ମୁମ୍ବାଇ,୬-୧୨: ରିଜର୍ଭ ବ୍ୟାଙ୍କ ଗୁରୁବାର ରେପୋ ରେଟକୁ ଅପରିବର୍ତ୍ତିତ ୫.୧୫% ରଖିଛି। ଜିଡ଼ିପି ଅଭିବୃଦ୍ଧିକୁ ଧ୍ୟାନରେ ରଖି ଏହାର ପଦକ୍ଷେପ ଧାରାକୁ ବଜାୟ ରଖିବା ଉପରେ କେନ୍ଦ୍ରୀୟ ବ୍ୟାଙ୍କ ଗୁରୁତ୍ୱାରୋପ କରିଛି। ଏପରି ସ୍ଥିତିରେ ୨୦୧୯-୨୦ ଆର୍ଥତ୍କ ବର୍ଷ ଲାଗି ଭାରତର ଜିଡିପି ଅଭିବୃଦ୍ଧି ୫% ରହିବ ବୋଲି ଏହା ପରିବର୍ତ୍ତିତ ପୂର୍ବାନୁମାନରେ ପ୍ରକାଶ କରିଛି। ଚଳିତ ଆର୍ଥତ୍କ ବର୍ଷ ଜିଡିପି ଅଭିବୃଦ୍ଧି ୬.୧% ରହିବ ବୋଲି କେନ୍ଦ୍ରୀୟ ବ୍ୟାଙ୍କ କହିଥିଲା। ସୁଧ ହାରରେ ହ୍ରାସରେ ବର୍ତ୍ତମାନ ଲାଗିଥିବା ବିରତି କ୍ଷଣସ୍ଥାୟୀ ବୋଲି ଗଭର୍ନର ଶକ୍ତିକାନ୍ତ ଦାସ କହିଛନ୍ତି। ଚଳିତ ବର୍ଷ ମୋଟ ୫ ଥରରେ ହ୍ରାସ ହୋଇଥିବା ୧୩୫ ବେସିସ୍ ପଏଣ୍ଟ ରେପୋର ପ୍ରଭାବ ଅର୍ଥନୀତି ଉପରେ କଣ ରହୁଛି ତାର ତର୍ଜମା କରାଯିବ। ବ୍ୟାଙ୍କଗୁଡିକ ବର୍ତ୍ତମାନ ୪୪ ବେସିସ ପଏଣ୍ଟ ପର୍ଯ୍ୟନ୍ତ ସୁଧହାର ହ୍ରାସର ଲାଭ ଗ୍ରାହକଙ୍କୁ ଦେଇଥିବା ସେ କହିଛନ୍ତି। ସବୁ ସମୟରେ ସୁଧ ହାର ହ୍ରାସ କରାଯାଇ ପାରିବ ନାହିଁ। କେନ୍ଦ୍ରୀୟ ବ୍ୟାଙ୍କ ଏବଂ ସରକାର ଗ୍ରହଣ କରିଥିବା ବିଭିନ୍ନ ପଦକ୍ଷେପର ପ୍ରଭାବ କଣ ରହୁଛି ତାର ବିଚାର କରାଯାଉଥିବା ସେ ମତ ରଖିଛନ୍ତି।
ସେ ପୁଣି କହିଛନ୍ତି ଯେ, ସରକାର ଗ୍ରହଣ କରିଥିବା ପଦକ୍ଷେପ ଗ୍ରାହକଙ୍କ ମନୋଭାବରେ ପରିବର୍ତ୍ତନ ଆଣିବା ଏବଂ ଚାହିଦା ବଢାଇବା ଦିଗରେ କାର୍ଯ୍ୟ କରୁଛି। ଅଭିବୃଦ୍ଧିକୁ ନଜରରେ ରଖି ବିତ୍ତୀୟ ଏବଂ ମୁଦ୍ରାନୀତି କ୍ଷେତ୍ରରେ କାର୍ଯ୍ୟପନ୍ଥା ଗ୍ରହଣ କରାଯାଉଛି। ସରକାର ବିତ୍ତୀୟ ନିୟଣ୍ଟ ଧାର୍ଯ୍ୟ ଲକ୍ଷ୍ୟକୁ ହାସଲ ନ କରି ପାରିଲେ ମଧ୍ୟ କେନ୍ଦ୍ରୀୟ ବ୍ୟାଙ୍କ ଏଥିଲାଗି ଚିନ୍ତିତ ନୁହେଁ। ଆସନ୍ତା ଫେବୃୟାରୀରେ ସରକାରଙ୍କ ବଜେଟ ଏବଂ ଡାଟା ଆସିଲା ପରେ ପୁଣି ଥରେ ସୁଧ ହାର ହ୍ରାସ ନେଇ ବିଚାର କରାଯିବ ବୋଲି ସେ ଗୁରୁତ୍ୱାରୋପ କରିଛନ୍ତି। ବାରମ୍ବାର ସୁଧହାର ହ୍ରାସ କରିବା ଅପେକ୍ଷା ବର୍ତ୍ତମାନ ଯାଏ ଯାହା ପଦକ୍ଷେପ ନିଆଯାଇଛି ତାର ପ୍ରଭାବକୁ ବିଚାର କରି ପରବର୍ତ୍ତୀ ଯୋଜନା ହାତକୁ ନିଆଯିବ ବୋଲି ସେ ସ୍ପଷ୍ଟ କରିଛନ୍ତି। ଅକ୍ଟୋବରରେ ମୁଦ୍ରାସ୍ପୀତି ୪.୬% ରହିଛି ଯାହା କେନ୍ଦ୍ରୀୟ ବ୍ୟାଙ୍କ ଧାର୍ଯ୍ୟ ଲକ୍ଷ୍ୟଠାରୁ ଅଧିକ। ଏହାକୁ ବିଚାର କରି ଚଳିତ ବର୍ଷ ଦ୍ୱିତୀୟାର୍ଦ୍ଧ ଲାଗି ମୁଦ୍ରାସ୍ଫୀତି ପୂର୍ବାନୁମାନକୁ ୫.୧-୪.୭% କରିଛି। ଏହା ପୂର୍ବରୁ ୩.୫-୩.୭% ରହିଥିଲା। ପ୍ରଥମଥର ଲାଗି ଅକ୍ଟୋବରର ମୁଦ୍ରାସ୍ଫୀତି ମଧ୍ୟମମିଆଦୀ ଲକ୍ଷ୍ୟଠାରୁ ଟପି ୪% ଟପିିଛି। ପିଆଜ ଏବଂ ଟମୋଟୋ ଭଳି ପନିପରିବା ଦର ବଢିବା ଯୋଗୁ ମୁଦ୍ରାସ୍ଫୀତି ବଢିଥିବା ଗଭର୍ନର ଦାସ ମତ ରଖିଛନ୍ତି।
