ମୁମ୍ବାଇ,୧୪।୪: କରୋନା ସଂକ୍ରମଣ ଯୋଗୁ ଦେଶରେ ଚାଲିଥିବା ଲକ୍ଡାଉନ ଫଳରେ କିଏ କେତେ ପ୍ରକାରର ଅସୁବିଧାର ସମ୍ମୁଖୀନ ହୋଇଛନ୍ତି। ଏହି ସମୟରେ ଜଣେ ଅଟିଜିମ ପୀଡିତ ଶିଶୁର ମା’ଙ୍କ ଦୁଃଖକୁ ଲାଘବ କରିଛନ୍ତି ଜଣେ ଓଡ଼ିଆ ଆଇପିଏସ୍ ଅରୁଣ ବୋଥ୍ରା। ତାଙ୍କର ବଦାନ୍ୟତା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏପ୍ରିଲ ୪ରେ ମୁମ୍ବାଇର ଚେମ୍ବୁରରେ ରହୁଥିବା ନେହା ସିହ୍ନା ନାମକ ଜଣେ ମହିଳା ତାଙ୍କ ସାଢେ ୩ ବର୍ଷର ଶିଶୁ ପାଇଁ ଓଟ କ୍ଷୀର ଯୋଗାଇଦେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟୁଇଟର ଯୋଗେ ଅନୁରୋଧ କରିଥିଲେ। ଶିଶୁଟିର ସିଭିୟର ଫୁଡ ଆଲର୍ଜି ଥିବାରୁ ସେ କେଳବ ଓଟ କ୍ଷୀର ପିଏ ବୋଲି ତାଙ୍କ ମା’ ଏହି କ୍ଷୀର ଅଥବା ଏହାର କିଛି ପାଉଡର ତାଙ୍କୁ ଯୋଗାଇ ଦେବାକୁ ଅନୁରୋଧ କରିଥିଲେ। ଲକ୍ଡାଉନ ଯୋଗୁ ତାଙ୍କ ନିକଟରେ ଗଚ୍ଛିତ ଥିବା ଓଟ କ୍ଷୀର ସରି ଆସିବାରୁ ରାଜସ୍ତାନର ସଡରିରୁ ଏହାକୁ ମଗାଇ ଦେବାକୁ ସେ ଅନୁରୋଧ କରିଥିଲେ। ତେବେ ଏପ୍ରିଲ ୬ ପର୍ଯ୍ୟନ୍ତ ଏହାର କୌଣସି ଉତ୍ତର ମିଳି ନ ଥିଲା ନେହାଙ୍କୁ। ଏହାପରେ ଓଡ଼ିଶା କ୍ୟାଡର ଆଇପିଏସ୍ ଅରୁଣ ବୋଥ୍ରାଙ୍କର ୬୩.୫ ହଜାର ସୋସିଆଲ ମିଡିଆ ଫଲୋୟର୍ସଙ୍କ ମଧ୍ୟରୁ କେହି ଜଣେ ଫଲୋୟର୍ସ ତାଙ୍କୁ ଏହା ଟ୍ୟାଗ କରିବା ପରେ ସେ ଏ ସମ୍ପର୍କରେ ସୂଚନା ପାଇଥିଲେ। ତୁରନ୍ତ ସେ ଏହାର ସମାଧାନ ଖୋଜି ମୁମ୍ବାଇରେ ଓଟ କ୍ଷୀର ଓ ଏହାର ପାଉଡର ଯୋଗାଉଥିବା ଆଡଭିକ ଫୁଡସ୍(Advik Foods) ସହ ଯୋଗାଯୋଗ କରି କୌଣସି ମତେ ଉକ୍ତ ମହିଳାଙ୍କୁ ୪ଶହ ଗ୍ରାମ ଓଟ କ୍ଷୀର ପାଉଡର ଯୋଗାଇ ଦେଇଥିଲେ। ଏହାପରେ ସେ ରେଲଓ୍ବେର ସହଯୋଗରେ ରାଜସ୍ଥାନର ସଡରିରୁ ୨୦ ଲିଟର ଓଟ କ୍ଷୀର ଓ ୨୦ କିଲେଗ୍ରାମ ଓଟ କ୍ଷୀର ପାଉଡର ମଗାଇ ନେହାଙ୍କୁ ଯୋଗାଇ ଦେଇଥିଲେ। ଫାଲନା ଷ୍ଟେଶନ ଯେଉଁଠାରେ ଟ୍ରେନ୍ ଅଟକେ ନାହିଁ ସେଠାରେ ଟ୍ରେନକୁ ଅଟକାଇ ସେ ମୁମ୍ବାଇ ପର୍ଯ୍ୟନ୍ତ ଏହି କ୍ଷୀର ପହଞ୍ଚାଇ ଜଣେ ଅଟିଜିମ ପିଲାକୁ ସାହାଯ୍ୟ କରିଥିବାରୁ ଏବେ ସେ ସମସ୍ତଙ୍କର ପ୍ରଶଂସା ସାଉଁଟିଛନ୍ତି। ସୋସିଆଲ ମିଡିଆ ମାଧ୍ୟମରେ କେମିତି ଲୋକଙ୍କୁ ଅସୁବିଧା ସମୟରେ ସାହାଯ୍ୟ କରାଯାଇପାରେ ସେ କଥା ବୋଥ୍ରା ଏକ ସାକ୍ଷାତ୍କାରରେ କହିଛନ୍ତି। ୧୯୯୬ ବ୍ୟାଚର ଏହି ଆଇପିଏସ୍ ଏବେ ଓଡ଼ିଶା ସେଣ୍ଟ୍ରାଲ ଇଲେକ୍ଟ୍ରିସିଟି ସପ୍ଲାଇ ଇଉଟିଲିଟିର ସିଇଓ ଓ କ୍ୟାପିଟାଲ ରିଜନ ଅର୍ବାନ ଟ୍ରାନ୍ସପୋର୍ଟର ମ୍ୟାନେଜିଙ୍ଗ ଡାଇରେକ୍ଟର(CEO, Odisha Central Electricity Supply Utility, and Managing Director of Capital Region Urban Transport) ଭାବେ ନିଯୁକ୍ତ ଅଛନ୍ତି।
