କୋଲକତା,୧୩।୬: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟରେ ଅନଶନରେ ବସିଥିବା ଡାକ୍ତରଙ୍କୁ ୪ ଘଣ୍ଟା ମଧ୍ୟରେ କାର୍ଯ୍ୟରେ ଯୋଗ ଦେବାକୁ କହିଛନ୍ତି। ନଚେତ୍ ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ମମତା ଗୁରୁବାର ଏସ୍ଏସ୍କେଏମ୍ ସରକାରୀ ହସ୍ପିଟାଲରେ ପହଞ୍ଚିବା ପରେ ସେଠାରେ ଅନଶନରେ ବସିଥିବା ଡାକ୍ତରଙ୍କୁ ଉଠାଇବାକୁ ପୋଲିସକୁ କହିଥିଲେ। ଏହାସହ ହସ୍ପିଟାଲ ପରିସରରେ ରୋଗୀଙ୍କ ବ୍ୟତୀତ ଯେମିତି ଆଉ କେହି ଦେଖା ନ ଯାଆନ୍ତି ବୋଲି ପୋଲିସକୁ କହିଥିଲେ। ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଦାୟିତ୍ୱ ମମତାଙ୍କ ହାତରେ ଥିବା ବେଳେ ଡାକ୍ତରଙ୍କର ଏପରି ଅନଶନ ବିରୋଧିଙ୍କ ଚାଲ୍ ବୋଲି ସେ କହିଛନ୍ତି। ତାଙ୍କ ମତରେ ସିପିଆଇ(ଏମ୍) ଓ ଭାଜପାର ପ୍ରରୋଚନାରେ ଡାକ୍ତରମାନେ ଏହି ଅନଶନ କରିଛନ୍ତି। ସୂଚନାଯୋଗ୍ୟ,ଏଠାକାର ଜୁନିୟର ଡାକ୍ତରମାନେ ଗତ ମଙ୍ଗଳବାର ରାତିରୁ ବିଭିନ୍ନ ଦାବି ନେଇ ଅନଶନରେ ବସିଛନ୍ତି।
