ଆଣ୍ଟରେପ(ବେଲଜିୟମ), ୧୯।୧୦(ଏଏଫ୍ପି)- ପୂର୍ବତନ ୧ ନମ୍ବର ଖେଳାଳି ବ୍ରିଟେନ ଆଣ୍ଡି ମରେ ପ୍ରଥମଥର ପାଇଁ ସେମିଫାଇନାଲରେ ପ୍ରବେଶ କରିଛନ୍ତି। ୨୦୧୭ ଫ୍ରେଞ୍ଚ୍ ଓପନ୍ରେ ସେ ଶେଷଥର ପାଇଁ ସେମିଫାଇନାଲକୁ ଉଠିଥିଲେ। ୩୨ ବର୍ଷୀୟ ମରେ ୟୁରୋପିଆନ ଓପନ୍ ଟେନିସ୍ ଟୁର୍ନାମେଣ୍ଟରେ ୯୨ ନମ୍ବର ଖେଳାଳି ରୋମାନିଆର ମାରିଅସ୍ କୋପିଲଙ୍କୁ କ୍ୱାର୍ଟର ଫାଇନାଲରେ ୬-୩, ୬-୭, ୬-୪ ସେଟରେ ପରାସ୍ତ କରି ଅଗ୍ରଗତି କରିଛନ୍ତି। ସେମିରେ ମରେ ବିଶ୍ୱର ୭୦ ନମ୍ବର ଖେଳାଳି ଫ୍ରାନ୍ସର ଉଗୋ ହୁମ୍ବର୍ଟଙ୍କୁ ଭେଟିବେ। ହୁମ୍ବର୍ଟ ଅନ୍ୟଏକ କ୍ୱାର୍ଟରଫାଇନାଲରେ ପଞ୍ଚମ ସିଡ ଆର୍ଜେଣ୍ଟିନାର ଗୁଇଡୋ ପେଲାଙ୍କୁ ୫-୭, ୬-୪, ୬-୪ ସେଟରେ ହରାଇ ସେମିକୁ ଉଠିଛନ୍ତି।
ସେହିପିର ବିଶ୍ୱର ୧୧୯ ନମ୍ବର ଖେଳାଳି ଇଟାଲୀର ସ୍ବଳ୍ପ ବୟସ୍କ ଖେଳାଳି ଜାନ୍ନିକ ସିନର ଗତ ୫ ବର୍ଷ ମଧ୍ୟରେ ସର୍ବକନିଷ୍ଠ ଖେଳାଳିଭାବେ କୌଣସି ଏଟିପି ସେମିଫାଇନାଲରେ ପ୍ରବେଶ କରିଛନ୍ତି। ୧୮ ବର୍ଷୀୟ ସିନର ଆମେରିକାର ଫ୍ରାନ୍ସେସ୍ ଟିଆଫୋଙ୍କୁ ୬-୪, ୩-୬, ୬-୩ ସେଟରେ ପରାସ୍ତ କରି ସେମିଫାଇନାଲରେ ପ୍ରବେଶ କରିଛନ୍ତି। ପୂର୍ବରୁ ୨୦୧୪ରେ ବୋର୍ନା କୋରିକ ସର୍ବ କନିଷ୍ଠ ଖେଳାଳିଭାବେ ୧୭ ବର୍ଷରେ ବାସେଲରେ ସେମିଫାଇନାଲରେ ପ୍ରବେଶ କରିଥିଲେ। ସେମିରେ ସେ ୩ଥର ଚାମ୍ପିୟନ ହୋଇଥିବା ଚତୁର୍ଥ ସିଡ ସୁଇଜରଲାଣ୍ଡର ଷ୍ଟାନିସ୍ଲାସ ଓ୍ବାରିଙ୍କାଙ୍କୁ ଭେଟିବେ। ଓ୍ବାରିଙ୍କା ଅନ୍ୟଏକ କ୍ୱାର୍ଟରଫାଇନାଲରେ ଫ୍ରାନ୍ସର ଗାଏଲ ମନଫିଲ୍ଡଙ୍କୁ ୬-୩, ୬-୭, ୬-୨ ସେଟରେ ପରାସ୍ତ କରି ସେମିକୁ ଉଠିଛନ୍ତି। ଓ୍ବାରିଙ୍କାଙ୍କୁ ହରାଇଲେ ସିନର ସର୍ବକନିଷ୍ଠ ଏଟିପି ଫାଇନାଲିଷ୍ଟ ହେବେ। ପୂର୍ବରୁ ୨୦୦୮ରେ ଜାପାନର ଡେଲରେ ବିଚ୍ ସର୍ବକନିଷ୍ଠ ଖେଳାଳିଭାବେ ଏଟିପି ଫାଇନାଲରେ ପ୍ରବେଶ କରିଥିଲେ।
