ଏରସମା, ୨୨।୧ (ସ୍ବ.ପ୍ର.):ଏରସମା ବ୍ଲକ ଅଧୀନ ଜିରାଇଲୋ ପଞ୍ଚାୟତର ଶରବା ଗ୍ରାମ ନିକଟରେ ପ୍ରସ୍ତାବିତ ଚିଙ୍ଗୁଡି ପ୍ରକ୍ରିୟାକରଣ ପ୍ରକଳ୍ପକୁ ବିରୋଧ କରି ମଙ୍ଗଳବାରଠାରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଗଣଧାରଣା ଆରମ୍ଭ ହୋଇଛି। ଏହି ଉପଲକ୍ଷେ ଜିରାଇଲୋ ପଞ୍ଚାୟତ ଭିଟାମାଟି ସୁରକ୍ଷା ସମିତି ପକ୍ଷରୁ ଆୟୋଜିତ ପଦଯାତ୍ରାରେ ଆନ୍ଦୋଳନକାରୀମାନେ ପଞ୍ଚାୟତ ପରିକ୍ରମା କରି କମ୍ପାନୀ ଓ ଠିକାଦାରଙ୍କୁ ସହଯୋଗ ନ କରିବା ପାଇଁ ଜନ ସଚେତନତା ସୃଷ୍ଟି କରିଥିଲେ। ପଦଯାତ୍ରା ପରେ ଆନ୍ଦୋଳନକାରୀମାନେ ପଞ୍ଚାୟତ କାର୍ଯ୍ୟାଳୟ ନିକଟରେ ଗଣଧାରଣାରେ ବସିଥିଲେ। ଏହି ଅବସରରେ ଆୟୋଜିତ ପ୍ରତିବାଦ ସଭାରେ ସିପିଆଇ ନେତା ଅଭୟ ସାହୁ କହିଥିଲେ, ପ୍ରସ୍ତାବିତ ପ୍ରକଳ୍ପ ଜନବସତିଠାରୁ ମାତ୍ର ୨୦ ମିଟର ଦୂରରେ ଓ ହାଇସ୍କୁଲଠାରୁ ୫୦ ମିଟର ଦୂରରେ ହେବାକୁ ଥିବାରୁ ପରିବେଶ ପ୍ରଦୂଷିତ ହେବା ସହ ସ୍କୁଲ ପିଲାମାନେ ପ୍ରଭାବିତ ହେବେ। ଏଥିସହିତ ଏହି ପ୍ରକଳ୍ପ ଦ୍ୱାରା ସଫେଇ ପାଣି ପ୍ରଦୂଷିତ ହେବ। ଏହି ପ୍ରକଳ୍ପ ପଲ୍ଲିସଭା ଅନୁମତି ବିନା କିପରି କରାଯାଉଛି, ସେ ନେଇ ଆନ୍ଦୋଳନକାରୀମାନେ ପ୍ରଶ୍ନ କରିଥିଲେ। ପ୍ରସ୍ତାବିତ ପ୍ରକଳ୍ପ ବନ୍ଦ ନ ହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ସଭାରେ ନିଷ୍ପତ୍ତି ନିଆଯାଇଛି। ଏଥିରେ ଯୁବନେତା ଅଭିଜିତ୍ ସାହୁ, ହରେକୃଷ୍ଣ ମହାରଣା, ରବୀନ୍ଦ୍ର ମାଝି, ଶିବ ସୁନ୍ଦର ବେହେରା, ବିଜୟ ସାହୁ, ଉତ୍ତମ ହାତୀ, ଉତ୍ତମ ପାଇଟାଳ ପ୍ରମୁଖ ଯୋଗଦେଇ ବକ୍ତବ୍ୟ ରଖିଥିଲେ।
