ବାରିପଦା ଅଫିସ, ୨୧ା୨- ବାରିପଦା ତକତପୁରସ୍ଥିତ ମହାରାଜା ପୂର୍ଣ୍ଣଚନ୍ଦ୍ର ସ୍ବୟଂଶାସିତ ମହାବିଦ୍ୟାଳୟ (ଏମ୍ିପିସି)ରେ ଖାଲି ପଡ଼ିଥିବା ଅଧ୍ୟାପକ ପୂରଣ ଦାବିରେ ଗୁରୁବାର ମାରିସା ସେନା ପକ୍ଷରୁ ଧାରଣା ସହ ବିକ୍ଷୋଭ ପ୍ରଦର୍ଶନ କରାଯାଇଥିଲା। ସେନାର କର୍ମକର୍ତ୍ତାମାନେ ମୁଖ୍ୟ ଫାଟକରେ ତାଲା ପକାଇ ବିକ୍ଷୋଭ ପ୍ରଦର୍ଶନ କରିଥିଲେ। ମହାବିଦ୍ୟାଳୟରେ ୯୬ ଅଧ୍ୟାପକ ପଦବୀ ମଧ୍ୟରୁ ୬୧ଟି ଖାଲି ପଡ଼ିଛି। ଯାହା ଦ୍ୱାରା ପିଲାମାନଙ୍କ କୋର୍ସ ଠିକ୍ ଭାବେ ସରୁନାହିଁ ଓ ପ୍ରତ୍ୟେକ ଦିନ ଠିକ୍ ଭାବେ କ୍ଲାସ ମଧ୍ୟ ହେଉନାହିଁ। ସରକାରୀ ନିୟମ ଅନୁସାରେ ପରୀକ୍ଷା ସରିବାର ୨୦ରୁ ୪୫ ଦିନ ମଧ୍ୟରେ ପରୀକ୍ଷାଫଳ ପ୍ରକାଶ ପାଇବାକୁ ଥିବା ବେଳେ ଏହା ହୋଇପାରୁନାହିଁ। ଖାଲି ପଡ଼ିଥିବା ଅଧ୍ୟାପକ ପଦବୀ ପୂରଣ କରିବା, ପରୀକ୍ଷାଫଳ ୪୫ ଦିନ ଭିତରେ ପ୍ରକାଶ ପାଇବା,ସାନ୍ତାଳୀ ବିଭାଗର ଅଧା ନିର୍ମାଣ ହୋଇଥିବା ମ୍ୟୁଜିୟମକୁ ତୁରନ୍ତ ସମୂର୍ଣ୍ଣ କରିବା,୨୦୨୦-୨୧ ଶିକ୍ଷା ବର୍ଷରେ ମହାବିଦ୍ୟାଳୟର ଛାତ୍ରୀନିବାସ ଓ ଛାତ୍ରାବାସରେ ପିଲାମାନଙ୍କୁ ରଖିବା ଭଳି ୪ ଦଫା ଦାବି ସେନା ପକ୍ଷରୁ ଉପସ୍ଥାପନ କରାଯାଇଛି। ସକାଳ ୮ ଘଟିକା ସମୟରେ ସେନା ପକ୍ଷରୁ ତାଲା ବନ୍ଦ କରାଯାଇ ଧାରଣା ଦିଆଯାଇଥିଲା। ପରେ ମଧ୍ୟାହ୍ନ ୧୨ଟା ୩୦ରେ କଲେଜ ଅଧ୍ୟକ୍ଷା ଝରଣା ବେହେରା ଓ ଲକ୍ଷ୍ମୀପୋଷି ଫାଣ୍ଡି ଅଧିକାରୀ ଘଟଣାସ୍ଥଳକୁ ଆସି ବୁଝାଶୁଝା କରିଥିଲେ। ଅଧ୍ୟକ୍ଷା ବେହେରା ଏ ନେଇ ଉଚ୍ଚଶିକ୍ଷା ବିଭାଗକୁ ଜଣାଇବେ ବୋଲି ପ୍ରତିଶ୍ରୁତି ଦେବା ପରେ ସେନା କର୍ମକର୍ତ୍ତା ବିକ୍ଷୋଭରୁ ହଟିଥିଲେ। ଆଗାମୀ ୧୫ ଦିନ ଭିତରେ ଯଦି ଏହି ସମସ୍ୟାର ସମାଧାନ ନ ହୁଏ ତେବେ ପୁନର୍ବାର ବିକ୍ଷୋଭ କରାଯିବ ବୋଲି ମାରିସା ସେନାର ସଭାପତି ଅର୍ଜୁନ ମୁର୍ମୁ ପ୍ରକାଶ କରିଛନ୍ତି। ଅନ୍ୟମାନଙ୍କ ମଧ୍ୟରେ ସମ୍ପାଦକ ରାଜ ହେମ୍ବ୍ରମ, ଲକ୍ଷ୍ମଣ ସୋରେନ୍, ବାବୁଲି ମାର୍ଣ୍ଡି, ରବୀନ୍ଦ୍ର ସୋରେନ୍, ରାଜ ହେମ୍ବ୍ରମ, ଲକ୍ଷ୍ମଣ ସୋରେନ୍, ବାବୁଲୁ ମାର୍ଣ୍ଡି,କଳ୍ପନା ନାଏକଙ୍କ ସମେତ ଏକାଧିକ କର୍ମକର୍ତ୍ତାମାନେ ଉପସ୍ଥିତ ଥିଲେ।
