ଖୋର୍ଦ୍ଧା ଅଫିସ,୨୨ା୮: ଖୋର୍ଦ୍ଧା ଜିଲା ବାଣପୁର ଥାନାର ହରିଚନ୍ଦନପୁର। ଏଠାରେ ଭାଇ ଭଉଣୀଙ୍କୁ ବିବାହ କରିବା ଘଟଣା ଚର୍ଚ୍ଚାର କାରଣ ପାଲଟିଛି। ଶିକ୍ଷୟିତ୍ରୀ ଭଉଣୀଙ୍କୁ ଅପହରଣ କରି ବିବାହ କରିଛନ୍ତି ବିବାହିତା ବଡବାପା ପୁଅ ଭାଇ। ଭାଇ ଓ ଭଉଣୀଙ୍କ କାରନାମାକୁ ପ୍ରତିବାଦ କରିବାରୁ ଶିକ୍ଷୟିତ୍ରୀଙ୍କ ବାପ ଘରର ଲୋକେ ୩ବର୍ଷ ହେଲା ନିର୍ଯାତନା ପାଇ ଅଭିଶପ୍ତ ଜୀବନଯାପନ କରୁଛନ୍ତି। ଭାଇ ଭାଉଣୀର କାରନାମାକୁ ପ୍ରତିବାଦର ଫଳ ଗଁ।ରେ ବିଭିନ୍ନ ସମୟରେ କଙ୍ଗାରୁ କୋର୍ଟ କରାଯାଇ ଦଣ୍ଡ ଓ ଜରିମାନା କରାଯାଇଛି। ଏଭଳିସ୍ଥଳେ ବାସନ୍ଦ ପରିବାର ବୁଧବାର ଖୋର୍ଦ୍ଧା ଜିଲାପାଳ ଓ ଏସ୍ପିଙ୍କୁ ଭେଟି ନ୍ୟାୟ ଭିକ୍ଷା କରିଛନ୍ତି। ନିର୍ଯାତନାରୁ ରକ୍ଷା ସହ ମାନସିକ ଶାନ୍ତି ପାଇଁ ହସ୍ତକ୍ଷେପ କରିବାକୁ ନିବେଦନ କରିଛନ୍ତି।
ଅଭିଯୋଗ ଅନୁସାରେ, ହରିଚନ୍ଦନପୁର ଗଁ।ର କପିଳେନ୍ଦ୍ର ନାୟକ ଜଣେ ଅବସରପ୍ରାପ୍ତ ଶିକ୍ଷକ। ଶିକ୍ଷକତାରୁ ଅବସର ନେଇଥିଲେ ହେଁ ଝିଅଙ୍କୁ ଶିକ୍ଷୟିତ୍ରୀ କରାଇବାରେ ସଫଳ ହୋଇଥିଲେ। ଝିଅଙ୍କୁ ୨୯ ବର୍ଷ ହୋଇଥିଲେ ମଧ୍ୟ ବିବାହ ହୋଇ ପାରୁ ନ ଥିଲା। ଝିଅଙ୍କ ବିବାହ ବଡବାପା ପୁଅ ଭାଇ ଭାଙ୍ଗି ଦେଉଥିଲେ। ଏକଥା କପିଳେନ୍ଦ୍ର ଜାଣି ପାରି ନ ଥିଲେ। ମାନସିକ ଚାପରେ ଥିବା କପିଳେନ୍ଦ୍ର ଝିଅଙ୍କ ମତାମତକ୍ରମେ ସିକୋ ଗଁ।ରେ ୨୦।୭।୧୬ରେ ବିବାହ କରିବାକୁ ସ୍ଥିର କରିଥିଲେ। ତେବେ ବିବାହ ଲାଗି ଛୁଟି ମଞ୍ଜୁର ଉଦ୍ଦେଶ୍ୟରେ ବାପ ଝିଅ ୧୬।୭।୧୬ରେ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଯିବାକୁ ନିଷ୍ପତ୍ତି ହୋଇଥିଲା। ତେବେ ସକାଳ ୮ଟାରେ ସ୍କୁଲକୁ ଯିବାରେ ଜଣାପଡିଥିଲା ଝିଅଙ୍କୁ କେହି ଅପହରଣ କରି ନେଇଛନ୍ତି। ପ୍ରଧାନ ଶିକ୍ଷକ ଶିକ୍ଷୟିତ୍ରୀଙ୍କ ସମ୍ପର୍କରେ କିଛି କହି ନ ଥିଲେ। ପରେ ବାଣପୁର ଥାନାରେ ଝିଅଙ୍କ ନିଖୋଜ ସମ୍ପର୍କରେ ଅଭିଯୋଗ ହୋଇଥିଲା। ପୋଲିସ ଅଭିଯୋଗ ରଖି ଚୁପ ହୋଇ ରହିଗଲା। ତେବେ ଶିକ୍ଷୟିତ୍ରୀ ଭଉଣୀଙ୍କୁ ବଡବାପା ପୁଅ ଭାଇ ଅପହରଣ କରି ବିବାହ କରିଥିବା ଜଣାପଡିଥିଲା। ଏକଥା ଜଣାପଡିବା ପରେ ଗଁ।