ବିନିକା, ୯ା୧(ଡି.ଏନ୍.ଏ.)- ସୁବର୍ଣ୍ଣପୁର ଜିଲା ବିନିକା ବ୍ଲକ ସିନ୍ଦୁରପୁର ପଁଚେତ୍ ଅଧୀନ ବଲାରଙ୍ଗା ଗାଁ ନୂଆଁପଡ଼ାରେ ଥିବାର ଅଙ୍ଗନଓ୍ବାଡି ଉପକେନ୍ଦ୍ର ନଂ.୩ରେ ପ୍ଲାଷ୍ଟିକ୍ ଅଁଡା ବଁଟା ଯାଇଥିବାର କେତେ ହିତାଧିକାରୀ ମଙ୍ଗଲବାର କରମୀକୁଁ ଅଭିଯୋଗ କରିଛନ୍। ହେଲେ ଅଙ୍ଗନଓ୍ବାଡି କରମୀ ଆର ବିନିକା ସିଡିପିଓ ଶୋଭାଗିନୀ ହରିପାଲ ଇ ଅଭିଯୋଗଟା ଡାହା ମିଛ୍ ବଲି କହିଛନ୍। ଇଆଡ଼େ ଝନେ ହିତାଧିକାରୀ ଇ ବାବ୍ଦେ ବିନିକା ଥାନାରେ ଅଭିଯୋଗ କରିଥିବାର ଜନାଯାଇଛେ।
ସୂଚନା ଅନ୍ସାରେ ନୂଆଁପଡ଼ା ଅଙ୍ଗନଓ୍ବାଡି ଉପକେନ୍ଦ୍ର ନଂ.୩ର କରମୀ ପୂର୍ଣ୍ଣିମା ବାଘ ଜାନୁୟାରୀ ୧ ତାରିଖ କେନ୍ଦ୍ର ଅଧୀନ ୪ ଝନ୍ ହିତାଧିକାରୀକୁଁ ୧୨ଟା ଲେଖେଁ ଅଁଡା ଦେଇଥିଲେ। ଅଁଡା ନେଇଥିବାର ହିତାଧିକାରୀମାନେ ହେଉଛନ୍ ୨ ନୂଆପଡ଼ାର ପ୍ରୀୟଙ୍କା(୨)କଁର ମା’ କବିତା ବାରିକ, ସଲୋନୀ(୨)କଁର ମା’ ଚଞ୍ଚଳା ବାଗ ଆର ପ୍ରସୂତୀ ମହିଲା ଅଶ୍ୱିନୀ ବାରିକ, ଜୟନ୍ତୀ ନାଗ। ହେଲେ ହିତାଧିକାରୀମାନେ କେନ୍ଦ୍ରରୁ ନେଇଥିବାର ଅଁଡା ଯାକ ପ୍ଲାଷ୍ଟିକ୍ର ବଲି ବଙ୍ଗଲବାର ଅଙ୍ଗନଓ୍ବାଡି କରମୀକୁଁ ଅଭିଯୋଗ କରିଛନ୍। ଏହେଦେ ଘଟନାଟା ଅଂଚଲରେ ଗୁଟେ ଚରଚାର ବିଷେ ହେଇଛେ। ଇ ବାବ୍ଦେ ବିନିକା ସିଡିପିଓ ଶୋଭାଗିନୀ ହରିପାଲ କହିଛନ୍ ଯେ, ଜାନୁୟାରୀ ୧ ତାରିଖ ଭିନେ ଭିନେ ଅଙ୍ଗନଓ୍ବାଡି କେନ୍ଦ୍ରରେ ହିତାଧିକାରୀମାନକୁ ଅଁଡା ବଁଟାଯାଇଛେ। ହେଲେ ନୂଆପଡ଼ାକେ ଛାଡ଼ିଦେଲେ ବାକି କେହେନ୍ସିଠାନୁ ଅଭିଯୋଗ ନାଇଁ ଆସି। ଯଦି ହିତାଧିକାରୀମାନେ କେନ୍ଦ୍ରରୁ ନେଇଥିବାର ଅଁଡା ପ୍ଲାଷ୍ଟିକ୍ ବଲି ଜାନ୍ଲେ ସେଟା ଆମ୍କୁ ଆନି ଦେଖେଇ ଅଭିଯୋଗ କରବାର କଥା ବଲି ସେ କହିଥିଲେ। ସେନ୍ତା ଥାନୀଅ ନୂଆପଡ଼ା ଅଙ୍ଗନଓ୍ବାଡି କରମୀ ପୂର୍ଣ୍ଣିମା ବାଗକୁଁ ପଚ୍ରାଲାରୁ ଜାନୁୟାରୀ ୧ ତାରିଖ ୪ ଝନ୍ ହିତାଧିକାରୀକୁଁ ୧୨ଟା ଲେଖେଁ ମୋଟ ୪୮ଟା ଅଁଡା ଦେଇଥିଲି। ହେଲେ ସେମାନେ ୧ରୁ ୬ ତାରିଖ ତକ୍ ଅଭିଯୋଗ ନାଇଁ କରି। ପଛେ ପ୍ଲଷ୍ଟିକ୍ ଅଁଡା ଦିଆଯାଇଥିବାର ଅଭିଯୋଗ କଲାରୁ ମୁଇଁ ସେ ଅଁଡା ଆନି ଦେଖାବାକେ ସେମାନକୁ କହିଥିଲି। ହେଲେ ସେମାନେ ସବୁ ଫିକି ଦେଇଛୁଁ, ଖାଲି ଗୁଟେ ନ ଅଁଟା ତେଲେ ଛାନ୍ଲାଟା ଅଛେ ବଲି କହିଥିଲେ। ସେ ଛାନ୍ଲା ଅଁଡା ମୋତେ ଦେଖେଇ ଦେଖୁନ୍ ଇଟା କେନ୍ତା ରବର ଲେଖେଁ ଲମୁଛେ ଆର ପ୍ଲଷ୍ଟିକ୍ ଲେଖେଁ ଟାନ୍ ଲାଗୁଛେ ବଲି କହିଥିଲେ ବଲି ସେ କହିଛନ୍। ଇ ବାବ୍ଦେ ହିତାଧିକାରୀ ଚଞ୍ଚଳା ବାଗ ବିନିକା ଥାନାରେ ଅଭିଯୋଗ କରିଥିବାର କହିଛନ୍। ଇ ବାବ୍ଦେ ବିନିକା ଥାନା ଆଇଆଇସି କୁଶ ପାଣିଗ୍ରାହୀକୁଁ ପଚ୍ରାଲାରୁ ଘଟନା ବାବ୍ଦେ ଅଭିଯୋଗ ହେଇଛେ ଆର ଆମେ ତଦଁତ୍ କରୁଛୁଁ ବଲି ସେ କହିଛନ୍।
