ଯାଜପୁର ଟାଉନ,୨୭ା୨(ଡିଏନଏ): ଭାରପ୍ରାପ୍ତ ଜିଲାପାଳ ତଥା ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକଙ୍କ ଅଚାନକ ଗସ୍ତ ସମୟରେ ଜିଲା ସଦର ମହକୁମା ନିକଟସ୍ଥ ଅକରପଡାରେ ଥିବା ରାମକୃଷ୍ଣ ପ୍ରାଣୀ ଚିକିତ୍ସା ସହାୟତା କେନ୍ଦ୍ର ପୂର୍ବାହ୍ନ ୯.୫୦ ପର୍ଯ୍ୟନ୍ତ ଖୋଲି ନ ଥିଲା। ଏହି ପ୍ରାଣୀ ଚିକିତ୍ସାଳୟରେ ବହୁ ସମୟରେ ତାଲା ଝୁଲି ରହୁଥିବାବେଳେ କର୍ମଚାରୀମାନେ ଏଠାକୁ ଆସୁନାହାନ୍ତି ବୋଲି ସ୍ଥାନୀୟ ଲୋକେ କହିଥିଲେ। ଏହାପରେ ଭାରପ୍ରାପ୍ତ ଜିଲାପାଳ ଅକରପଡା ପଞ୍ଚାୟତ ଭେଲଙ୍ଗସ୍ଥିତ କୁଞ୍ଜବିହାରୀ ସରକାରୀ ଆୟୁର୍ବେଦିକ ଚିକିତ୍ସାଳୟରେ ଯାଇ ପହଞ୍ଚିଥିଲେ। ପୂର୍ବାହ୍ନ ୧୦ଟା ୩୦ରେ ଏହି ଚିକିତ୍ସା କେନ୍ଦ୍ରଟିରେ ମଧ୍ୟ ତାଲା ପଡିଥିବା ଦେଖାଯାଇଥିଲା। ଦାୟିତ୍ୱରେ ଥିବା ଚିକିତ୍ସକ ଓ କର୍ମଚାରୀ ସେମାନଙ୍କ ଇଚ୍ଛା ଅନୁସାରେ ଏଠାକୁ ଆସୁଥିବା ନେଇ ପ୍ରଶାସନ ନିକଟରେ ଅଭିଯୋଗ ହୋଇଥିବାବେଳେ ନିଜେ ବରିଷ୍ଠ ପ୍ରଶାସକ ନାୟକ ବୁଧବାର ଜନସାଧାରଣଙ୍କ ଅଭିଯୋଗର ସତ୍ୟାସତ୍ୟ ଥିବା ଦେଖିବାକୁ ପାଇଥିଲେ। ନାୟକ ଏହାପରେ ସ୍ଥାନୀୟ ଶହୀଦ ସତ୍ୟାନନ୍ଦ ହୋମିଓପାଥିକ ଚିକିତ୍ସା କେନ୍ଦ୍ର ଓ ବିରଜାପୁର ପଞ୍ଚାୟତର ୩ନଂ ଅଙ୍ଗନୱାଡି କେନ୍ଦ୍ର ପରିଦର୍ଶନ କରିଥିଲେ। ଅଙ୍ଗନୱାଡି କେନ୍ଦ୍ରରେ ପିଲାମାନେ ୟୁନିଫର୍ମ ପିନ୍ଧି ନ ଥିବା ଦେଖାଯିବା ସହିତ ଉପସ୍ଥାନ ଖାତାରେ ରହିଥିବା ପିଲାଙ୍କ ନାମ ତୁଳନାରେ ବହୁ କମ ପିଲା ସେଠାରେ ବସିଥିବା ଦେଖାଯାଇଥିଲା।
