ପୁରୀ ଅଫିସ, ୧୧।୧୨: ରାଜ୍ୟ ସରକାର କରୋନା ସଂକ୍ରମଣ ରୋକିବା ଉପରେ ଯଥେଷ୍ଟ ପ୍ରାଧାନ୍ୟ ଦେଉଛନ୍ତି। ତେଣୁ ପୁରୀ ସମେତ ବିଭିନ୍ନ ଜିଲାରେ ସଂକ୍ରମଣ ହ୍ରାସ ପାଇବାରେ ଲାଗିଛି। ଏହାସତ୍ତ୍ୱେ ଟିକା (ଭାକ୍ସିନ) କେବେ ଆସିବ ତାକୁ ସମସ୍ତେ ଚାହିଁବସିଛନ୍ତି। ଆସନ୍ତା ୨୦୨୧ ଜାନୁୟାରୀ ସୁଦ୍ଧା ଭାରତରେ କୋଭିଡ୍ ଟିକା ଉପଲବ୍ଧ ହେବ ବୋଲି ସୂଚନା ମିଳିଲାଣି। ତେଣୁ ରାଜ୍ୟ ସରକାର ଟିକାକରଣକୁ ଗୁରୁତ୍ୱ ଦେଇ ପ୍ରାଥମିକ ପ୍ରସ୍ତୁତି ଆରମ୍ଭ କରିଛନ୍ତି। ଏହି କ୍ରମରେ ପୁରୀ ଜିଲାରେ କୋଭିଡ୍ ଟିକାକରଣ ପାଇଁ ସ୍ବାସ୍ଥ୍ୟ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ପୁରୀ ଜିଲାରେ ମୋଟ ୯୨୨୨ ଜଣ ସ୍ବାସ୍ଥ୍ୟକର୍ମୀଙ୍କୁ ଟିକା ଦିଆଯିବ। ସେମାନଙ୍କ ମଧ୍ୟରେ ୮୯୨୬ ଜଣ ସରକାରୀ ଓ ୨୯୬ ଜଣ ଘରୋଇ ସ୍ବାସ୍ଥ୍ୟକର୍ମୀ ରହିଛନ୍ତି। ଏ ନେଇ ଜିଲାପାଳଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇସାରିଥିବାବେଳେ ଜିଲା ମୁଖ୍ୟ ଚିକିତ୍ସାଧିକାରୀଙ୍କ ନିର୍ଦ୍ଦେଶ କ୍ରମେ ପ୍ରସ୍ତୁତି ଚାଲିଛି। ଦ୍ୱିତୀୟ ପର୍ଯ୍ୟାୟରେ ପୋଲିସ, ମିଲିଟାରୀ କର୍ମଚାରୀ ଓ ବୟସ୍କ ବ୍ୟକ୍ତିଙ୍କୁ ଟିକା ଦିଆଯିବ ବୋଲି ଜଣାପଡ଼ିଛି।
ଜିଲା ସ୍ବାସ୍ଥ୍ୟ ବିଭାଗର ବରିଷ୍ଠ ଅଧିକାରୀ ଦେବୀ ମହାପାତ୍ରଙ୍କ ସୂଚନା ମୁତାବକ, ଆସନ୍ତା ୨୦ ତାରିଖ ସୁଦ୍ଧା ବିଡିଓମାନଙ୍କ ଅଧ୍ୟକ୍ଷତାରେ ବ୍ଲକସ୍ତରରେ ଟିକାକରଣ ସଂକ୍ରାନ୍ତ ବୈଠକ ହେବ। ବ୍ଲକସ୍ତରୀୟ ରିପୋର୍ଟ ତୁରନ୍ତ ଦାଖଲ ଲାଗି ବିଡିଓମାନଙ୍କୁ କୁହାଯାଇଛି। ଜିଲାରେ ଥିବା ୪୩ଟି ଇଣ୍ଟେନସିଭ ଲିନିୟର ରେଫ୍ରିଜରେଟର (ଆଇଏଲ୍ଆର୍)ରେ ଟିକା ରଖାଯିବ। ଜିଲାରେ ଯେଉଁ ସୁବିଧା ରହିଛି ସେଥିରେ କେବଳ କୋଭାକ୍ସିନ କିମ୍ବା କୋସିଲ୍ଡ ଭାକ୍ସିନ ରହିପାରିବ। ଏହି ଦୁଇ ପ୍ରକାର ଭାକ୍ସିନ +୨ ଡିଗ୍ରୀ ସେଲ୍ସିୟସରୁ +୮ ଡିଗ୍ରୀ ସେଲ୍ସିୟସ ତାପମାତ୍ରା ଥିବା ରେଫ୍ରିଜରେଟର ଭିତରେ ରହିପାରିବ। ଫାଇଜର ଭାକ୍ସିନ ଲାଗି -୭ ଡିଗ୍ରୀ ସେଲ୍ସିୟସ ତାପମାତ୍ରା ବିଶିଷ୍ଟ ରେଫ୍ରିଜରେଟର ରହିଛି। ଏହି ଧରଣର ଆଇଏଲ୍ଆର୍ ସୁବିଧା ଜିଲାରେ ନ ଥିବା ସ୍ବାସ୍ଥ୍ୟ ବିଭାଗକୁ ଜଣାଇ ଦିଆଯାଇଛି ବୋଲି ମହାପାତ୍ର କହିଛନ୍ତି। ଏଥିସହ ଶୁକ୍ରବାର ସ୍ବାସ୍ଥ୍ୟ ବିଭାଗ ନିର୍ଦ୍ଦେଶକଙ୍କ ଅଧ୍ୟକ୍ଷତାରେ ରାଜ୍ୟସ୍ତରୀୟ ବୈଠକ ବସିବ। ଏଥିରେ ବହୁ ଗୁରୁତ୍ୱପୂର୍ଣ୍ଣ ଆଲୋଚନା ହେବ।
ଅନ୍ୟପକ୍ଷରେ ଦେଶରେ ପ୍ରଥମ ପର୍ଯ୍ୟାୟରେ ୧ କୋଟି ସ୍ବାସ୍ଥ୍ୟକର୍ମୀ ଟିକା ନେବେ। ଏହାପରେ ୨କୋଟି ପୋଲିସ କର୍ମଚାରୀ, ଯବାନ ଓ ବୟସ୍କ ବ୍ୟକ୍ତିଙ୍କୁ ଟିକା ଦିଆଯିବ। ତୃତୀୟ ପର୍ଯ୍ୟାୟରେ ଆଉ ୩୦ କୋଟି ଲୋକଙ୍କୁ ଟିକା ମିଳିିବ। ସେମାନଙ୍କ ମଧ୍ୟରେ ୫୦ବର୍ଷରୁ ଊର୍ଦ୍ଧ୍ୱ ବ୍ୟକ୍ତି ଓ ବିଭିନ୍ନ ରୋଗରେ ଆକ୍ରାନ୍ତ ବ୍ୟକ୍ତି ରହିଥିବା ଜଣାପଡ଼ିଛି।
