ଚେନ୍ନାଇ,୪।୫ (ପି.ଟି.): ଚେସ୍ କେରଳ ଦ୍ୱାର ଆୟୋଜିତ ଏକ ଅନ୍ ଲାଇନ୍ ବ୍ଲିଜ୍ ଚେସ୍ ଟୁର୍ନାମେଣ୍ଟରୁ ୪ ଲକ୍ଷ ଟଙ୍କାର ପାଣ୍ଠି ସଂଗ୍ରହ କରାଯାଇଛି। ଏହି ଅର୍ଥ କେରଳ ମୁଖ୍ୟମନ୍ତ୍ରୀଙ୍କ ଡିଷ୍ଟ୍ରେସ୍ ରିଲିଫ୍ ଫଣ୍ଡକୁ ପ୍ରଦାନ କରାଯିବ। କରୋନା ଭାଇରସ ମହାମାରୀ ବିରୋଧରେ ଲଢେଇ ପାଇଁ ଆୟୋଜିତ ହୋଇଥିବା ଏହି ‘ଚେକ୍ମେଟ୍ କୋଭିଡ-୧୯ ବ୍ଲିଜ୍ ଓପନ୍’ରେ ଗ୍ରାଣ୍ଡ ମାଷ୍ଟା ଏସ୍ଏଲ୍ ନାରାୟନନ ଟାଇଟଲ ହାସଲ କରିଛନ୍ତି। ଏହି ଟୁର୍ନାମେଣ୍ଟ ସମାଜମଙ୍ଗଳ ଉଦ୍ଦ୍ୟେଶରେ ଆୟୋଜିତ ହୋଇଥିଲା ଓ ଏଥିରେ ଚାମ୍ପିୟନ ହୋଇଥିବାରୁ ବହୁତ ଆନନ୍ଦିତ ବୋଲି ନାରାୟନନ ଟୁଇଟ କରି କହିଛନ୍ତି। ପୁରସ୍କାର ରାଶି ରୂପେ ତାଙ୍କୁ ୧୨,୦୦୦ ଟଙ୍କା ପ୍ରଦାନ କରାଯାଇଛି। ସେହିପରି ରାଜ୍ୟଗୋଷ୍ଠୀ କ୍ରୀଡ଼ା ଚାମ୍ପିୟନ ଅଭିଜିତ୍ ଗୁପ୍ତା ଦ୍ୱିତୀୟ ସ୍ଥାନ ଅଧିକାର କରି ୮,୦୦୦ ଟଙ୍କା ପୁରସ୍କାର ପାଇଛନ୍ତି। ନିଜର ପୁରସ୍କାର ରାଶିକୁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ପ୍ରଦାନ କରିବାକୁ ଏହି ଦୁଇ ଖେଳାଳି ଘୋଷଣା କରିଛନ୍ତି।
ବ୍ରିଟେନ ଚେସ୍ ଲିଜେଣ୍ଡ ଓ ଫିଡେ (ବିଶ୍ୱ ଚେସ୍ ଫେଡେରେଶନ) ଉପ- ସଭାପତି ନିଗେଲ ଶର୍ଟ ମଧ୍ୟ ଏଥିରେ ଅଂଶଗ୍ରହଣ କରିଥିଲେ। ଏହି ମାହାମାରୀ ବରୋଧ ଲଢେଇରେ ସାମିଲ ହୋଇଥିବାରୁ ସେ ଖୁସି ଜାହିର କରିଛନ୍ତି। ଏହି ଟୁର୍ନାମେଣ୍ଟରେ ୪୨୯ ଜଣ ଖେଳାଳି ଅଂଶଗ୍ରହଣ କରିଥିଲେ। ଭାରତ ସମେତ ଆମେରିକା, ଆର୍ଜେଣ୍ଟିନା, ଚିଲି, ପେରୁ, ଭେନେଜୁଆଲା, ଇଂଲଣ୍ଡ, ଚେକ ଗଣରାଜ୍ୟ, ଜର୍ମାନୀ, ଇଜିପ୍ଟ ଓ ଆଲଜେରିଆରୁ ଖେଳାଳିମାନେ ଏହି ଟୁର୍ନାମେଣ୍ଟରେ ଭାଗ ନେଇଥିଲେ। ଏଥିରେ ମୋଟ ୩୪ ଜିଏମ, ୩୦ ଆଇଏମ୍ ଅଂଶଗ୍ରହଣ କରିଥିଲେ। ପେରୁର ଆଇଏମ୍ ଟେରୀ ରେନାଟୋ ଓ ଭାରତୀୟ ଆଇଏମ୍ ରବି ତେଜା ଯଥାକ୍ରମେ ତୃତୀୟ ଓ ଚତୁର୍ଥ ସ୍ଥାନ ଅଧିକାର କରିଥିଲେ।
