ଦଶମନ୍ତପୁର,୨୫ା୫ (ଡି.ଏନ୍.ଏ.)-କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଚ଼ଣାବାଡ଼ ପଞ୍ଚାୟତର ଏସ୍.ଡଣ୍ଡାବାଡ଼ ଗ୍ରାମରେ ରବିବାର ଅପରାହ୍ନରେ ଅଦିନିଆ ଝଡ଼ବର୍ଷା ହୋଇଛି। ଫଳରେ ଗ୍ରାମର ୧୨ ଜଣଙ୍କ ଘର ଭାଙ୍ଗଛି। ସେମାନଙ୍କ ମଧ୍ୟରୁ ଶୋଭା ସାଉନ୍ତାଙ୍କ ୬ଟି ଆଜବେଷ୍ଟ ଭାଙ୍ଗିରୁଜିଯିବା ସହ ୩୦ ବସ୍ତା ଧାନ, ୩ ବସ୍ତା ମାଣ୍ଡିଆ, ୫୦ କେଜି ଚ଼ାଉଳ ଓଦା ହୋଇ ନଷ୍ଟ ହୋଇଛି। ଦର୍ଶନ ସାଉନ୍ତାଙ୍କ ୧୦ଟି ଆଜବେଷ୍ଟସ ପବନ ଉଡ଼ାଇ ନେଇଛି। ୬୦ ବସ୍ତା ଧାନ, ୩ ବସ୍ତା ଚ଼ାଉଳ ଓ ୪ କୁଇଣ୍ଟାଲ ମାଣ୍ଡିଆ, ସୁବାସ ସାଉନ୍ତାଙ୍କ ୬ଟି ଆଜବେଷ୍ଟସ ଭାଙ୍ଗିଥିବା ବେଳେ ୮ ବସ୍ତା ଧାନ, ୨ ବସ୍ତା ମାଣ୍ଡିଆ, ୫୦ କେଜି ସୁଆଁ, ୬୦ ହଜାର ଟଙ୍କାର ଦୋକାନ ସାମଗ୍ରୀ ନଷ୍ଟ ହୋଇଯାଇଛି। ଆନନ୍ଦ ସାଉନ୍ତାଙ୍କ ମାଣ୍ଡିଆ ୨୦ କେଜି, ୪୦ ବସ୍ତା ଧାନ, ଘରର ବାସନ କୁସନ ସାମଗ୍ରୀ, ଦୁକୁ ଜାନିଙ୍କ ୨ଟି ଆଜବେଷ୍ଟସ, ୪ ବସ୍ତା ମାଣ୍ଡିଆ, ସୁନ୍ଦର କୁଲିସିକାଙ୍କ ୭ଟି ଆଜବେଷ୍ଟସ ସହ ଘରଟି ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ଦେଖିବାକୁ ମିଳିଛି। ସେହିପରି ଈଶ୍ୱର ମିଣିଆକାଙ୍କ ଘର କ୍ଷତି ହୋଇଛି। ଲିମ ମିଣିଆକାଙ୍କ ୩ଟି ଆଜବେଷ୍ଟସ, ୬ ବସ୍ତା ଧାନ, ୪ ବସ୍ତା ମାଣ୍ଡିଆ, ମାତି ଜାନିଙ୍କ ୨ଟି ଆଜବେଷ୍ଟସ ଏବଂ ୨୦ ବସ୍ତା ଧାନ ନଷ୍ଟ ହୋଇଛି। ପାତ୍ର ସାଉନ୍ତାଙ୍କ ୧୦ ବସ୍ତା ଧାନ, ୩ ବସ୍ତା ମାଣ୍ଡିଆ ଏବଂ ୨ଟି ଆଜବେଷ୍ଟସ ଏବଂ ସାହେବ ଜାନିଙ୍କ ୪ଟି ଆଜବେଷ୍ଟସ ନଷ୍ଟହେବା ସହ ନିଜ ବାଡ଼ିରେ ଲାଗିଥିବା କଦଳୀ ଓ ଆମ୍ବ ଗଛ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଏଥିସହ ଗ୍ରାମର ଅନ୍ୟ ପରିବାର ମଧ୍ୟ ଅଳ୍ପ ବହୁତେ କ୍ଷତିଗ୍ରସ୍ତ ହୋଇଛନ୍ତି। ବର୍ଷାପବନ ଯୋଗୁ ଗ୍ରାମରେ ସୋମବାର ଅପରାହ୍ନ ସୁଦ୍ଧା ବିଦ୍ୟୁତ୍ ସଂଯୋଗ ହୋଇନାହିଁ। କ୍ଷତିଗ୍ରସ୍ତ ପରିବାରକୁ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ତହସିଲଦାର ଅଜୟ ପ୍ରକାଶ ତିର୍କୀଙ୍କୁ ପଚାରିବାରୁ ସେ କହିଲେ ଯେ, ମୁଁ ଆର୍ଆଇଙ୍କୁ କ୍ଷୟକ୍ଷତି ଆକଳନ ପାଇଁ ପଠାଇ ସହାୟତା ବ୍ୟବସ୍ଥା କରିବି।