ରେ କଙ୍ଗାରୁ କୋର୍ଟ ବସି କପିଳେନ୍ଦ୍ର ପରିବାରକୁ ୧ ଲକ୍ଷ ଟଙ୍କା ଜରିମାନା ସହ ବାସନ୍ଦ କରିଦେଲେ। ଭୁଲ ଥିଲା ଭଉଣୀ ସହ ଭାଇର ବିବାହକୁ ପ୍ରତିବାଦ କରିବା। ପରେ ଝିଅ ୧୮।୧୦।୨୦୧୬ରେ କାର୍ଯ୍ୟରେ ଯୋଗ ଦେଲେ। ହେଲେ ଝିଅ ଅପହରଣକାରୀଙ୍କ ସପକ୍ଷରେ ରହିଲେ। ଝିଅ ଅପହରଣ, ସ୍କୁଲରେ ଯୋଗ ଦେବା ଓ କଙ୍ଗାରୁ କୋର୍ଟ ସମ୍ପର୍କରେ ଥାନାରେ ଅଭିଯୋଗ କରିବା ପରେ କେବଳ ଚୁକ୍ତିନାମା ଲେଖାଇ ଆଉ ବାସନ୍ଦ ନ କରିବାକୁ ପୋଲିସ ପରାମର୍ଶ ଦେଇଥିଲେ। ହେଲେ ପୋଲିସର ଚୁକ୍ତିନାମାକୁ ଶୀତଳଭଣ୍ଡାରକୁ ଫୋପାଡି ପୁଣି ବାସନ୍ଦ କରାଯାଇଛି। ଗଁ। ଦାଣ୍ଡରେ ଗଲେ ଚୁଗୁଲି, ଅଶ୍ଳୀଳ ଗାଳିଗୁଲଜ, ମାରପିଟ୍ କରାଯାଉଛି। କବାଟ ଭାଙ୍ଗି ଘରେ ପଶି ସାନପୁଅଙ୍କୁ ଉଠାଇ ନେଇ ମାରପିଟ୍ କରାଗଲା। ଘର ଆଗରେ ବାଡ, ପ୍ରାଚୀର କରିଦେଲେ। ଦାଣ୍ଡକୁ ଯାଉଥିବା ଅଗଣା ପାଣିର ନାଳ ମୁହଁରେ ସିମେଣ୍ଟ କଂକ୍ରିଟ କରି ବନ୍ଦ କରିଦେଲେ। ପୁଅ କରିଥିବା ଗ୍ରାହକ ସେବା କେନ୍ଦ୍ର ଭଙ୍ଗାରୁଜା କଲେ। ଗୁଳି କରି ଘର ପୋଡିଦେବୁ ଧମକ ମିଳୁଛି। ପୋଲିସ ଝିଅ ଅପହରଣ ପରେ ବିବାହ ସମୟରେ ସାବାଳକ ହୋଇଥିବାରୁ କୌଣସି ମାମଲା ରୁଜୁ କରି ନ ଥିଲା। ପରେ ଅଭିଯୋଗ ମୁତାବକ ପୋଲିସ ଦଫା ୧୦୭ରେ ନଂ. ୭୪/୧୯ରେ, ଦଫା ୩୪୧, ୨୯୪, ୩୨୩, ୩୭୯, ୪୨୭, ୪୪୮, ୫୦୬, ୩୪ ଆଇପିସି, ୨୭ ଆମର୍ସ ଆକ୍ଟରେ ୨୨୦/୧୯ରେ ମାମଲା ରୁଜୁ କରି ଚୁପ ହୋଇ ବସି ରହିଛି। ସେପଟେ ଗୋଟିଏ ପରେ ଗୋଟିଏ ମିଥ୍ୟା କେଶ ପାଇଁ ଅଭିଯୋଗ ଚାଲିଛି। ଏବେ କୋର୍ଟରେ ମକଦ୍ଦମା କରିବାକୁ ଯୋଜନା ଚାଲିଛି।
