ବିଜେପୁର, ୨୬।୪(ଡି.ଏନ.ଏ.): କୋଭିଡ-୧୯ ପାଇଁ ଲକ୍ଡାଉନ ଜାରି ରହିଥିବାରୁ ବରଗଡ ଜିଲା ବିଜେପୁର ଖଗେଶ୍ୱର ସାହିତ୍ୟ କଳା ପରିଷଦ ପକ୍ଷରୁ ସମସ୍ତ ସଦସ୍ୟ ନିଜ ନିଜ ଘରେ ରହି ଅନ୍ଲାଇନରେ ସାହିତ୍ୟପ୍ରାଣ ଖଗେଶ୍ୱର ଶେଠଙ୍କ ୧୧୫ତମ ଜୟନ୍ତୀ ରବିବାର ପାଳନ କରିଛନ୍ତି। ତାଳପଦରସ୍ଥିତ ସୋମନାଥ ପଧାନଙ୍କ ବାସଭବନରେ କବିଙ୍କ ତୈଳଚିତ୍ରରେପୁଷ୍ପମାଲ୍ୟ ଅର୍ପଣ କରାଯାଇ ଜୟନ୍ତୀ ଉତ୍ସବକୁ ଉଦ୍ଘାଟନ କରାଯାଇଥିଲା। ପରେ କଣ୍ଠଶିଳ୍ପୀ ଅଜିତ ପାଣିଗ୍ରାହୀ କବିଙ୍କ ମାନବବାଦୀ କବିତା ପରିବେଷଣ କରିଥିଲେ। ଖଗେଶ୍ୱର ସାହିତ୍ୟ କଳା ପରିଷଦ ସଭାପତି ମୋହନ ସିଂ କହ୍ନେଇଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ଭେଡେନ ମନୋହର ସାଂସ୍କୃତିକ ସଂସଦ ସଭାପତି ଉତ୍ପନ୍ନ କୁମାର ଭୋଇ ଭିତ୍ତି ପ୍ରବନ୍ଧ ପାଠ କରିଥିଲେ। ସ୍ତମ୍ଭକାର କିଶୋର ମେହେର, ଅଧ୍ୟାପକ ପ୍ରକାଶ ସେଠ, ଡ. ଶ୍ୟାମସୁନ୍ଦର ଧର, ସ୍ତମ୍ଭକାର ପ୍ରିତିଶ ଆଚାର୍ଯ୍ୟ, ନାଟ୍ୟକାର କେଶରଞ୍ଜନ ପ୍ରଧାନ, ଡ. ରବୀନ୍ଦ୍ର ଗଡତିଆ ପ୍ରମୁଖ କବିଙ୍କ ସାହିତ୍ୟ କୃତ୍ତି ଉପରେ ଆଲୋଚନା କରିଥିଲେ। କବିଙ୍କ ଆଚରଣ ଓ ଉଚ୍ଚାରଣରେ ଫରକ୍ ନ ଥିଲା। ସାଧାରଣ ଲୋକଙ୍କ ପାଇଁ ଯେଉଁଠି ସେ ଅନ୍ୟାୟ, ଦୁର୍ନୀତି, ଭ୍ରଷ୍ଟାଚାର ଦେଖିଛନ୍ତି ତାକୁ ଅତି ନୁଖୁଣ ଭାବେ ଚିତ୍ରଣ କରି ତାର ପ୍ରତିବାଦ କରିଛନ୍ତି । ତେଣୁ ଶେଠ ଥିଲେ ବାସ୍ତବରେ ଜଣେ ଦରଦି ଋଷିକବି ବୋଲି ଆଲୋଚକଗଣ ମତପ୍ରକାଶ କରିଥିଲେ। ପଦ୍ମଶ୍ରୀ ଡ. ହଳଧର ନାଗ, ବ୍ୟଙ୍ଗକବି ମନୋରଞ୍ଜନ ସାହୁ, ସାହିତ୍ୟକ ଡ. ମାନଭଞ୍ଜନ ପ୍ରଧାନ ଅତିଥିଭାବେ ନିଜର ଶ୍ରଦ୍ଧାସୁମନ ଅର୍ପଣ କରିଥିଲେ। ଅଧ୍ୟାପକ ସୁଶାନ୍ତ କୁମାର ମିଶ୍ର, ଦିଲୀପ କୁମାର ଦେବତା, ହୃଦମଣି ସାହୁ, ରାଜେଶ୍ୱର ବେହେରା, ଜିତେନ୍ଦ୍ରୀୟ ମେହେର, କବି ଅହଲ୍ୟା ପଧାନ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିଥିଲେ। ଏହି ଅନଲାଇନ କାର୍ଯ୍ୟକ୍ରମର ଭିଡିଓକୁ ପରେ ୟୁଟ୍ୟୁବରେ ଅପଲୋଡ କରାଯାଇଛି। ଯୁବକବି ଦେବାଶିଷ ମେହେର ଧନ୍ୟବାଦ ଅର୍ପଣ କରିଥିଲେ।
