ବ୍ରହ୍ମପୁର ଅଫିସ,୧୭ା୧୨-ବ୍ରହ୍ମପୁର ରେଳଷ୍ଟେଶନ ଉପରେ ଦକ୍ଷିଣ ଓଡ଼ିଶାର ବିଭିନ୍ନ କୋଣ ଅନୁକୋଣରୁ ଆସୁଥିବା ଯାତ୍ରୀମାନେ ନିର୍ଭର କରୁଛନ୍ତି। ପ୍ରତିଦିନ ଏହି ଷ୍ଟେଶନର ଉଭୟ ପଟୁ ଶତାଧିକ ଟ୍ରେନ ଚଳପ୍ରଚଳ ହେଉଛି। ରାଜସ୍ବ ଅଦାୟରେ ଏହି ଷ୍ଟେଶନ ଓଡ଼ିଶାରେ ଏକ ପ୍ରମୁଖ ସ୍ଥାନରେ ରହିଛି। ଏହା ସତ୍ତ୍ବେ ମଧ୍ୟ ଅବହେଳିତ ହୋଇ ରହିଛି। ପଡ଼ୋଶୀ ବିଶାଖାପାଟଣାମ୍ ଓ ଭୁବନେଶ୍ୱର ରେଳଷ୍ଟେଶନ ଭଳି ସୁବିଧା ଓ ସୌନ୍ଦର୍ଯ୍ୟକରଣରେ ବହୁ ପଛରେ ପଡିଛି। ଏଠାରେ ୪ ପ୍ଲାଟଫର୍ମ ରହିଛି। ସେହିପରି ୪ ପାଦ ଚଲା ପୋଲ, ଗୋଟିଏ ଏସ୍କାଲେଟର ଶୌଚାଳୟ ସହିତ ଯାତ୍ର୍ରୀଙ୍କ ପାଇଁ କେତେକ ସୁବିଧା ସୁଯୋଗ ରହିଛି। ଷ୍ଟେଶନରେ ପାର୍କିଂ, ସୌନ୍ଦର୍ଯ୍ୟକରଣ ବ୍ୟବସ୍ଥା, ଲିଫ୍ଟ ନ ଥିବା ବେଳେ ଜନ ଆହାରକେନ୍ଦ୍ର ଠିକ୍ ଭାବେ କାମ କରୁନାହିଁ, ଅବ୍ୟବସ୍ଥା ଘେରରେ ଶୌଚାଳୟ ରହିଛି। ଆବଶ୍ୟକ ବିଶ୍ରାମାଗାର ନାହିଁ, ଏସ୍କାଲେଟର ଠିକ୍ ଭାବେ କାମ କରୁନାହିଁ। ଏଭଲି ଅନେକ ସମସ୍ୟା ଲାଗି ରହିଛି। ୧୮୯୬ରେ ନିର୍ମିିତ ହୋଇଥିବା ଏହି ପୁରାତନ ରେଳଷ୍ଟେଶନଟି ଇଷ୍ଟକୋଷ୍ଟ ରେଲୱେ ଖୋର୍ଦ୍ଧା ଡିଭିଜନ ଅଧୀନରେ ରହିଛି।
ସୂଚନା ଅନୁଯାୟୀ, ଏହି ଷ୍ଟେଶନ ଦେଇ ଶତାଧିକ ରେଳ ଯାତାୟାତ କରୁଥିବା ବେଳେ ପ୍ରାୟ ୧୨ ହଜାର ଯାତ୍ରୀ ଏଠାକୁ ଆସୁଛନ୍ତି। ସାଧାରଣ ସରଂକ୍ଷଣ ଓ ପ୍ଲାଟଫର୍ମ ଟିକେଟକୁ ମିଶାଇ ପ୍ରାୟ ୧୫ ଲକ୍ଷ ଟଙ୍କା ଆଦାୟ କରାଯାଉଥିବା ଜଣାପଡିଛି। ବିଗତ ଦିନଗୁଡିକରେ ରେଳ ବିଭାଗ ତରଫରୁ ନିଆଯାଇଥିବା କେତେକ ଆଧୁନିକୀକରଣ ପଦକ୍ଷେପ ଯଥା ଷ୍ଟେଶନରେ ସିସି ଟିଭି କେମେରା, ବରିଷ୍ଠ ଓ ଦିବ୍ୟାଙ୍ଗମାନଙ୍କ ପାଇଁ ଲିଫ୍ଟ ଆଦି କାମ ବାକି ରହିଛି। ୪ ନମ୍ବର ପ୍ଲାଟଫର୍ମରେ ସବୁ ପ୍ରକାର ଗାଡି ରହୁ ନ ଥିବାରୁ ସେହିବାଟ ଦେଇ ଆସୁଥିବା ଯାତ୍ରୀମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ବିଶେଷକରି ବରିଷ୍ଠ ନାଗରିକ ଓ ଦିବ୍ୟାଙ୍ଗମାନେ ଅଧିକ ଅସୁବିଧା ଭୋଗୁଛନ୍ତି। ୪ ନମ୍ବର ଷ୍ଟେଶନ ନିକଟରେ ଗତ ୩ ତାରିଖ ରାତିରେ ଜଣେ ଯୁବକଙ୍କ ଗଳା କାଟି ହତ୍ୟା କରାଯାଇଥିଲା। ପ୍ଲାଟଫର୍ମରେ ସିସି ଟିଭି କ୍ୟାମେରା ଲାଗି ନ ଥିବାରୁ ଅଭିଯୁକ୍ତଙ୍କୁ ଚିହ୍ନଟ କରିବାରେ ପୋଲିସ ଅସୁବିଧାର ସମ୍ମୁଖୀନ ହୋଇଥିଲା। ଏନେଇ ଷ୍ଟେଶନ ପ୍ରବନ୍ଧକ ଦୁର୍ଗା ପ୍ରସାଦ ବ୍ରହ୍ମା କୁହନ୍ତି, ଷ୍ଟେଶନରେ ଲାଗି ରହିଥିବା ସମସ୍ୟାଗୁଡିକର ସମାଧାନ ଦିଗରେ ଏବେ ପଦକ୍ଷେପ ନିଆଯାଉଛି। ସିସି ଟିଭି କେମେରାଗୁଡିକ ଆଗକୁ ଅଧିକ କ୍ରିୟାଶୀଳ କରାଯିବ। ପ୍ଲାଟଫର୍ମରେ ଲିଫ୍ଟ କାମ ଚାଲିଛି। ସେହିଭଳି ବାହାରେ ଯାତ୍ରୀମାନଙ୍କ ସୁବିଧା ପାଇଁ ଗୋଟିଏ ସୁଲଭ ଶୌଚାଳୟ, ପାର୍କିଂ ପାଇଁ ସେଡ଼ ବ୍ୟବସ୍ଥା, ଯାତ୍ରୀଙ୍କ ରହଣି ପାଇଁ ସେଡ଼ ଭଳି ଅନେକ ଯୋଜନା ରହିଛି ।
