ଚନ୍ଦାହାଣ୍ଡି,୧୪।୩(ଡି.ଏନ.ଏ.) ଝୁମୁକଲାଲ୍ ମାଝି। ଟ୍ରାଇସାଇକେଲ୍ ବିନା କୌଣସି ସ୍ଥାନକୁ ଯାଇପାରନ୍ତିନି। ହେଲେ ଶିଶୁମାନଙ୍କ ପ୍ରତି ତାଙ୍କର ରହିଛି ବିଶେଷ ଦୁର୍ବଳତା। ତେଣୁ ଦିବ୍ୟାଙ୍ଗ ହୋଇ ମଧ୍ୟ ସେ ନିଜକୁ ଅଙ୍ଗନଓ୍ବାଡ଼ି କେନ୍ଦ୍ରର କୋମଳମତି ଶିଶୁଙ୍କ ସେବାରେ ନିୟୋଜିତ କରିଛନ୍ତି।
ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ୍ ଦଳବେଡ଼ା ପଞ୍ଚାୟତ ଅଧୀନ ଅଣ୍ଟିପଡ଼ା ଗାଁ ଅଙ୍ଗନୱାଡ଼ି କେନ୍ଦ୍ରର ପ୍ରି ସ୍କୁଲ ଛାତ୍ରୀଛାତ୍ରଙ୍କୁ ସେ ପ୍ରତ୍ୟେକଦିନ ସ୍କୁଲ ନେବା ଆଣିବା କରନ୍ତି। ସାହି ଗଳି ବୁଲି ସେ ପିଲାଙ୍କୁ ନିଜ ଟ୍ରାଇସାଇକେଲରେ ବସାଇ ସ୍କୁଲରେ ଛାଡ଼ିଥାନ୍ତି। ଏହା ଝୁମୁକଲାଲ୍ଙ୍କ ନିତିଦିନିଆ କାମ। ଗାଡି ମୋଟର ଚଳାଚଳ ଯୋଗୁ ରାସ୍ତାରେ ଦୁର୍ଘଟଣା ଓ ବୁଲା କୁକୁର କାମୁଡ଼ିବା ଭଳି ଘଟଣା ଘଟୁଛି। ତେଣୁ ପିଲାଙ୍କ ସୁରକ୍ଷା ପାଇଁ ଝୁମୁକଲାଲ୍ ନେଇଛନ୍ତି ଏହି ଦାୟିତ୍ୱ। ରାସ୍ତାରେ ପିଲାଙ୍କୁ ସେ ଗପ କହି ନେଉଥିବାବେଳେ ସେମାନେ ମଧ୍ୟ ଝୁମୁକଲାଲ୍ଙ୍କୁ ଦାଦା, ବଡୁ, ଜେଜେ ଆଦି ନାମରେ ଡାକିଥାନ୍ତି। ଏହା ତାଙ୍କୁ ଅଧିକ ଖୁସି ଦେଇଥାଏ ବୋଲି ଝୁମୁକଲାଲ୍ କୁହନ୍ତି। ସ୍ବାସ୍ଥ୍ୟ ଖରାପ ହେଲେ ଦିନେ ନ ଦେଖିଲେ ପିଲାମାନେ ତାଙ୍କ ଘରକୁ ଯାଇ ଦେଖି ଆସନ୍ତି। ଝୁମୁକଲାଲ୍ ଓ ପିଲାଙ୍କ ସମ୍ପର୍କକୁ ନେଇ ସମସ୍ତେ ପ୍ରଶଂସା କରନ୍ତି। ଅଙ୍ଗନୱାଡ଼ି କର୍ମୀ ଜୟମଣି ମାଝି ମଧ୍ୟ ଝୁମୁକଲାଲ୍ଙ୍କ ଏଭଳି କାର୍ଯ୍ୟକୁ ପ୍ରସଂଶା କରିଛନ୍ତି। ସେମାନଙ୍କ ସେବାରେ ଲାଗିବା ମୋତେ ଆତ୍ମତୃପ୍ତି ଦେଇଥାଏ ବୋଲି ସେ କୁହନ୍ତି।
