ଭୁବନେଶ୍ୱର,୨୧ା୧୦(ବ୍ୟୁରୋ) : ନୂଆ ମୋଟର ଯାନ ଆଇନ ଲାଗୁ ହେବା ପରେ ପୋଲିସ ଓ ଆରଟିଓ ପକ୍ଷରୁ ଯାଞ୍ଚ କଡ଼ାକଡ଼ି କରାଯାଇ ବଡ଼ଧରଣର ଜରିମାନା ଆଦାୟ କରାଯାଇଥିଲା। ଫଳରେ ରାଜଧାନୀରେ ବିନା କାଗଜପତ୍ରରେ ଗଡୁଥିବା ଅଧା ଅଟୋ ଗାଏବ ହୋଇଯାଇଥିଲା। କିନ୍ତୁ କାଗଜପତ୍ର ପ୍ରସ୍ତୁତି ପାଇଁ ୩ମାସ ମହଲତ ମିଳିବା ପରେ ଯେଉଁ କଥାକୁ ସେହି କଥା। ଅଟୋ ଚାଳକମାନେ ମନଇଚ୍ଛା ଯେଉଁଠି ପାଇଲେ ପାର୍କିଂ କଲେ ଓ ରାସ୍ତା ମଝିରେ ଅଟକାଇ ଯାତ୍ରୀ ନେଲେ। ଏନେଇ ସାଧାରଣ ଲୋକଙ୍କ ଅସନ୍ତୋଷ ବଢିବା ପରେ ଅଟୋ ପାର୍କିଂ ଓ ଯାତ୍ରୀ ପରିବହନ କ୍ଷେତ୍ରରେ କଟକଣା ଲାଗୁ କରାଯାଇଛି। ରାଜଧାନୀର ୩ଟି ସ୍ଥାନରେ ଅଟୋ ପାର୍କିଂ ଚିହ୍ନଟ କରାଯାଇଛି। ସେଗୁଡିକ ହେଲା କଳ୍ପନା ଛକ, ରାଜମହଲ ଛକ ଓ ବାଣୀବିହାର ଛକ। ଏହି ୩ ସ୍ଥାନରେ କେଉଁଠି ଗାଡି ପାର୍କିଂ କରାଯିବ ତାହା ଟ୍ରାଫିକ ଡିସିପି ସାଗରିକା ନାଥ ଓ ଟ୍ରାଫିକ ଏସିପି କେ.କେ ପାଣିଗ୍ରାହୀ ପରିଦର୍ଶନ କରି ଚିହ୍ନଟ କରିଛନ୍ତି। ଏନେଇ କମିଶନରେଟ ପୋଲିସ ପକ୍ଷରୁ ଏକ ବିଜ୍ଞପ୍ତି ପ୍ରକାଶ ପାଇଛି।
କଳ୍ପନା ଛକର ରାଜ୍ୟ ସଂଗ୍ରହାଳୟ ସମ୍ମୁଖରେ କୌଣସି ଗାଡି ପାର୍କିଂ କରାଯିବ ନାହିଁ। କିନ୍ତୁ ବିଏମ୍ସି ଅଫିସ୍ର ବିପରୀତ ଦିଗ ଅର୍ଥାତ୍ ମାଉସୀମା ମନ୍ଦିର ପଟରେ ଅଟୋ ଧାଡି କରି ପାର୍କିଂ କରିବାକୁ କୁହାଯାଇଛି। କୌଣସି ଅଟୋ ରାସ୍ତା ଉପରେ ଏବଂ ଅଗ୍ନିଶମ ଅଫିସ ଓ ରାଜ୍ୟ ସଂଗ୍ରହାଳୟର ୫୦ ମିଟର ପର୍ଯ୍ୟନ୍ତ ପାର୍କିଂ କରିବେ ନାହିଁ। କେବଳ ଅଟୋ ନୁହେଁ, ଅଗ୍ନିଶମ ଅଫିସଠାରୁ ରାଜ୍ୟ ସଂଗ୍ରହାଳୟ ପର୍ଯ୍ୟନ୍ତ କୌଣସି ବସ୍, ଟ୍ୟାକ୍ସି, ୪ଚକିଆ ଏବଂ ୨ଚକିଆ ଯାନକୁ ପାର୍କିଂ କରିବାକୁ ମନା କରାଯାଇଛି। ବସ୍ଗୁଡିକ ‘ବସ୍ ଓ୍ବେ’ ନିକଟରେ ରହିବେ।
ବାଣୀବିହାର ଛକରେ ୩ ସ୍ଥାନରେ ଅଟୋ ପାର୍କିଂ କରିବାକୁ ଅନୁମତି ମିଳିଛି। ସେଗୁଡ଼ିକ ହେଲା ଉତ୍କଳ ବିଶ୍ୱବିଦ୍ୟାଳୟ ଫାଟକ ସମ୍ମୁଖ ବାମପଟ, ମେଟ୍ରୋ ବିଲି୍ଡଂ ସମ୍ମୁଖ ଓ ଆଚାର୍ଯ୍ୟବିହାର ଯିବା ରାସ୍ତାର ବାମପଟ। ସେହିଭଳି ରାଜମହଲ ଛକରେ ମଧ୍ୟ ୩ଟି ସ୍ଥାନ ପାର୍କିଂ ପାଇଁ ଚିହ୍ନଟ କରାଯାଇଛି। ସେଗୁଡ଼ିକ ହେଲା ଶିଶୁଭବନ ଯିବା ରାସ୍ତାର ବାମପଟ, ଏଜି ଛକ ଯିବା ରାସ୍ତାର ବାମପଟ ଏବଂ କଳ୍ପନା ଯିବା ରାସ୍ତାର ବାମପଟ।
ରବିବାର ଅପରାହ୍ନରେ ଅନୁଷ୍ଠିତ ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି। ବୈଠକରେ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ, ଟ୍ରାଫିକ ଡିସିପି ସାଗରିକା ନାଥ, ଟ୍ରାଫିକ ଏସିପି କେ.କେ. ପାଣିଗ୍ରାହୀ ଏବଂ ଅଟୋ ମହାସଂଘ କର୍ମକର୍ତ୍ତା ଉପସ୍ଥିତ ଥିଲେ। ଅଟୋ ଚାଳକମାନେ ଯଦି ମଦ ପିଇ ଗାଡି ଚଳାଇବେ, ୩ଜଣରୁ ଊର୍ଦ୍ଧ୍ୱ ଯାତ୍ରୀ ପରିବହନ କରିବେ ଏବଂ ପାର୍କିଂ ନିୟମ ନ ମାନିଲେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ନିଷ୍ପତ୍ତି ନିଆଯାଇଛି।
