ଜାମଟିକ୍ରା, ୧୩।୧ (ଡି.ଏନ.ଏ) ଅତାବିରା ବ୍ଲକ ବୁଗବୁଗା ପଞ୍ଚାୟତ ଜାମଟିକ୍ରା ଗ୍ରାମ ପଧାନପଡାର ଦାସ ନାଗଙ୍କ ସାନପୁଅ ଦେବେନ୍ଦ୍ର ନାଗ (୩୮)। ଦୀର୍ଘ ୪ ବର୍ଷ ହେଲା ସେ ଜୀବନ ସହ ସଂଘର୍ଷ କରି ଆସୁଛନ୍ତି । ଦେବେନ୍ଦ୍ରଙ୍କ ଚିକିତ୍ସା ଲାଗି ଅଭାବୀ ପରିବାର ଲୋକେ ଧାରକରଜ କରି ଟଙ୍କା ଖର୍ଚ୍ଚ କଲେ । ମାତ୍ର କୌଣସି ସୁଫଳ ନ ମିଳିବାରୁ ଦେବେନ୍ଦ୍ର ଭଗବାନଙ୍କ ଭରସାରେ ପଡିିଛନ୍ତି । ସେପଟେ ଦିନକୁ ଦିନ ତାଙ୍କ ଯନ୍ତ୍ରଣା ବଢ଼ିଚାଲିଛି । ଚିକିତ୍ସା ପାଇଁ ବହୁ ଅର୍ଥ ଆବଶ୍ୟକ ଥିବାରୁ ତାଙ୍କର ଚିକିତ୍ସା ହୋଇପାରୁ ନ ଥବବା ପରିବାର ଲୋକେ କହିଛନ୍ତି ।
ଦେବେନ୍ଦ୍ରଙ୍କ ପରିବାର କହିଲେ ବାପା ଦାସ, ମା’ ଜନ ଓ ଅବିବାହିତା ବଡ ଭଉଣୀ ସୀତା । ସେ ଗାଡ଼ି ଚଳାଇ ମା’ ବାପାଙ୍କୁ ପୋଷୁଥିଲେ। କିନ୍ତୁ ଦିନେ ଦେବେନ୍ଦ୍ର ହଠାତ ତଳେ ପଡିଯିବାରୁ ତାଙ୍କ ଡାହାଣ ଗୋଡ ଭାଙ୍ଗିଗଲା। ପରିବାର ଲୋକେ ଅର୍ଥ ଯୋଗାଡ କରି ତାଙ୍କୁ ବୁର୍ଲା ମେଡିକାଲକୁ ନେଲେ । ସେଠାରେ ଅପରେସନ କରି ଗୋଡେ ଲୁହା ରଡ୍ ଲଗାଗଲା। ସେ ଆଉ ଦିନେ ହଠାତ ପଡିଯିବାରୁ ସେହି ଗୋଡଟି ପୁଣି ଭାଙ୍ଗିଗଲା। ଆଉ ସେହି ଦିନଠୁ ଅଣ୍ଟାରୁ ତଳକୁ ସବୁ ଅଚଳ ହୋଇଗଲା । ଫଳରେ ସେ ଆଉ ଚାଲିବୁଲି ପାରିଲେ ନାହିଁ । ଭଗବାନଙ୍କୁ ଭରସା କରି ଦେବେନ୍ଦ୍ର ଦୀର୍ଘ ୪ ବର୍ଷ ହେଲା ଖଟରେ ଶୋଇ ଦିନ କାଟୁଛନ୍ତି । ବୃଦ୍ଧ ବାପା ଆଗଭଳି ଆଉ କାମ କରି ପାରୁନାହାନ୍ତି । ବଡ ଭଉଣୀ କୁଲି ମଜୁରୀ କରି ପରିବାର ଚଳାଉଛନ୍ତି । ମା’ ମଧ୍ୟ ରୋଗରେ ପୀଡିତ । ଏବେ ମା’ ବାପାଙ୍କୁ ଘାରିଛି ପୁଅର ଚିନ୍ତା। ସେମାନଙ୍କର ଜମିବାଡି କିଛି ନାହିଁ । ଯେଉଁ ବୟସରେ ପୁଅ ମା’ ବାପାଙ୍କୁ ପୋଷିବା କଥା ସେହି ବୟସରେ ଦେବେନ୍ଦ୍ର ବୋଝ ପାଲଟିଛନ୍ତି । ଏହି ପରିବାରକୁ ଟଙ୍କିକିଆ ଚାଉଳ କେବଳ ୨୦ କେଜି ମିଳୁଛି । ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ କିଛି ଆର୍ଥିକ ସହାୟତା ମିଳିଲେ ଦେବେନ୍ଦ୍ରଙ୍କ ଚିକିତ୍ସା ହୋଇପାରିବ ବୋଲି ତାଙ୍କ ବାପା ଦାସ ନାଗ ପ୍ରକାଶ କରିଛନ୍ତି। ଏହାସହିତ ତିନିଚକିଆ ସାଇକେଲ, ଭତ୍ତା ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ଘରଟିଏ ଯୋଗାଇ ଦେବା ପାଇଁ ପରିବାର ଲୋକେ ଗୁହାରି କରିଛନ୍ତି ।
