ଏ ନେଇ ଲେଖାପଢା ହେବ ବୋଲି ଆଥଲେଟିକ୍ସ ଫେଡେରେଶନ ଅଫ୍ ଇଣ୍ଡିଆ (ଏଏଫଆଇ) ଅଧ୍ୟକ୍ଷ ଆଦିଲ ସୁମରିଓ୍ବାଲା କହିଛନ୍ତି।
ସେହିପରି ପୁରୁଷ ଓ ମହିଳ ହକି ଦଳର ବିଦେଶୀ କୋଚ୍ ଓ ସମସ୍ତ ସପୋର୍ଟ ଷ୍ଟାଫ୍ଙ୍କ ଚୁକ୍ତି ବୃଦ୍ଧି କରିବାକୁ ସାଇକୁ ଅନୁରୋଧ କରାଯାଇଛି ବୋଲି ହକି ଇଣ୍ଡିଆ ମୁଖ୍ୟ କାର୍ଯ୍ୟନିର୍ବାହୀ ଏଲିନା ନର୍ମାନ କହିଛନ୍ତି। ସବୁ ବିଦେଶୀ କୋଚ୍ଙ୍କ ସହ ଆମେ ଆଲୋଚନ କରିଛୁ ଓ ସେମାନେ ଟୋକିଓ ଅଲିମ୍ପିକ୍ସ ପର୍ଯ୍ୟନ୍ତ କାର୍ଯ୍ୟ କରିବାକୁ ସମର୍ପିତ ବୋଲି ନର୍ମାନ କହିଛନ୍ତି। ଏପର୍ଯ୍ୟନ୍ତ ଅଲିମ୍ପିକ୍ସ ପାଇଁ ୮୦ଜଣ ଭାରତୀୟ ଆଥଲେଟ୍ ଯୋଗ୍ୟତା ହାସଲ କରିଛନ୍ତି। ଅଲିମ୍ପିକ୍ସ ଯୋଗ୍ୟତା ପର୍ଯ୍ୟାୟ ଆରମ୍ଭ ହେଲେ ଅଲିମ୍ପିକ୍ସରେ ସାମିଲ ହେବାକୁ ଥିବା ଭାରତୀୟ ଆଥଲେଟମାନଙ୍କ ସଂଖ୍ୟା ବୃଦ୍ଧି ପାଇବ ବୋଲି ସେ କହିଛନ୍ତି।
